محمد رضوان ءِ انگلینڈ نا برخلاف اولیکو ٹی ٹوئنٹی میچ اٹی شاغنگ نا فیصلہ

ساؤتھمپٹن (مانیٹرنگ ڈیسک) محمد رضوان ءِ انگلینڈ نا برخلاف اولیکو ٹی ٹوئنٹی میچ اٹی شاغنگ نا فیصلہ، قومی ٹیم نا کیپٹن بابر اعظم یانزدہ انگا گوازی گر تا فیصلہ ءِ کرے، سیریز نا اولیکو میچ اینو مانچسٹر اٹ گوازی مریک۔ حوال نا رداٹ میڈیا رپورٹ آتے ٹی پاننگانے کہ پاکستان او انگلینڈ نا نیام اٹ اولیکو ٹی ٹوئنٹی میچ اکن کیپٹن بابر اعظم بھلو فیصلہ اس کرینے۔ ہندن پاننگ ءِ کہ کیپٹن بابر اعظم سیریز نا اولیکو ٹی ٹوئنٹی میچ اکن وکٹ کیپر گوازی گر محمد رضوان ءِ میچ اٹ شاغنگ نا فیصلہ کرینے۔ وخت اس کہ مسکوہی کیپٹن سرفراز احمد ءِ ٹیم اٹ پدی اتنگ کن داسہ پین انتظار کروئی مریک۔ ایلو کنڈ آ سیریز آن مُست صحافی تتون ہیت وگپ کرسا پاکستان ٹی 20 کیپٹن ٹیسٹ سیریز اٹ زیات اسکور کپننگ آ اُست ہسونی نا درشانی ءِ کرسا پارے کہ ”ای ہر وخت جوان وڑ اٹ گوازی کننگ نا کوشست کیوہ، ٹی 20 ٹی سنچری جوڑ کننگ کنا مسخت آتیان اسٹ اسے، او سہی پاو کنا مسخت دا سیریز اٹ سنچری اسکور کروئی ءِ۔ ٹیسٹ سیریز اٹ تینا بنا ءِ بھلو اسکور اسے اٹ بدل کپننگ آ اُست ہسونی اُٹ ولے ای دا ردی تیان ہیل کیوہ، ای بروک آ سیریز اٹ جوان مننگ کن دانا تجزیہ ءِ کرینٹ۔ بابراعظم شاداب خان او حیدر علی نا بابت ہیت وگپ کرسا پارے کہ بیٹنگ آرڈر ءِ جوان کننگ ک دافتے ہم ٹیم اٹ اوار کننگ کینہ وخت اس کہ اولیکو پوزیشن آ گوازی کننگ کن حیدر علی ءِ گچین کننگ المی سجفنہ۔ مستی او پارینے کہ شاداب پاکستان سپر لیگ (پی ایس ایل) اٹ بیٹنگ تون جوان فارم اس نشان تس۔ نن میچ انا حالیت نا رداٹ آرڈر آتیان کاریم ہلنگ نا کوشست کینہ۔ حیدر علی اسہ جوان او گچین ءُ گوازی گر اسے، نن اودے دا گروپ اٹ اوار کننگ نا کوشست کرینن۔