حیدر حسرت نا ” ای و حیرانی ” جاچ اس 3۔

ہندا سوب آن نن حیدرحسرت نا شاعری ءِ براہوئی نا ایلو بھاز آ شاعری تیان جتا پانہ ہرا روایتی ءُ شاعری ءُ:

بہشت آن داڑے ای بُڑزا تِخوک اُٹ

ہو نَت تیان شیف ای خن تیا تِخوک اُٹ

نظر بننگ اٹی اُٹ شیف حسرتؔ

ولے ای جاگہ غا تینا تِخوک اُٹ

(پنہ:56)

حیدر حسرت امر ایلو شاعرتیان جتاءِ؟

حسرت نا ہر شاعری باکمال ءِ دا مجموعہِ کلام اٹی بھاز کم دن ءُ شاعری مرور، ہرافتے ای خوانتوٹ مون مستی سر ہلکُٹ، دا حسرت نا فنی وفکری کمال ءِ کہ اونا شاعری نے مجبور کیک کہ نی اوڑا غور کر، ہراسہ شعر ءِ داد ایت ہرشاعری ءِ اُست آ تخنگ کن فہم تخک ادراک تخک، سوچ خل/، سربُن کر، ولے داہیت دُن ہم اف کہ حیدرحسرت آن بیدس پین کس براہوئی ٹی جوان ءُ شاعری کپک، یا کتنے۔بالکل اخہ!

براہوئی ٹی حیدرحسرت آن بیدس ہم نن تون دا دور اٹی بھاز گچین ءُ شاعراریر، ہرافتے ٹی ”مُرید بلوچ، منتظر بلوچ، علی ساقی، ڈاکٹرلیاقت سنی، ڈاکٹرباری آجو،، شہزادنذیر، حمید عزیز آبادی، سیدغریب شاہ انجم، منظور بلوچ، عیسیٰ نادان، ملک حبیب، اُستادمحترم فتح شاد، اُستادمحترم یوسف نسیم، عابدی، شہزادغنی، یحییٰ دوست، سلام اسیر، یوسف سجاد، عطاانجم، جواد شکارپوری، اعجاز سنگت، خالد پرکانی، حفیظ شہزاد، عثمان سوز، جمیل فاکر، رفیق شوہاز، رحیم زام، روحانی طوقی، عامر بلوچ آن بیدس عمران فریق، ماموں قمر، شمس شمسی، عابد سلام، عمیر مہرول، خالدی و سگاربلوچ ہم گچین ءُ خیال و گال مون آاتیرہ۔ پین ہم شاعر مرور، ہرافتے ای تپرہ یا کنا ذہن اٹی دا وخت آ بتوس۔

ولے داکُل آن حسرت نا شاعری جتاءِ، منفردءِ، و دا منفرد والا ہیت ءِ ہم ہراسہ شاعرکن ہراسہ مبصر کرینے، ولے اوہیت روایتی مسنے، داڑے حسرت نا شاعری ءِ ہراسہ بندغ منک کہ حسرت نا شاعری ٹی اسہ تاثر اسہ یک رنگی اس ارے، ہرارنگ تنیا حسرت تون ءِ، ارٹمی تون اف!

حسرت نا شاعری ٹی دا جوانی ارے کہ او ہر اسہ آمد مروک آ خیال ءِ نوشتہ کپک، او زوراٹ شاعری کپک۔ بلکہ ہمو خیال نا زی آ اسیکا سوچک جند تے ہمو خیال ءِ خاکہ اس کیک ولدا اوڑکن مناسب آ لوز آتے خُلسا تخیل نابال و کڑمبی ٹی کاہک تخلیق کیک، دانا وَڑِک اسے کن اونا دا غزل ءِ ہُرنہ، ہرانا ہرشعر ستا و سفت کڑزک، ہراڑان نن چاڑ کننگ کپنہ بلکہ تیویٰ غزل ءِ ہرفنہ:

”کاوہ ای ہیت ہیت آ پاسہ نی

نی مگہ بَسنُس کہ کاسہ نی

ای مگہ داسکان تین تون اُٹ

کہ کنے آن کنے خواسہ نی

تینا خن تیان تو ہُراسک تے

کنا خن تیان ہُر تے داسہ نی

داخہ زُو ہم ہننگ جوان اَلو

منوہ بسُوسس ہناسہ نی

ای ہمود اُٹ کہ تپرہ تینے

نی ہمود اُس کہ کنے چاسہ نی

ہیت سلپک نا پڈ اٹی ہم یار

کنے لگک کہ کل ءِ پاسہ نی

ای ہناٹک تو کاوہ کل آتیان

نی ہناس تینے آن کاسہ نی

نے ٹی انت اس سلیسُنے حسرتؔ

پیش تم تینے آن داسہ نی“

(پنہ: 88)

