ڈیجیٹل سروس ڈلیوری پوسکن آ حکمرانی نا اہم ءُ وڑ اسے،ڈاکٹر ربابہ خان بلیدی

کوئٹہ، بلوچستان نا وزیر اعلیٰ نا سلاہکار زالبول شونداری ڈاکٹر ربابہ خان بلیدی پارینے کہ ڈیجیٹل سروس ڈلیوری پوسکن حکمرانی ناوڑ انا بنداوی خواست ءِ، ہرانا کمک اٹ سرکاری خذمت آتا فراوانی ٹی شفافیت، ترندی و گچینی اتنگ تون السی مشکل آتیٹی کمتی و سرکاری ادارہ غاتیا شاری تا پت ءِ سوگو کننگ مریک۔ بلوچستان کون آ بھلا رقبہ و مرمر انگاآبادی تیا تالان صوبہ ٹی پوسکن ٹیکنالوجی و ڈیجیٹل نظام نا مونی دننگ خصوصی اہمیت تخک، انتئے کہ دانا کمک اٹ سرکاری خذمت آتے الس نا درگہ اسکان سر کننگ، دفتری ول ویچڑی تے ٹی کمتی و جتا جتا محکمہ غاتا نیام اٹ رابطہ کاری ءِ گچین کننگ اٹی کمک رسینگ کیک۔ دا خیال آتا درشانی ءِ او بلوچستان سول سروسز اکیڈمی ٹی ڈیجیٹل سروس ڈلیوری نا سرحال آ اڈ ہلوک بنجائی ورکشاپ آن تران کرسا کرے۔ ڈاکٹر ربابہ خان بلیدی پارے کہ ڈیجیٹل گورننس بیرہ ٹیکنالوجی نا کاریم اٹ اتنگ نا پن اف بلکن سرکاری نظام اٹی اصلاحات، شفافیت، پرسجو و السی گرج آتا رداٹ خذمت آتا فراوانی نا اسہ جوان ءُ وڑوڈول اسے۔ ساڑی دور ڈیٹا و پوسکن ٹیکنالوجی نا دور ءِ، ہندا سوب آن سرکاری افسر آتیکن المی ءِ کہ او پوسکن انتظامی چاہنداری‘ ڈیجیٹل گورننس و آرٹیفیشل انٹیلیجنس نا کاریم اٹ اتنگ نا بابت تینا کاریم نا کچ اٹی پدریسہ ودکی کیر تانکہ سرکاری باندات آتے زیات گچین، ترند و الس دوست جوڑ کننگ مرے۔ او پارینے کہ حکومت بلوچستان سرکاری باندات آتا ڈیجیٹلائزیشن و السی خذمت آتا نظام ءِ پوسکنوڑ تتون ہم گرنچ کننگ کن گام گیج کننگ ءِ۔ ڈیجیٹل سروس آتا مونی دننگ آن الس و سرکاری ادارہ غاتا نیام اٹ ساڑی مُری ءِ کم کننگ مریک، وخت اس کہ جتا جتا محکمہ غاتا روایتی وڑوڈول ءِ پوسکن آ خواست آتتون ہم گرنچ کرسا شاری تے وخت آ ریلیف فراوان کننگ مننگ کیک‘ او دا ہیت آ ہم زور شاغاکہ ڈیجیٹل آسراتی تا ڈٹ بندی و فراوانی ٹی زالبول آتا گرج آتے خصوصی اہمیت تننگے تانکہ اوفتے جان جوڑی، تعلیم، راجی رکھ و ایلو بنداوی سرکاری خذمت اسکان آسان رسینگ دوئی مرے و خاص وڑ اٹ مرمرانگا علاقہ غاتیٹی رہینگوک زالبول آتے مون تروک مشکل آتیٹی کمتی اتنگ مرے۔ صوبائی سلاہکار بلوچستان سول سروسز اکیڈمی نا خذمت آتا ستاءِ کرسا پارینے کہ اکیڈمی سرکاری افسر آتا کسبی ہیلکاری‘ انتظامی کاریم نا کچ اٹی ودکی و حکمرانی نا پوسکنوڑ خواست آتیان معلومدار کرفنگ کن اہم کڑد ادا کننگ اٹی ءِ۔ او ڈائریکٹر جنرل بلوچستان سول سروسز اکیڈمی حفیظ جمالی نا کوشست آتا ہم ستاءِ کرے وپارے کہ افسر آتا ہیلکاری‘ پوسکن انتظامی چاہنداری تا مونی دننگ و ادارہ ئی اصلاحات نا بابت ہیلکاری سرجزآک سفت نا قابل ءُ۔ او اومیت درشان کرے کہ اکیڈمی آخبت اٹی ہم ڈیجیٹل گورننس، پوسکن ٹیکنالوجی و گچین السی خذمت نا بابت تینا ہیلکاری سرجزآتے برجاتخک۔ یات سلے کہ بلوچستان سول سروسز اکیڈمی اکاؤنٹیبلٹی لیب پاکستان نا شریداری اٹ صوبائی محکمہ غاتا 30 سرکاری افسر آتے کن ڈیجیٹل گورننس نا سرحال آ مسہ دے ئی ہیلکاری کورس اسے نابناءِ کرے، ہیلکاری پروگرام نا مسخت سرکاری باندات اٹ آرٹیفیشل انٹیلیجنس، ڈیجیٹل گورننس ٹولز و ری ڈیزائن تھنکنگ نا گچین کاریم اٹ اتنگ نا کمک اٹ سرکاری ادارہ غاتا کارکڑد ءِ گچین کننگ و الس ءِ وخت آ و آب اٹ خذمت آتا فراوانی ءِ پک کننگ ئس۔ ورکشاپ اٹی شریدارا فسر آتے پوسکن ڈیجیٹل وڑوڈول و سرکاری باندات اٹی ٹیکنالوجی نا عملی کاریم اٹ اتنگ نا بابت ہیلکاری تننگا۔