زندان نا ڈائری، سال 1973ء(15)

ڈسٹرکٹ جیل نا اسیر آک

مارکر فیکٹری نا مزورکار بندیک:۔

اگست 1973ء نا ارٹمیکو ہفتہ مارکر فیکٹری کوئٹہ جیل روڈ ہدہ نا مزورکار ملازم آک، سرفراز احمد بنگلزئی، دوست محمد بنگلزئی، عبدالرحمان رند، عبدالسلام، غلام حیدر، محمد اعظم، گل محمد کاسی و منہ پین مزورکار ءِ کبینی نا رد اٹ تنخواہ تیٹی ودکی و ایلو آسراتی و آسودہی تے کن برانز نا بدل اٹ زندان کننگا۔ دا مزورکار بندیک مارکر ورکرز ایمپلائز یونین آن تعلقدار ئسرہ۔ ہرافک تینا خواست آتے کن فیکٹری نا چار دیوالی نا تہٹی برانز کریرہ۔

دا برانزی مزورکار آتا لیڈر کامریڈ فقیر محمد ئس۔ کامریڈ فقیر محمد ءِ بھلو وخت اسے آن ای چاہسٹہ۔ ہرا نیپ و بلوچ اسٹوڈنٹس آرگنائزیشن نا راہشون تیان بھاز خڑک ئسکہ۔ اودے سیاست نا چس 1970ء آن مست لگاسس، ہمو دے تیٹی خیر جان بلوچ بی ایس او نا لیڈر ئسکہ۔ ہرا کامریڈ فقیر محمد نا تربیت ءِ کرے، ناخوانندہ کامریڈ فقیر محمد ءِ خوانفے، لکھنگ ہیل تس، علم انا فائدہ و سیاست نا ابجد آن پہہ کرے۔

ہمو دے تیٹی کامریڈ فقیر محمد ہڑدے بلوچ اسٹوڈنٹس آرگنائزیشن نا دفتر آ بسکہ، دفتر ءِ جارو کریکہ، میز، کرسی و الماری تے سفا کریکہ۔ سفائی آن فارغ مسکہ تو قلم و کاپی اس ہرفیکہ، میز انا رہی والا کڑسی آ توسکہ، و کاپی آ لکھنگ نا پریکٹس کریکہ۔ خیر جان بلوچ نا بننگ تون او بش مسکہ، کتاب و کاپی ءِ دوٹی کریکہ۔ بھاز ادب اٹ اوڑا ہناکہ، کتاب ءِ ملنگ تون سبخ خواناکہ و پوسکن ءُ سبخ اس ہلککہ، و ولدا تینا کڑسی آ توسکہ، سبخ ءِ یات کریکہ۔ و کاپی آ پنسل اٹ لکھنگ نا پریکٹس کریکہ۔

وخت اتون اوار اوار خواننگ نا شوق و پوسکن آ علم انا دوئی کننگ نا است خواہی کامریڈ فقیر ءِ اسہ ناخوانندہ مزورکار اسے آن دانشور مزورکار اسے نا دروشم اٹ مون آ ایس۔ کامریڈ فقیر نا است و مزغ شوق سِخت اٹ ہیل کننگ نا خُو و طالب علم تنظیم، مزورکار ٹریڈ یونین و سیاسی تپہ غاتتون خڑکی نا سوب آن تہاری تیان پیش تمسا روشنا مسوسس۔ مزوکار تنظیم آتیٹی مزوردوست نظریہ نا پرچار نا سوب آن کامریڈ فقیر محمد مزورکار دانشور اسے نا وڑ اٹ مون آ بس و بھاز زُوت تینا سِخت و جہد انا سوب آن او ٹریڈ یونین نا صدر گچین مس۔ او پیداواری سسٹم اٹی پیداواری واکدار و پیداواری تعلقدار تا نیام اٹ تضاد آن پہہ ئس۔ سرمایہ دارانہ مارکیٹنگ و سرمایہ نا وجود نا بنداوی فلسفہ نا بھلا قدر آن بلد ئسکہ۔

مارکرز ایمپلائز یونین نا صدر جوڑ مننگ آن پد او مزوکار آتا جم فائدہ غاتے مون آ تخسا ملازم آتے کن آسودہی و زند انا گرج انا ایلو آسراتی تا فراوانی کن گام ہرفے۔

