رمضان صاحب نا اظہار مگہ شاعرانہ ءِ؟ (1)

’’ نقشہِ فردوس‘‘ تنقیدی جاچ

ہراڈول پنی آ ادیب و نقاد الطاف حسین حالی نا ’’مقدمہِ شعروشاعری‘‘ نا حوالہ ءِ ترسا صاحبِ کتاب رمضان ساسولی صاااحب دا کتاب نا سر لوز اٹی پارینے کہ شاعری اسہ کیفیت اسے نا پن ءِ۔

ہندا ہیت ءِ مونی درسا شاعر نا شاعرانہ کیفیت ءِ زرس پین شابیت ءُپڑ اسے آ تالان کرسا ای دا پاننگ خواوہ کہ بالکل ہندا وڑ ءِ کہ ہراسہ بندغ اسہ وخت آ اِرا ماحول اٹی رہینگک۔ اسہ ماحول نا بندغ تینا جند انا تہہ انا باطنی ماحول ءِ، ہرادے نن داخلی ماحول ہم پانہ۔ ارٹمی ماحول بندغ نا چاگڑد یعنی باطن آن پیشن نا ماحول ءِ، ہرادے نن خارجی ماحول ہم پانہ۔ نن دا ہم پاننگ کینہ کہ اسٹ بندغ نا پاش انگا ظاہری آ حالیت ءِ، اسٹ اونا تہہ انا ڈکوک آ حالیت ءِ، اصل اَٹ ہر بندغ نا تہٹی اسہ پین بندغ اس ہم مریک، ہرا بندغ نا تینا جند انا لاشعور اٹی تولوک مریک، ہمو بندغ فنکار، ازمکار، قلمکار، شاعر، تخلیق کار یا گُڑا تخریب کار یا تو جانثار اس مننگ کیک۔

لس بندغ آتیانبار شاعر تون، نوشتکار تون ہم ہندا اِرا ماحول گون مریرہ، ہر نوشت مدامی تینا داخلی و خارجی ماحول آن اثر ہرفسا جتا ءُ کیفیت اسے نا گواچی مرسا ہمو اثر و محسوس کروک آ گڑاتے تینا اظہار جوڑسا شاعری یا ادب نا ایلو نثری صنف آتا تہٹی بیان کیک۔

دارداٹ پنی آ نقاد و دانشور ڈاکٹروزیرآغا نا اسہ کتاب اس ’’تخلیقی عمل‘‘ نا پن اٹی ساڑی ءِ، او سرجم دا رد اٹ شرہ کرینے، کہ امر کس تخلیق کار، شاعر و فنکار مریک؟ تخلیقی عمل نا نفسیاتی شعوری لاشعوری تیویٰ پہلو تیا او سرجمی اٹ شرہ کرینے، ہندا رِداٹ پنی آ ماہرِ نفسیات سگمنڈ فرائیڈ نا ’’تحلیل نفسی‘‘ نا سرحال آ سرجم مقالہ اس ساڑی ءِ۔ داڑے مضمون نا مرغنی نا سوب آن ای دا مقالہ غاتیا شرہ کننگ کپرہ۔

داخلی یاباطنی ماحول نا برائے راست تعلقداری شاعر نا تینا ذاتی ڈکھ ویل دڑد وغم فکر و گڑتی فریشانی گل و بالی تون مریک۔ خارجی ماحول ہمودے کہ شاعر ہرا چاگڑد اٹی رہینگک دا چاگڑد اٹی لازم ءِ روزمرہ زنداَٹ وڑوڑ انا واقعہ و حادثہ غاک مریرہ، ہرافتا برائے راست تعلقداری شاعر نا تینا ذات اتون مفک، ولے دا واقعہ غاتے شاعر محسوس کیک، وہندا حساسیت اودے مجبور کیک کہ دافتا بارواٹ نوشتہ کے۔ دن کہ اسہ شاعر اسے نا خلق اَٹ ڈغار اسے نا یا گلی سے نا زی آ چنکو تکرار اسے آ ورناس خلنگک کسفنگک تو شاعردا واقعہ ءِ محسوس کرسا دادے تینا قلم نا سرحال جوڑکیک:

