شرف تننگ، شرف ہلنگ(گپ و تران)

دنیا نا اسہ تمبہ کل آن سوگو ءِ۔ ہرا بندغ نا حس آتے سوگو کیک۔ حس آک سوگو مسر، تو بندغ نا دستار مدام جک سلک۔ حس آتے بننگ، خننگ، چٹنگ، گمان کشنگ، است آ تخنگ، کشنگ دا گڑا تے ٹی بندغ پک بسن مس زند ءِ پہہ مریک۔ زند ءِ پہہ مننگ نا مطلب تینا چاگڑد نا چاہنداری آن واخب مننگ۔ بندغ و بندغی نا علم دنیا نا علم ءِ۔ دا علم اٹی عالم و دنیا دار وخت انا شیفی بڑزی ءِ پہہ مریک۔ ارٹمیکو حکمت ءِ، حکمت اٹی سائنس و طب ہڑتوم آک بریرہ۔ پاوالی آ زند دا ہڑتوم آتے ٹی سوگو ئس۔ ہندا سوب آن او وخت انا بندغ نا حس آک سوگو ئسرہ۔ دوست و دشمن نا فرق ہم اوفتے سما ئس۔ بندغی نا کچ آن معلومدار ئسر۔ جمر نا چنکو سیخا اسے آن طوفان و پر انا کساس ءِ کریرہ۔ مہمان، مسافر و بیوس ءِ شکل آن چاہسرہ۔ خاہوت آتے گنڈنگ، دود آتتون تفنگ بسکہ تا۔ پیر انگا ساہدار و انسان آتا نادراخی تے پہہ مسرہ۔ پک دارو درمان کریرہ۔ خواری کشی نا بھرم ءِ چاہسرہ۔ تہو انا نیت آن پہہ ئسر۔ سال و ساہت آتے کمال اٹ بشخ کریرہ۔ بھلا غان بھلا ویل ءِ اسہ ساہت اسے ٹی چٹفیرہ۔ نئے اوفتے ٹی نفسیاتی نادراخیک ئسرہ، نئے خاہوت نا خاہوت ءِ جل انا دیر دریکہ۔ نئے گدانک تا طوفان اسے ٹی بال کریرہ۔ نئے ساہدار تیٹی کانگو وائرس اس جاگہ کریکہ۔ نئے اوفتیٹی ایڈز ئس، نئے اوفتے ٹی کورونا اس تماکہ۔ ہراتم شاری مسر، پولیو بس، ٹی بی بس، گرّ انا نادراخی بس، کینسر بس، ڈغار تیا کشت و خون انا بنا مس۔ تین پہ تین نا سیاسی چک و تاڑ آک بسر۔ سیاست نا مکاریک بسر۔ جوان انگا دود ربیدہ غاک اِلنگار۔ دارو سودا کروک آتیا نادراخ آتے ہڑی آ کچک آتیانبار یلہ کریر۔ نظریہ نا پن اٹ علم بہا مس۔ وونٹ انا پن اٹ جفت آتے طاق اٹی بدل کننگا۔ دیر بہا مس، دتر بہا مس، جر بوٹو و درخت آک بہا مسر۔ پیر پخیر آتیا نرخ تخنگا۔ اینو بندغ نا اسہ نت اس مزل آ ایلو جہاندم لائن آ تخوک ءِ۔ اسہ خن تے تینا ایلو خن تے ایلو نا باخو ٹی سخت ءِ۔ مزغ آتے ٹی مستی نا خاخر زراب ہلکنے۔ ہرا خاخر ءِ مست سیانڑاک علم، آزموندہ، مشاہدہ اٹ کسفیرہ، داسہ دا زراب بیرہ دتر خواہک۔ مست دے، نن، روزگار و منہ پن انا دیو ئسرہ، داسہ گام گام آ ہر گڑا کن دیو اس تولوک ءِ۔ نیمہ کننگ کن نے آن دتر نا قربانی خواہک۔ درو نا بندغ ہیت آ آخا عمل آ سلوک ئس، اینو نا بندغ بیرہ ہیت آ سلوک ءِ، عمل اوڑان گم ءِ۔ ہندا سوب آن دن ءُ بندغ اس اف کہ ویل انا گواچی مف۔ ہراتم قوم آک قوم اسے نا استحصال ءِ کریر، بندغ بندغ نا استحصال ءِ کرے، قدرت کورونا نا دروشم اٹی اودے اسہ ہند آ ہندن ءُ بھلو ویل اس تس کہ قوم آک بندغ آک تین تون تینٹ اختہ مسر۔ اسٹ اس پارے نن ہر جوجک و ساہدار ءِ خوراک کرین، قدرت ننے آن خر کرے۔ کس پارے ڈغار نا نعمت آتے کن ڈغار نا سینہ ءِ چیران، لٹنگ پلنگ اٹی تمان، فطرت مون ءِ ننے آن ہڑسا۔ کس پارے درخت و دیر انا بہا کننگ جوان متو۔ جون آتا قطار آ تمنگ، بندغ نا تکلیف آتیٹی اختہ مننگ، قبرستان آتا و کفن نا گونڈ تمنگ، بندغ نا بندغ آن نرنگ، باوہ نا مار ءِ تینے آن مر کننگ، برامی تا جتا جتا خاچنگ، شاری تا خلق آتا پارہ غا ددینگ انگ، حکمت نا خواجہ غاتا پوسکن ءُ لوز و دارو پٹنگ، عبادت نا مقدس آ جاگہ غاتا بند مننگ، مسیت آتیا کلف خلنگ، دُو تیا دستانہ، بوز آتیا پچ تفنگ، ہر ہمو مصیبت ءِ شون ہلوک آ دنیا خنا، ہرا اونا گت و گمان اٹی اَلو۔ مجلس و کچاری تیٹی کماش آک پاوالی و گدانی آ زند ءِ تینا یات کننگ اٹی ئسرہ۔ لنگڑی آن گڈ ہم بندغی نا سوگوی نا گپ آتے کننگ اٹی ئسرہ۔ پوسکن آ بندغ نا با خٹ ئس اوفتے ہُننگ اٹی ئسکہ۔ پوسکن آ زند و شون آن ہر اسٹ ءِ بد بننگ اٹی ئسکہ۔ اگہ دا سیاست اس ئسکہ تو سیاست نا مون مَون ئس۔ اگہ دا گمر اس ئسکہ، اوڑا کل لعنت کننگ اٹی ئسرہ۔ اگہ دا قدرت نا کنڈ آن سزا و امتحان اس ئسکہ، تو دعا و خیرات آک مننگ اٹی ئسرہ۔ باک بند ئسرہ، نک یخ تفیسر، دُوک سرتوسہ، بیرہ خنک ئسرہ، اسٹ ایلو نا بیوسی ءِ ہُرسا دے پہ دے آ زیٹ مننگ اٹی ئسرہ۔ خفک ئسرہ کہ دا بلہ نا چٹنگ کن توروک ئسرہ۔ یا دارو اسے نا پڑو کن چاری ئسرہ۔ بس دا مچ آ ویل اٹی جوان انگا و پہہ انگا بندغ نا اسٹ انگا ہیت ئس کہ ہرادے آن بندغ بندغ نا شرف ءِ اِلانے، قدرت نا ودی کروک آ گڑا تا قدر ءِ گیرام کرینے، ظلم و بیدادی بھاز مسنے، قدرت مون ءِ ہڑسانے۔ کودک آتا بددعا تے خف تورینے۔

ہفتئی تلار
تاک: 40
17-23 Oct, 2020
پنہ: 01