آئی پی ایل‘ چنائی سپر لیگ نا 10 باسک انا کرونا ٹیسٹ مثبت بس
Get real time updates directly on you device, subscribe now.
چنائی (مانیٹرنگ ڈیسک) انڈین پریمیئر لیگ نا بنا ٹی کینسل مننگ نا جمر تفنگ اٹی ءِ، آئی پی ایل فرنچائز چنائی سپر کنگز تون گنڈوک اسہ بھارتی کرکٹ ٹیم نا اسہ گوازی اسے تون اوار دستہ ٹی اوار کم از کم 10 باسک انا کورونا وائرس ٹیسٹ مثبت بسنے۔ دا ہیت انا پک مننگ ہمو وخت آ مس ہراتم ٹیم ہوٹل اٹ سپر کنگز اسکواڈ او کمکار کمامدار آتا ٹیسٹ ءِ ہلنگا۔ آئی پی ایل نا کوویڈ 19 پروٹوکول نا رداٹ کل ٹیم تے متحدہ عرب امارات اٹ لینڈنگ آن پد ہوائی اڈہ ٹی ٹیسٹ کروئی ئس، اوکان پد ٹیم ہوٹل اٹ شش دے انا وخت نا بابت المی وڑ اٹ یکم، 3 او 5 دے انا مسہ ٹیسٹ کرفنگاسُس۔ سپر کنگز دستہ نا مثبت نتیجہ غاک مسٹمیکو دور نا ٹیسٹ آن ئس ہرا 5 میکو دے کننگاسُس۔ چنائی سپر کنگز داسہ ٹیم ہوٹل اٹ تینا قرنطینہ نا کچ اٹ ودکی کرینو۔ او تینا ٹریننگ سیشن تا بنا ءِ رد کرینے ہرا جمعہ آ بنا مسکہ انتئے کہ اسکواڈ 21 اگست آ دبئی ءِ سر مسوسُس۔ یات سلے کہ بھارتی کرکٹ بورڈ نا کنڈآن انڈین پریمیر لیگ (آئی پی ایل) نا 13 میکو ایڈیشن متحدہ عرب امارات اٹ 19 ستمبر آن بنا مریک، انڈین پریمیر لیگ نا فائنل تون اوار کل میچ آک یو اے ای نا 3 ہند دبئی، شارجہ او ابوظہبی ٹی مریرہ، لیگ انا فائنل میچ 10 نومبر آ مریک او لیگ اٹ فائنل تون اوار 53 میچ مریرہ۔ ٹورنامنٹ انتظامیہ نا کندآن دا ایونٹ اینخو 29 مارچ آن بھارت اٹ شیڈول ئس ولے جہانی دَین کورونا وائرس نا سوب آن 15 اپریل اسکان کینسل کننگاسُس۔ ہندوستانی وزیر اعظم نریندر مودی نا 14 اپریل آ دا پڑو آن پد کہ بھارت اٹ لاک ڈاون کم از کم 3 مئی 2020ء اسکان برجا سلک۔ بی سی سی آئی ٹورنامنٹ ءِ معطل کروئی تما۔ 2 اگست 2020ء آ دا ہیت ءِ پک کریر کہ دا ٹورنامنٹ 19 ستمبر آن 10 نومبر 2020ء نا نیام اٹ متحدہ عرب امارات اٹ مریک۔