اصل اٹ دنیا نا تہٹی ادب نا بنا غان اینونا دور اسکان چندی آزموندہ غاک مرسا کرینو، و ادب نا ہر صنف دُن چا ردوم اٹی ءِ، ہر صنف اٹی وخت اتون اوار بدلی بننگ ءِ، دا کل آزموندہ ءُ، ولدا شاعراسے اسُل پابند کننگ مفک کہ داوڑ انا شاعری کر، داوڑ انا کپہ۔ ہر شاعر ہر فنکار نا تینا مزاج اس تینا تب اس مریک، او زند انا ہرا کیفیت و حالیت آتیان گدارک ہرا چاگڑد اٹی مریک، ہموفتے نوشت اَٹ اتیک۔ ہرکس انا دڑد اونا وڑ مریک، تو اونا دڑد انا بیان ہم ہمو ڈول مریک، ہندا ڈول خوشی تابیان نا ہم تینا وڑ اس مریک دُن کہ ہراسہ آرٹسٹ رنگ آتے تینا سوچ و تَب انا رد اٹ کینوس آپینٹ کرسا چشخ کشسا بیان کیک، ہنداوڑ شاعر ہم کیک:

”سر سری ہم کنے خننگ کتو

اے کہ دُن غور اٹی ہُرا کنے آ

دا مَنٹ اس کہ کسکنو حسرتؔ

کیرہ حرکت ارے تا سا کنے آ“

(پنہ:42)

حسرت نا ابہام یا ایہام گوئی:

یات سلے کہ ایلو زبان و ادب تے ٹی دا گڑاک چَٹ بھاز مہالو مسنو، ہرافتے نن داسہ اولیکو وار براہوئی ٹی حسرت نا شاعری تے ٹی خننگ اُن، و دا شرہ ءِ کننگ اُن کہ دا شاعری تا گڑا انت فاہدہ ءِ؟ ہرادے ہرکس آسانی ٹی پہہ مف۔ اول تو دادے کہ براہوئی ادب اٹی تنقیدی سوال بش کننگانے، تو دا ہم اسہ شعوری ءُ عمل اسے، بایدے سوال مرے، اگہ سوال مفک تو تخلیق کار ءِ، داسرپدی دوئی مفک کہ اوہرا تخلیق آتے کننگ ءِ، اوفتا انت اثر اس مخلوق آ تالان مننگ ءِ۔

سرپدی مرے کہ داوڑ انا شاعری اُردو ٹی مہالو بلکہ سدآ سال مُست میر تقی میر، خواجہ میر درد، غالب نا شعر تے ٹی ساڑی ارے، ہرادے ایہام گوئی جاگہ اس ابہام گوئی پاننگانے، داایہام گوئی و ابہام گوئی تینے آن اسُل خڑک مفہوم و معنہ تخرہ۔

ایہام گوئی نا بارو اٹ ‘جی ایم اصغر لکھک ”ایہام“ عربی زبان کا لفظ ہے، جس کے لغوی معنی ”وہم یا وہم میں ڈالنا“ ہیں۔ شاعری کی اصطلاح میں ”علم عروض کی وہ صنعت، جس میں شاعر، شعر میں ایسا لفظ لائے، جس کے دو معنی ہوں ”صنعت ایہام“ کہلاتی ہے۔ چوں کہ اس صنعت کے استعمال سے قاری یا سامع، وہم میں پڑ جاتا ہے کہ وہ شعر کا مفہوم کیا سمجھے۔ اس لیے اس صنعت کا نام ایہام رکھا گیا۔ صنعت ایہام کے استعمال کی خوبی یہ ہے کہ جس ذومعنی لفظ پر شعر کی بنیاد رکھی جاتی ہے، اس کا ایک معنی مفہوم کے قریب تر اور دوسرا بعید ہوتا ہے لیکن شعر میں، شاعر کی مراد معنی بعید سے ہوتی ہے، قریب سے نہیں۔ واضح ہو کہ ایہام میں شعر کا مطلب ایک ہی ہوتا ہے۔

امیر خسرو، اردو میں صنعت ایہام استعمال کرنے والے اولین شاعر ہیں۔ ان کی کہہ مکرنیوں اور پہیلیوں میں اس کا استعمال کثرت سے نظر آتا ہے۔ ایہام کی صنعت، اس زمانے میں دو زبانوں میں مستعمل تھی، ایک ہندی اور دوسری فارسی۔

