سردار عطاء اللہ خان مینگل عہد ساز شخصیت(1)۔

سردار عطاء اللہ خان مینگل نا باوہ بزرگوار سردار رسول بخش خان مینگل بھلو وخت اس بیلہ ٹی ہندی مس، ہرانا سوب آن مینگل قبیلہ نا پایہ تخت وڈھ بیدس سردار آن ئسکہ۔

فروری 1954ء اٹی مینگل قبیلہ نا متبر آک سلاہ کریر، و پیہن ریشی مینگل آتا ڈَل اس ٹہیفیر، جھالاوان اٹی متبر آتا نمائندہ ڈَل اکن ”سماٹ آ متبر آک“ نا اصطلاح کاریم اٹ اتنگاکہ۔

مینگل قبیلہ نا یہ ڈَل لسبیلہ غا ہنا و سردار رسول بخش مینگل تون اوڑدہی کرے و اوڑان آخبتی وڑ اٹ وڈھ آ بننگ نا خواست کرے۔ سردار رسول بخش خان مینگل است اٹ وڈھ آ بننگ کن امنائی اَلوکہ۔ مینگل قبیلہ وڈھ آ بفننگ نا رند اٹ سردار رسول بخش مینگل نا مون آ سلاہ اس تخا۔ اگہ نی وڈھ آ بننگ خواپیسہ تو ننے موکل ایت کہ مینگل سرداری نا زمواری تے عطاء اللہ خان مینگل ءِ ایتن۔ دا سلاہ غا سردار رسول بخش مینگل پارے کہ عطاء اللہ مینگل ءِ سرداری و قبائلی باندات آتیٹی آزموندہ اف۔ او دا رداٹ خوار مننگ کیک۔

دا ہمو حالیت ئس کہ سردار رسول بخش مینگل وڈھ آ بننگ کن اؤ کرے۔ مینگل متبر آک عطاء اللہ خان مینگل ءِ باقاعدہ وڑ اٹ وڈھ آ بننگ نا سلہ خلکر، دا فیصلہ غان منہ دے پد سردار عطاء اللہ خان مینگل وڈھ آ بس۔ وڈھ اٹی مینگل قبیلہ نا متبر آتتون اوڑدہی کرے، قبیلہ نا شیفکو شاخ آتا ٹکری تتون سلاہ کرے۔

عطاء اللہ خان مینگل نا ہیت و گپ، و پامداری ءِ مون آ تخسا فیصلہ مس کہ عطاء اللہ خا ن مینگل ءِ دستار کننگے۔ دا دے تیٹی ریاست قلات قلات اسٹیٹ یونین K.S.U نا فیڈریشن ئسکہ۔ داٹی مکران، ریاست خاران، ریاست لس بیلہ اوار ئسر۔ قلات اسٹیٹ یونین نا آئینی سروک خان قلات ئسکہ۔ فوج،کرنسی، داخلہ، خارجہ نا معاملہ غاک بنجا پاکستان تون ئسرہ، ایلو معاملہ غاتیٹی ریاست قلات وتواجہ ئسکہ۔ اونا جند انا وزیر اعظم اس ئسکہ۔ دا دے تیٹی ریاست قلات نا وزیراعظم یار محمد کھنڈ ئسکہ۔ مینگل قبیلہ نا ڈَل فیصلہ کرے کہ سرداری نا رد اٹ وزیراعظم قلات تون اوڑدہی کننگک۔

عطاء اللہ خان مینگل تینامتبر، شرفدار و ایلو 100 بندغ نا ڈَل اسے تون اوار قلات آ بس، کہ سرداری نا رد اٹ وزیر اعظم تون اوڑدہی اس کننگے۔ وزیراعظم 100 انا جاگہ غا پن کروک شش بندغ نا نمائندہ ڈَل اتون اوڑدہی کرے۔ مینگل قبیلہ نا نمائندہ ڈَل سردار عطاء اللہ خان مینگل نا سردار مینگل نا وڑ دستاربندی نا فیصلہ غان وزیراعظم مسٹر یار محمد کھنڈ ءِ معلومدار کرے۔

وزیراعظم قلات مینگل قبیلہ نا فیصلہ نا مخ تفی ءِ کتو۔ وزیراعظم تاثر تس کہ عطاء اللہ خان مینگل نا دستاربندی نا فیصلہ غان مست کن تون سلاہ کننگوسس، دا وخت آ مینگل نمائندہ ڈَل تینا فیصلہ غان وزیراعظم قلات مسٹر یار محمد کھنڈ ءِ معلومدار کرے و پارے کہ قبائلی روایت نا رد اٹ دا قبیلہ مینگل نا حق ءِ کہ اوفک تین کن سردار اس گچین کیر۔

مینگل قبیلہ نا فیصلہ وزیراعظم ءِ وڑتَو۔ او است اٹ کرے و معاملہ ءِ مرغن کننگ کن اسہ ہفتہ اسے کن قلات نا سرمائی ہیڈکوارٹر ڈھاڈر آ ہنا، و ڈَل ءِ پارے کہ ڈھاڈر آن پدی بننگ آ ہیت مریک۔

