سرکاری ادارہ غاتا بھرمی کارکڑد اٹ کلریکل اسٹاف نا کڑد اہم مریک،نسیم الرحمان خان

کوئٹہ، صوبائی سلاہکار ماحولیات و موسمیاتی تبدیلی نسیم الرحمن خان ملاخیل پارینے کہ سرکاری ادارہ غاتا بھرمی کارکڑد و الس ءِ گچین خذمت آتا فراوانی اٹی کلریکل اسٹاف نا کڑد بنداوی اہمیت تخک۔ کلرک آک سرکاری نظام نا اہم ءُ بشخ اسے ءُ و دفتری باندات آتا سر تننگ، ریکارڈ نا چاروکی و انتظامی باندات آتے گچین وڑ اٹ اتنگ اٹی اوفتا خذمت آک ستا کڑزرہ۔ دا خیال آتا درشانی ءِ او آل پاکستان کلریکس ایسوسی ایشن (ایپکا) بلوچستان نا کنڈآن اڈ ہلوک سوغندی دود آن خاص انگا مہمان نا وڑ اٹ تران کرسا کرے۔ دود اٹی سیکرٹری ماحولیات نور احمد پرکانی، ڈی جی ماحولیات ظہور احمد بلوچ و آل پاکستان کلریکس ایسوسی ایشن نا صوبائی عہدیدار و ماحولیات یونٹ نا پوسکن گچین مروک آ کابینہ تون اوار افسر و کارندہ غاک بشخ ہلکر۔ صوبائی مشیر پوسکن گچین مروک عہدیدار آتے مبارکبادی ترسا پارے کہ تنظیم اسے نا اصل واکداری اونا سیوت، نظم و ضبط و اسیجائی جہد اٹی اودیم مریک۔ اومیت ءِ کہ پوسکن گچین مروک آ کابینہ ملازم آتا آسودہی، روا انگا ویل آتا ایسری و اوفتا حق آتا رکھ اکن مثبت و تعمیری کڑد ادا کیک‘ او پارے کہ سرکاری ملازم آک السی خذمت نا نظام اٹی مُخ انا ملی نا حیثیت تخرہ۔ اوفتا کسبی لائخی‘ خواری و احساسِ زمواری ءِ امنا کننگ و اوفتے گچین چاگڑد فراوان کننگ وخت انا اہم ءُ گرج اسے۔ صوبائی سلاہکار پارے کہ ملازم آک بایدے تینا زمواری تے ایمانداری، خواری و زمواری نا احساسِ اٹ سر ایتر تاکہ الس ءِ سرکاری ادارہ غاتیان گچین آسراتیک دوئی مریر۔ صوبائی سلاہکار نسیم الرحمن ملاخیل مستی پارے کہ حکومت بلوچستان صوبہ ٹی ادارہ غاتا گچینی‘ انتظامی جوانی و السی خذمت آتا آب ءِ بڑز کننگ کن گام گیج کننگ اٹی ءِ، ہراٹی سرکاری ملازم آتا کمک بھاز اہم ءِ۔