دے خواجہ مرو ءِ خلق انا دا

دا شار انا وارث دیر مرو

یک یک آ بننگ ءُرنگ آتے

گندار انا وارث دیر مرو

بے مالی ءِ گلشن کل آ

گلزار انا وارث دیر مرو

ہر وار تیار انگا فصل ءِ

بے لاب آن دا ماس کش کیرہ

اسہ چنکو زمین اسے نا خاطر

ایلمک تینے پش پش کیرہ

ہندا وڑ انا پین چندی واقعہ غاک اریر ہرافک ننا راج اَٹ تالان ئُ، دافک انسانی راجی رویہ ئُ۔ ہرافک انسانی چاگڑد ءِ نسخانی کیرہ۔ گڑا دافتے شاعر آک تینا سرحال جوڑرہ۔ البتہ ہچ ءُشاعراس پابند اف کہ او چاگڑداَٹ ساڑی ویل وواقعہ غاتے ہم نوشتہ کے دا شاعرنا جند انا سوچ، فکروخیال آ تخوک ءِ کہ او بیرہ تینا ذات اکن نوشتہ کے یا جم راجی ویل و گڑتی تے ہم بیان کے۔

دارداٹ ہم ادب نا پڑ آ اِرا نظریہ ساڑی ئُ، اسٹ ءِ پارہ ’’ادب برائے ادب‘‘ ایلو ءِ پارہ ’’ادب برائے زندگی‘‘ ای اصل اٹ رمضان ساسولی نا دا کتاب و شاعری نا ہندا اِرا پالو آ زرس تنقیدی وڑاٹ اٹی جاچ کرسا شرہ اس ایسنٹ یعنی رمضان صاااحب نا ’’داخلی وخارجی اظہارنا جاچ‘‘

رمضان ساسولی صاااحب ہمو شاعر ءِ کہ اونا شاعری ٹی داخلی وخارجی ہڑتوم آ اظہارک خننگرہ۔ ولے رمضان ہرا وخت تینا داخلی بیانیہ ءِ مون آ اتیک دا بارواٹ او بھاز خار اٹی بریک خار اَٹ خننگک، او تینا ذات انا بارو اٹ ہچ ءُکمپرومائز اس کپک۔ بس دوٹوک ہیت ءِ ہندن کیک ہرا شاعری کم بلکہ تڑی اسے نا وڑ زیات لگک۔ اونا داخلی پالو ٹی ساڑی آ شعر تیٹ شعریت نا ہرا لوازم آک ئُ، اوفک چٹ بھاز لتاڑوک خننگرہ۔ او داخلی اظہار نا وخت آ دا ہوش آن دیک کہ شاعری جمالیات نا خواست ءِ کیک، شاعری دا ڈول پاش ظاہر مفک، بلکہ اشارہ، کنایہ، استعارہ و تشبیہہ تا وسیلہ تون تالان مریک۔ نن دا ہوش آن ہچ دپن کہ بیرہ اسہ کلام اس ہیت اس ردیف و قافیہ وزن وبحر انا پابندی تون مس گڑا او شاعری اسے۔ نہ، شاعری و لس ہیت اٹ اگہ فرق ءِ تو ہمو آرٹ انا ہرادے تخیل نا بیرشت اٹی پیش کننگک۔ ہر ہمو ہیت ہرا قافیہ وردیف بحر ووزن اٹی بند ہم مرے اوٹی آرٹ، جمالیاتی و شعریت نا زیبائی متو او شعر اس پاننگپک۔ انتئے کہ داسہ نا دورباری ٹی شاعری ءِ ردیف وقافیہ وزن و بحر آن ہم آزاد کننگانے اوڑکن آجو نظم انا ہیئت مون آ بسنے بلکہ نثری نظم ہم داسکان نوشتہ مریک، گونڈ دا کہ شاعری کن شعریت وجمالیات لازمی ءِ، شاعری مہر و مریبت نا خواست ءِ کیک، شاعری فطرت نا اظہار ءِ کہ شاعری ٹی پھل، بلبل، گواڑخ و سمبل، شراب وگلاب، ساقی وپیمانہ، خن و دیدہ، مَش وریگزار، پٹ وتلار، چشمہ وچکل، گہوش وچرک، گوریچ و بانسری، مجنون و صحرا، دڑد وفراق، خواست وعاجزی، ڈیہہ وڈغار، مومل و سوزو، رخسار وخڑینک، ہجرووصال تخیل نا لہجہ ٹی ہیت کیرہ۔ ولے رمضان صاااحب نا شاعری ٹی گیشتری دا گڑاک دیچہ انتئے کم خننگرہ۔ اونا داخلی اظہار بھاز باغیانہ بھاز خودسر و سریلہ ءِ۔ دا ڈول انا شاعریک مزاحمتی سرحال تون ٹہیرہ، داڑان جوان ئس کہ رمضان ساسولی بیرہ مزاحمتی شاعری کروسس۔

ہفتئی تلار

تاک:05

29جنوری، 04 فروری 2022ء

پنہ: 02