سانحہ کوئٹہ قیامت آن کم اَلو

کوئٹہ: سپریم کورٹ آف پاکستان نا پندار جج جسٹس جمال خان مندوخیل و بلوچستان ہائی کورٹ نا پندار چیف جسٹس جناب نعیم اخترافغان اسک پارینو کہ 8اگست سانحہ سول ہسپتال قیامت آن کم اَلوکہ، بیرہ مرک سنگت آتا یات آتے گیرام درفن کیک۔ شہید وکیل آتا مشن ءِ مونی دننگ کن پوسکن ءُ اومیت اس گنڈک۔ ہر نن آن پد دے و ہر تہار آن پد روشنائی مریک۔ بلوچستان ہائی کورٹ اٹی وکیل آتا شہادت آن ہرا خورکی ودی مسوسس، پوسکن آ وکیل آک اودے پر کننگ نا کوشست کریر، جج آتتون اوار ہر سنگت 8اگست نا ڈکھیائی ءِ شیف شاغنگ کن تینا وس انا کچ کڑد ادا کرے۔ دا ہیت آتا درشانی ءِ اوفک بلوچستان نا وکیل تنظیم بلوچستان بار کونسل، بلوچستان ہائی کورٹ بار ایسوسی ایشن، کوئٹہ ڈسٹرکٹ بار ایسوسی ایشن نا کنڈ آن سانحہ 8 اگست سول ہسپتال اٹی وکیل آتا شہادت نا رد اٹ اڈ ہلوک ہڑزخواہی ریفرنس آن تران کرسا کریر دا وخت آ بلوچستان ہائی کورٹ نا جج آک، مچ آ ملک آن بروک وکیل تنظیم آتا راہشونک،س یاسی جماعت آتا سرکڑدہ غاک ہم ساڑی ئسر۔ دود آن تران کرسا بلوچستان ہائی کورٹ نا چیف جسٹس جمال خان مندوخیل پارے کہ 8 اگست نا واقعہ ءِ ای مرک اسکان گیرام کننگ کپرہ، ہرا بے دڑدی اٹ ننا چنا تے ظلم انا گواچی کننگا، او گیرام دننگ مفک۔ شہید آتتون ننا ہرا رشتہ ئسکہ، اودے ہچ گہس است آن دننگ کپنہ۔ دا واقعہ ءِ ڈکھیائی نا واقعہ اس پاپ تو جونا ءِ۔ نن تیان سنگت آتیان دو سلان، ولے اوفک اسہ ہند اسے آ سر مسر۔ شہید آک ننا است آتیٹی ءُ، و اوفک ننے آن مُر افس، ہر نن آن پد روشنائی اس مریک، نن پوسکن آ وکیل آتتون اومیت گنڈانن۔ دا ہمو مائنڈ سیٹ نا بے سہبی ءِ کہ وونا عمل آن ننا دا تپہ و راج چٹک، ہرا تپہ ہنا، اوڑان پد پوسکن ءُ تپہ اس بریک۔ بھاز آ سنگت آتتون سفر کرین، ایون ہرانگ کہ کاوہ تو ہمو ساہت آک یات بریرہ، ای اوفتے پدی اتنگ تو کپرہ، ولے اوفتا یات آک کن تون گنڈوک ءُ۔ او پارے کہ ننا سنگت آتے قول کروئی ءِ کہ شہید آتا مشن ءِ مونی دینہ۔ 8 اگست نا بابت ہر پروگرام اٹ بشخ ہلنگ نا کوشست باور کرفنگ خواوہ کہ نما ویل آتا ایسری کن ہر وڑ اٹ کوشست کیوہ۔ بلوچستان ہائی کورٹ نا پندار چیف جسٹس نعیم اختر افغان پارے کہ است ءِ توننگ مشکل ءِ، خاص وڑ اٹ ہراتم ڈکھیائی آن است بیوس مرے، و ولدا کوئٹہ ٹی وسیلہ غاتا کمتی ءِ، 8 اگست نا واقعہ کنا خڑک آ قیامت اسے آن کم اف،اِرا سال اسکان ننا بھاز خواری اٹ تینا باندات آتے چلیفین، ولے سانحہ سول ہسپتال آن پد اینو ہمو چناک ہرا جونیئر یا دا شہید آتا سنگت ئسر، اینو مست آن زیات سیوت کرینو۔ و تینا کاریم ءِ برجا تخانو۔

(آن لائن)