مارکر فیکٹری نا انتظامیہ نا کنڈ آن مزورکار آتا دا بنداوی و روا انگا خواست آتیا چکار کننگتو، تو ویل کرار کرار آ ودسا ہنا، و فیکٹری نا مزورکار آتا کنڈ آن برانزی جہد انا بنداو نا سوب جوڑ مس۔ کامریڈ فقیر محمد ہر مزورکار راہشون ئسکہ، او مزورکار آتا خواست آتے کن بین ہڑتال نا بناءِ کرے و داڑتون اوار فیکٹری نا مزورکار آتے ہڑتال نا کال تس۔ فیکٹری انتظامیہ مزورکار آتا برانز ءِ لتاڑ کننگ کن پولیس ڈیپارٹمنٹ تون رابطہ کرسا برانزی مزورکار آتے دزگیر کرفے۔ ہرافتے منہ دے سٹی تھانہ نا حوالات اٹی تخار، اوکان پد ڈسٹرکٹ جیل کوئٹہ جوڈیشنل کننگا۔ ہرا ڈسٹرکٹ جیل کوئٹہ ٹی نن تون بند ئسر۔

مارکر فیکٹری ٹی مزورکار آتا ہڑتال ءِ منہ وخت گدرینگا تو فیکٹری مزورکار آتا اسہ بشخ اس انتظامیہ نا دھڑکو و لیلاچ اٹ برسا فیکٹری مینجمنٹ نا مون آ سلہہ بٹے، و تینا دزگیر مزورکار ایلم و بین ہڑتال آ تولوک آ یونین نا صدر کامریڈ فقیر محمد آن تعلقداری ءِ کشکا۔ فیکٹری ولدا چلینگ نا بنا ءِ کرے۔ مزورکار ورکر آک بندی ئسر، و اوفتا راہشون کامریڈ فقیر محمد بین ہڑتال آ ئس۔

کامریڈ فقیر محمد نا بین ہڑتال نا منہ دے آن پد کامریڈ فقیر محمد نا لمہ مونی بس۔ او سہب اتون مہالو فیکٹری نا ملنگ آن مست بنگڑی نا منہ درزن ہرفے، فیکٹری نا گیٹ انا مون آ توس، ہرا مزورکار کہ کاریم کن فیکٹری نا تہٹی پترینگ کن بسکہ تو کامریڈ فقیر محمد نالمہ گیٹ آ فیکٹری ٹی پترینگ آن مست اونا دوٹی بنگڑی تے تسکہ، و فیکٹری نا تہٹی پترینگوک آ مزورکار کامریڈ فقیر محمد نا لمہ نا دو تیان بنگڑی تے ہلنگ آ شکی مسکہ، و فیکٹری نا تہٹی پترینگ انگ نا جاگہ غا اوڑتون اوار سلیسکہ۔

فیکٹری ٹی کاریم کروک آ کل مزورکار آک کامریڈ فقیر محمد نا لمہ نا جہد انا سوب آن پدی جہد اٹ اوار مسر، و تینا بین ہڑتال آ تولوک راہشون نا کیمپ اٹ ساڑی مسر۔ کامریڈ فقیر محمد نا لمہ نا مزورکار آتے غیرت ترفنگ نا دا حکمت عملی آن فیکٹری انتظامیہ ءِ مزورکار آتا خواست آتا مون آ گوڈ خلوئی تما، و اوفک مزورکار راہشون آتتون مذاکرات کن امنا کریر، و اوفتا خواست آتے منار۔

دا وڑ کامریڈ فقیر محمد نا لمہ نا جہد و حکمت عملی نا سوب آن مارکر فیکٹری نا مزورکار آتا ہڑتال سرسہب مس، و غٹ خواست آک امنا ہم کننگار۔ مزورکار ورکر آتیا خلنگوک کیس آک پدی ہلنگار، و بندی مزورکار آتے یلہ کننگا۔

مارکر فیکٹری نا دا مزورکار بندیک منہ وخت اس نن تون ڈسٹرکٹ جیل کوئٹہ ٹی بندی ئسر۔

ہفتئی تلار
تاک: 45
21-27 November, 2020
پنہ: 02