دعا
حاجی شاہ بیگ شیدا
Get real time updates directly on you device, subscribe now.
نا پن اٹ کیوہ شروع ای نی اریس رحمن رحیم
چاسہ حال ءِ اُست انا نی ذات باری نا علیم
دُوک ءُ بڑزا کیو دُعا ای داتے اللہ کر قبول
بندہ ءِ تینا حقیر آ کپہ مولا نی ملول
خواہوہ توفیق نے آن اودے کیسک نی عطا
خواہوہ دا ہم کنے نی ایتے شیطان آن پناہ
خیال ءِ شاغاس اُست اٹی خیال ءِ بشخہ رنگ بُو
ای مریو ثابت قدم دُن کیو ہر وڑ جستجو
شان بھلُّن بھاز نا ءِ نی اریس یکتا خدا
نے آن پد ولدا گچین ءِ نن کن شاہِ انبیائ
سیرت ءِ احمد نبی نا پاش کیو شعر آ تیٹ
مقصد ءِ تے زند انا دُن اُست انا مہر آ تیٹ
ہر بشر آن او گچین ءِ ہر مَلک آن او گچین
ای تینا شئیر آ تیٹ پا کیو امر است ءِ پُدین
پاسہ رب اوڑا درود نی ہر ملائک تون اوار
پاوہ ای صلے علیٰ تو اُست ءِ مِلِّک دُن قرار
کوشش ءِ دا کر قبول رب زاری کیوہ ای
انت پارے انت کرے او داڑکن خواری کیوہ ای
دا عمل آن ای نوا کہ مچٹ اس زیبدار مریو
شالہ ایڑے ای شفاعت نا نوا حقدار مریو
پاوہ اللہ نی کمک کر واسطہ ءِ او نا نمے
اُست ءِ روشن کر کنا نی زو برے آمد کنے
نی رحیم اُس خواہش آتے اُست انا پورو کروس
ہیت جوان ءُ زیبدار ءُ اُست و ذہن اٹ نی اتوس
ہرف شیدا نی قلم ءِ کیک کمک پروردگار
ہور ءِ ٹُکاو ایت تینا مَر شہید آتون شمار
ہفتئی تلار
20-27 June 2020
تاک، 24
پنہ : 05