فرنٹیئر ورکس آرگنائزیشن نا کاریمک و کارکڑد ستا کڑزک،میر علی حسن زہری

کوئٹہ، پیپلز پارٹی نا بنجائی راہشون مسکوہی صوبائی وزیر میر علی حسن زہری نا اعزاز اٹ شیخ ابراہیم گوٹھ اٹ اسہ بھلو السی جلسہ اس اڈ تننگا ہراٹی ہزار آ بندغ آک بشخ ہلسا جم وجوش نا درشانی ءِ کریر۔ جلسہ غان تران کرسا میر علی حسن زہری جم وجوش اٹ بیابخیری و مہرومریبت آ کونسلر اسد شیخ، یوسف شیخ و علاقہ والا تا منت واری ءِ ہرفے۔ او پارے کہ حب اٹ برجاشونداری ڈٹ آتا دنگ ءِ پین ودفنگک و شار اتون کیبی علاقہ غاتے ہم شونداری نا بھرم تیان فائدہ تننگک۔ او پارے کہ کیہی دہائی تا پسماندگی نا چٹفنگ کن تعلیم، سفا انگا دیر‘ سڑک و ایلو بنداوی آسراتی تا فراوانی آ خاص چکار کننگ انگ ءِ۔ او فرنٹیئر ورکس آرگنائزیشن (ایف ڈبلیو او) نا کارکڑد نا ستاءِ کرسا پارے کہ ادارہ کوئٹہ کراچی شاہراہ تون اوار اہم تفوئی ڈٹ آتیا کاریم کننگ ءِ، دا ڈٹ آتا پوروی آن سفر نا آسراتی گچین مننگ تون اوار واپاری سرجزآتے مونی دننگک و بلوچستان نا جتا جتا علاقہ غاتا نیام اٹ رابطہ پین سوگو مریک۔ حب اٹ دِیر انا کاختی ءِ اسہ اہم السی ویل اس گوندسا او پارے کہ دا متکن آ ویل انا ایسری کن تعلقدار کمامدارآتتون رابطہ برجاءِ و دِیر انا فراوانی ءِ گچین جوڑ کننگ کن عملی گام گیج آتا کوشست کننگ انگ ءِ تانکہ شاری تے مون تروک مشکل آتا چٹفنگ پک مننگ کے۔ او پارے کہ صدر مملکت آصف علی زرداری نا بلوچستان نا شونداری و السی ویل آتا ایسری نا بابت وژن و قول آتے عملی دروشم تننگ کن گام گیج برجاءِ۔ او پارے کہ پیپلز پارٹی نا سیاست نا وَت السی خذمت ءِ و حب اتون اوار مچ آ علاقہ ٹی شونداری ڈٹ آتا کمک اٹ الس ءِ گچین آسراتی فراوان کننگ ننا زمواری ءِ۔ میر علی حسن زہری دا ارادگی نا درشانی ءِ کرے کہ حب و اونا کیبی علاقہ غاتیٹی شونداری سرجزآتے پین ترند، السی ویل آتا ایسری ءِ مقدم تخنگک و علاقہ نا شونداری و شونہالی کن کل دوئی وسیلہ غاتے کاریم اٹ اتنگ نا کوشست برجا سلک۔