محمد حسین آزاد اور مولوی عبدالحق کے خیال میں اردو ایہام پر زیادہ تر ہندی شاعری کا اثر ہے اور ہندی میں یہ صنعت، سنسکرت سے پہنچی۔ سنسکرت میں اس صنعت کو ”سلیش“ کہا جاتا ہے لیکن ایہام اور سلیش میں بنیادی فرق یہ ہے کہ سلیش میں ایک شعر کے کئی معنی ہو سکتے ہیں لیکن ایہام میں شعر کا مطلب صرف ایک ہوتا ہے”

مومن خان مومن نا دا شعر

”تم مرے پاس ہوتے ہو گویا

جب کوئی دوسرا نہیں ہوتا“

اُردو ٹی ایہام گوئی آ بھاز آ شاعرو نقاد آتا اختلافی رائے ہم مون آ بسنے(دُن کہ داسہ براہوئی ٹی حیدرحسرت نا شاعری آ اختلاف رائے مون آ بننگ ءِ) بھاز آک شاعری ٹی دا ترکیب وبیانیہ ءِ رَد ہم پارینو دانا سرجم کن ہمو نقاد آتے خوانوئی تمک۔

اُردو ٹی کلاسک دورآن پد دا وڑ انا گیشتری شاعری ”جون ایلیاء” نا شعرتے ٹی ہم خننگک:

”بہت نزدیک آتی جا رہی ہو

بچھڑنے کا ارادہ کر لیا کیا“

(جون ایلیاء)

”مستقل بولتا ہی رہتا ہوں

کتنا خاموش ہوں میں اندر سے“

(جون ایلیا)

”یہ کس نے ہم سے لہو کا خراج پھر مانگا

ابھی تو سوئے تھے مقتل کو سرخ رو کر کے“

(محسن نقوی)

”ڈھلتے سورج کی تمازت نے بکھر کر دیکھا

سر کشیدہ مرا سا یا صف اشجار کے بیچ“

(محسن نقوی)

دا ڈول انا بھاز آ شاعریک جون یا ایلو شاعر تا اریر، ہرافتے ٹی حسرت ؔوالا رنگ ساڑی ءِ، و حیدر حسرت نا شاعری ٹی گڑانا گڑاس ہندا ایہام گوئی نا وڑ اس ارے۔ و نھازجاگہ غاتیا اونا شعرک مبہم ہم اریر گڑا نن دا ہم پاننگ کینہ او ابہام گوئی ہم کرینے۔ مننگ کیک ہندا اُردو ناشاعر آک حسرت نا زیرمطالعہ مسنو، ہموفتیا حسرت نا شاعری ٹی دا رنگ تالان مسنے۔بلے دُن ہچ اف کہ حیدرحسرت نا شعرک بے معنہ و یا تشریح آن خورک ءُ۔ البتہ حسرت نا دا مجموعہ کلام اٹی گڑاس نزور ءُ شاعری ہم ارے، خاص وڑ اٹ اونا نظم آک کنے زیات دوست بتوس۔ او نظم آ سوگو گرپ اس تخنگ کپک۔ لگک ہندن کہ حسرت نا نظم آتیا ریاضت بھاز نزور ءِ، یادُن پان کہ اونا شاعرانہ تَب داسکان نظم انا وڑ اف، و حسرت ءِ نظم نوشتہ کننگ کن ایلو زبان تا نظم آتے اسیکا واخوانوئی تمک، اگہ نن ایلو زبان تیٹ پن ہلین تو بلوچی ٹی اُستاد محترم منیر مومن، اُردو ٹی، محسن نقوی، گلزار، راحت اندوری، دانیال طریر نا نظم آتے بایدے ننا نظم انا شوق تخوک شاعر آک اسہ وار ضرور خوانر۔ مطلب داکہ حیدر حسرت نا کل تخلیق سفتی اف۔

ولے حسرت نا شاعری ٹی داخلی و خارجی ہڑتوم آ کیفیت آک خننگرہ، و اونا کمال دادے کہ اوخارجی درشان ءِ ہم ہندن ءُ وڑ اسے ٹی کرینے، ہراٹی خوانوک ءِ اونا ہمو ہیت حسرت نا جند انا ذات اتون ہمگرنچ لگک و خوانوک اودے داخلی سرپد مریک،دُنکہ اونا دا شاعریک:

”گدریفنگ اُٹ زندگی ءِ ای دچا

گدریفنگ ءِ زندگی دچا کنے

ای اگہ پاو ہنپرہ خلق اٹ تے ہم

آب و دانہ ءِ اگہ چکا کنے؟

انت پاو تے کسکنے یا زندہ ءِ؟

ارّفے حسرتؔ اگہ کس نا کنے“

(پنہ:43)