کرونا وائرس آن بچفنگ کن احتیاطی تدبیر آت ابابت آگہی کن پمفلٹ بشخنگا

نوشکے (تلار حوالکار) کرونا وائرس آن بچفنگ کن احتیاطی تدبیر تا بابت آگاہی تننگ کن راجی تنظیم بولان ٹیکوانڈو اینڈ بولان یوتھ ویلفیئر آرگنائزیشن محکمہ جانجوڑی نوشکے نا اواری اٹ شار انا کیہی شاہراہ تیا پمفلٹ بشخا ہراٹی کرونا وائرس آن بچنگ کن احتیاطی تدبیر تا کلہو آک نوشتہ ئسر، بولان ٹیکوانڈو انسٹی ٹیوٹ نا رضاکار و محکمہ جانجوڑی نا افسر آک سردار اسداللہ روڈ، جناح روڈ مسجد روڈ، انام بوستان چوک، ایرانی بازار، امین الدین روڈ وایلو شاہراہ تیا ساڑی ہوٹل، شاپنگ مال، حمام، ٹیلر، فوٹو کاپیئر، بیکری، شوروم، میڈیکل، آٹوز، بینک وایلو ہند آتیا اسہ ہزار آن زیات پمفلٹ بشخار۔ دا وخت آ ڈسٹرکٹ ہیلتھ آفیسر صاحبزادہ ڈاکٹر فرید احمد و صدر بولان ٹیکوانڈو اینڈ بولان یوتھ ویلفیئر آرگنائزیشن حاجی طیب یلانزئی الس ءِ کرونا وائرس آن بچنگ کن احتیاطی تدبیر تیا عمل کننگ و دا کلہو ءِ اُراتسکان سر کننگ نا پارت کرے۔ او ایلو راجی تنظیم تیان خواست کرے کہ او ہم بولان ٹیکوانڈو انسٹی ٹیوٹ نا رضاکار آتیانبار آگاہی مہم اٹ بشخ ہلیر تاکہ زیات آن زیات بندغ آتیان دا کلہو سر مننگ کے و ننا ملک و صوبہ دا وائرس آن بچنگ کے۔ سول ہسپتال نوشکے نا میڈیکل سپرنٹنڈنٹ ڈاکٹر ظفراللہ مینگل،چیف انسٹرکٹر بولان ٹیکوانڈو عبدالستار بلوچ، کرونا وائرس نا اسپرے انچارج ریاض علی سی پی ڈی نا ضلعی صدر حاجی سعید بلوچ و بولان ٹیکوانڈو نا رضاکار آتا جتا جتا ٹیمک ڈور ٹو ڈور پمفلٹ بشخار۔ بولان ٹیکوانڈو نا رضاکار آک آگاہی مہم نا رد اٹ شار اٹ اناﺅنس منٹ کیرہ و ہوٹل آتے ٹی ڈسپوزیبل کپ بشخ وپانٹ کیرہ۔