السی ویل آتا ایسری کن سرکاری افسرآک تینا زمواری تے پورو کیر، شکیل قادر خان

کوئٹہ، چیف سیکرٹری بلوچستان شکیل قادر خان پارینے کہ صوبائی حکومت الس نا آسودہی، کل بنداوی آسراتی تا فراوانی و زند انا آب اٹ پین جوانی کن دوئی وسیلہ غاتے ٹی پدریسہ کاریم کننگ اٹی ءِ‘ او زور شاغا کہ سرکاری افسر آک السی ویل آتا ایسری ءِ تینا جندی زمواری سرپند مریر، شفافیت و احساسِ زمواری اٹ زمواری تے سر ایتر و ضلعی کہول آ حکومتی گام گیج تا بھرم تے الس اسکان رسیفر۔ او پارے کہ شونداری، اڑزان گڑا تا دوئی مننگ و السی غاو تا دمدستی ایسری صوبائی حکومت نا اولیکو اولیت آتیٹی اوار ءِ۔ دا خیال آتا درشانی ءِ او ڈپٹی کمشنرز کانفرنس آن تران کرسا کرے۔ کانفرنس اٹی شونداری ڈٹ آتا ترندی‘ کنوئی گڑا تا نہاد آتا مانیٹرنگ، کانود آن چَپ رہینگوک آتا پدی رہی کننگ‘ غاو دیوان اڈتننگ و لوکل کونسل آتیٹی سفائی نا حالیت تون اوار اہم السی باندات آتا جم جاچ ءِ ہلنگا۔ دیوان ءِ بریفنگ اٹی پاننگا کہ مانیٹرنگ اینڈ ایویلیوایشن سیکشن کل 2ہزار935 شونداری ڈٹ آتیان 2ہزار632 ڈٹ آتا دورہ ءِ کرینے، ہرافتیان 90 درسَد ڈٹ آک پورو مسنو۔ ہندا وڑ بلوچستان اسپیشل ڈویلپمنٹ انیشی ایٹو (بی ایس ڈی آئی) نا ہرمسٹ آ ریسہ غاتیٹی کل 4ہزار63 ڈٹ آتا منظوری تننگاسس، ہرافتیان 2ہزار181 ڈٹ پوروی نا ریسہ ٹی ءُ۔