پاک انگلینڈ اولیکو ٹی 20 پِر آن زہمی مننگ نا گمان ارے
Get real time updates directly on you device, subscribe now.
مانچسٹر (مانیٹرنگ ڈیسک) پاک انگلینڈ اولیکو ٹی ٹوئنٹی پِر آن زہمی مننگ نا گمان ارے، مانچسٹر اٹ ہورہ گروک تون پِر انا پیشن گوئی، میچ پاکستانی وخت انا رداٹ نن نا 10 بجہ غا مریک۔ حوال نا رداٹ انگلینڈ او پاکستان نا کرکٹ ٹیم تا نیام اٹ مسہ جہانی ٹی 20 میچ آتا سیریز نا اولیکو میچ اینو اولڈ ٹریفورڈ، مانچسٹر اٹ مریک۔ دا میچ ڈے اینڈ نائٹ مریک۔ ہندن پاننگ ءِ کہ اولڈ ٹریفورڈ، مانچسٹر اٹ ہورہ گروک اٹ پِر انا پیش گوئی کننگانے ہرانا سوب آن میچ انا اڈ تننگ بھاز سخت خننگ انگ اٹی ءِ۔ پر سلے ولدا ہم 40 اوور نا میچ شاید ممکن مننگ کپک۔ داکان مست ہڑتوم آ ٹیم تا نیام اٹ مروک آ مسہ ٹیسٹ میچ آتا سیریز انگلینڈ 1-0 اٹ کٹانے۔ انگلینڈ پاکستان ءِ اولیکو ٹیسٹ میچ اٹ 3 وکٹ اٹ بے سہب کرینے داکان گُڈ ہڑتوم آ میچ آک ڈرا مسر۔ مسہ ٹی 20 میچ آتا سیریز اٹ پاکستان ٹیم نا کماشی ءِ بابر اعظم کیک وخت اس کہ مہماندار ٹیم آئن مورگن نا کماشی ٹی گراؤنڈ اٹ پترینگک۔ ہڑتوم آ ٹیم تا کیپٹنک سیریز اٹ سرسہبی کن بیان تسنو او گمان کننگ انگ ءِ کہ کرکٹ نا شیدائی تے سیریز اٹ سخت ءُ مقابلہ ہننگ کن ملک۔ یات سلے کہ ہڑتوم آ ٹیم تا نیام اٹ مسہ ٹی 20 میچ آتا سیریز نا ارٹمیکو میچ 30 اگست آ وخت اس کہ مسہ میچ آتا سیریز نا مسٹمیکو او گڈیکو ٹی 20 کرکٹ میچ یکم ستمبر آ مریک۔ ٹی ٹونٹی سیریز نا ہر مسٹ انگا میچ آک اولڈ ٹریفورڈ، مانچسٹر اٹ گوازی مریرہ۔ مسہ ٹی ٹونٹی میچ آتا سیریز نا اولیکو او مسٹمیکو میچ ڈے اینڈ نائٹ مریرہ وخت اس کہ ارٹمیکو ٹی ٹونٹی میچ مریک۔