مولانا حضور بخش جتوئی
حسین بخش ساجد
براہوئی و بلوچی ادب کن اخہ در کہ مکتبہ درخانی نا عالم آک کاریم کرینو، اوفتا ہچ ءُ مٹ اس اف۔ مولانا محمد فاضل درخانی آن ہلیس مولانا محمد عمر دینپوری، مولانا نبو جان و مولانا حضور بخش جتوئی اسکان، کل عالم آک تینا وس و کچ اٹ نئے بیرہ براہوئی، بلوچی زبان و ادب نا گلشن ءِ ٹل و پھل کریر، بلکہ ہمو وخت آ بلوچستان آ کوزہ کروک آ و عیسائیت نا تبلیغ کروک آ انگریز آتا برخلاف قلمی جہاد نا ہم خذمت ءِ سر تسر۔ اوفتا بائیبل، انجیل و یوحنا نا براہوئی و بلوچی ترجمہ غاتا مون اٹی مولانا محمد عمر دینپوری، براہوئی ٹی قرآن پاک نا ترجمہ ءِ کرے و ہندن بلوچی ٹی مولانا حضور بخش جتوئی قرآن پاک نا ترجمہ ءِ کرے۔
مولانا حضور بخش جتوئی 1866ء اٹی بھاگ ضلع سبی نا خلق سنی ٹی حبیب خان جتوئی نا اُراٹی ودی مس۔ بنائی آ زند کشت و کشار و مال خوافنگ اٹی تیر مس۔ ولے اوکان گڈ علم دوئی کننگ کن خلق درخان آ مون کرے، کہ ہراڑے مولانا محمد فاضل درخانی اول مدرسہ درخان و پدا مکتبہ درخانی ٹی علم انا ہینار آتے سیر تننگ اٹی ئسکہ۔ 30 سال ہموڑے علم ہیل کننگ آن گڈ تینا خلق آ پدی بس۔ و اسہ دینی ءُ مدرسہ اسے نا بنداو ءِ تخا، و داڑتون اوار تصنیف و تالیف نا کاریم ءِ ہم بنا کرے۔ اونا کتاب آتیٹی ”شمائل شریف“، ”احسن الحکایات“، ”فریب خاکساری“، و نظم و نثر اٹی پین بھاز کتاب ہم نوشتہ کرے۔ حمد و نعت و معرفت و تصوف نا کنڈ آ ہم اونا طب روان ئس۔ تصوف و صوفی تا کلام ہم نوشتہ کرے۔ علم و ادب و تصوف نا بیرک ءِ بڑزا کروک آ دا بے مٹ آ عالم و ادیب 2 جون 1946 اٹی دا فانی آ کوڑی آن خن تے تر کرے، ولے تینا علم و فضل انا چکل آن بھاز آتے سیر تس۔
…………
فنا فی اللہ
کلام: مولانا حضور بخش جتوئی
دوی آ رب انا حمد و ثنا ءِ
ہندا مسخت کنا دا زند انا ءِ
سفت اونا ارے ڈکوک پاش ہم
ہر اسہ عیب آن مُر بے شک خدا ءِ
او بے مٹ و ارے بس بادشاہی اس
اونا قدرت نا ہر کنڈ آ ستا ءِ
اوڑان ڈکوک افک ہچ گڑاس ہم
نگہوانی ٹی اونا ہر گڑا ءِ
شلوک اونا ارے رحمت نا جمر
ہر اسٹ کن اونا جاری سخا ءِ
ارے او خالق و رازق و یکتا
دا زند و موت اٹی اونا رضا ءِ
عبادت نا چا لائق اوار ءِ بس
ازل تا او ابد بس بادشاہ ءِ
ہفتئی تلار
تاک:02۔
۔14-08جنوری 2022ء
پنہ: 04