وزیراعظم زوراکی نشان ترسا ڈَل انا ایلو باسک آتے دزگیر کرے، اوڑدہی آن پد عطاء اللہ خان مینگل ترند ءُ برانز اس چست کرسا خواست کرے کہ دزگیر متبر تے یلہ کننگے۔ عطاء اللہ خان مینگل نا اصولی سخت موقف نا سوب آن وزیراعظم ءِ مینگل ڈَل انا باسک آتے یلہ کروئی تما۔ سردار عطاء اللہ خان مینگل تینا ڈَل اتون اوار وڈھ آ پدی بس۔ وزیراعظم بیر ہلنگ نا وڑ اٹ ناظم جھالاوان (اسسٹنٹ کمشنر جھالاوان) نا کمک اٹ سردار عطاء اللہ خان مینگل ءِ پرمان کرے کہ او 48گھنٹہ ٹی وڈھ آن پیش تمے۔ عطاء اللہ مینگل حالیت آتے پہہ مس، و پدے پشت مروک چم بازی تے چاہس، گڑا او تینا ماما سردار بلوچ خان محمد حسنی نا اُرا غا مشکے آ ہنا۔

وزیر اعظم قلات ڈھاڈر آن پدی بس و عطاء اللہ خان مینگل ءِ اوڑدہی کننگ نا پارے۔ عطاء اللہ خان مینگل وزیراعظم تون اوڑدہی کرے۔ وزیراعظم قلات یار محمد کھنڈ پارے کہ خان صاحب میر کرم خان مینگل ہم قبیلہ مینگل نا سڑدار مننگ نا دعویٰ کننگ ءِ۔ ہیت پاش مس۔ راستکی دا ئس کہ خان قلات میر کرم خان مینگل ءِ وزیراعظم نا کمک اٹ عطاء اللہ مینگل نا مون اٹ مینگل قبیلہ نا سڑدار جوڑ کننگ خواہسکہ۔

وزیراعظم قلات گچین کاری نا وڑ اٹ سردار اس گچین کننگ نا فیصلہ کرے، دا گچین کاری کن مینگل قبیلہ نا کل متبر، میر و ٹکریک سلاہ درشان کریر۔ میر کرم خان مینگل بیرہ ہفت وونٹ دوئی کرے و سردار عطاء اللہ خان مینگل 106 وونٹ دوئی کرے و عطاء اللہ خان مینگل قبیلہ نا سڑدار جوڑ مس۔ سردار عطاء اللہ خان مینگل بلوچستان نا اولیکو سڑدار ئس ہرا باقاعدہ گچین کاری نا کمک اٹ جمہوری وڑ اٹ سڑدار گچین مسوسس۔ سرداررسول بخش مینگل خان قلات آن چَپ جام لس بیلہ غان زیات خڑک ئسکہ، و میر کرم خان مینگل خان قلات آن خڑک ئس۔ سردار رسول بخش مینگل جام غلام قادر محمد نا سالم ہم ئسکہ۔

1956ء اٹی ”دیکی پاکستان قانون ساز اسمبلی“ نا گچین کاری تا دیک ئسر، بابائے بلوچستان میر غوث بخش بزنجو، سردار عطاء اللہ مینگل تون اوڑدہی کن وڈھ آ ہنا، ایلو ہیت آتیان بیدس سیاسی باندات آتیا ہم ہیت و گپ مس۔ میر غوث بخش بزنجو سردار عطاء اللہ مینگل ءِ گچین کاری تیٹی بشخ ہلنگ نا سلاہ تس۔ سردار عطاء اللہ خان مینگل پارے کہ کنے گچین کاری تیٹی است خواہی اف۔ گڑا کنے دا ول ویچڑی تیٹی شاپبو۔ ای گچین کاری تیٹی بشخ ہلنگ کپرہ۔ دا وخت آ میر غوث بخش بزنجو پارے ”ای ہم گچین کاری تیٹی گشخ ہلیوہ۔“ تو سردار عطا ء اللہ خان مینگل پارے کہ اگہ نی گچین کاری نا کسر ءِ پک کرینس تو گڑا ای ہم ہندا کسر اٹ بریوہ۔ دا وڑ میر غوث بخش بزنجو نا تحریک آ سردار عطاء اللہ خان مینگل تینا جمہوری سیاسی سفر نا بناءِ کرے۔ سردار عطاء اللہ خان مینگل قلات نا نشست آن سرسہب مس۔ و دیکی پاکستان اسمبلی نا باسک گچین مس۔ جھالاوان، کچھی، نصیرآباد، ضلع قلات اٹی ئسرہ۔ قلات نا اسہ نشست آ نواب غوث بخش رئیسانی گچین مس، اسہ سیٹ آ نواب محبوب علی خان مگسی، اسہ سیٹ آ میر نبی بخش خان کھوسہ، ضلع سبی آن نواب خیر بخش مری، ضلع ژوب آن صالح محمد مندوخیل، دیکی پاکستان اسمبلی نا باسک گچین مسر۔ مکران آن ایلو بلوچ باسک آک گچین مسر۔ بلوچستان نا 16نشست ئسرہ۔

(برجاءِ)