تینا اُرا اسکیم آن ہاؤسنگ و تفوئی بشخ اتون گنڈوک صنعت آک شون ہلیرہ،وزیراعظم محمد شہباز شریف

اسلام آباد، وزیراعظم محمد شہباز شریف پارینے کہ تینا اُرا اسکیم آن ہاؤسنگ و تفوئی بشخ اتون گنڈوک کیہی صنعت آتے شون رسینگک‘ چنکا و نیامی کہول انا کاروبار، ہاؤسنگ و کشت وکشار بشخ انا شونداری آن زرگزران اٹی گچینی و ورنا تے روزگار فراوان کننگ حکومت نا اولیکو اولیت ءِ‘ او وزیرِ خزانہ ءِ ایس ایم ای سیکٹر، کشت وکشار و ہاؤسنگ نا بشخ نا اسٹیک ہولڈر فنانسنگ تون تعلقدار ویل آتے ایسر کننگ و جم حکمت عملی جوڑ کننگ نا پارت کرینے۔ وزیراعظم محمد شہباز شریف نا کماشی ٹی اولیتی بشخ آتے وام تا فراوانی ٹی آسانی ودی کننگ نا جاچ دیوان اسلام آباد اٹی اڈ ہلک۔ دیوان آن تران کرسا وزیراعظم پارے کہ ہمو بینک ہرافک کشت وکشار‘ ہاؤسنگ و چنکا و نیامی کچ انا کاروبار آتے حکومتی گام گیج آتا رد اٹ وام تا اڑزان فراوانی ٹی گچین کارکڑد نشان تننگ اٹی ءُ، ستا کڑزرہ، حکومتی گام گیج آتا رد اٹ کشارگر، چنکا و نیامی کہول انا کاروبار و وزیراعظم تینا اُرا اسکیم اٹی صارف آتے وام تا فراوانی ٹی سستی کروک بینک آتتون اسٹیٹ بینک و وزارتِ خزانہ نا کنڈ آن ہچ وڑ انا رعایت کننگپ۔ وزیراعظم پارے کہ پرائیویٹ بشخ انا شونداری کن بینک آک بھاز اہم مریرہ‘ بینک آتا کنڈ آن اولیتی بشخ آتیکن وام تا فراوانی ٹی ہندا وڑ انا کمکاری نا اومیت کننگک‘ ہراوڑ انا کمکاری حکومت و حکومتی ادارہ غاک بینک آتتون کیرہ۔ چنکا و نیامی کہول انا کاروبار زرگزران نا شونداری، برآمد نا شون تننگ و روزگار نا وارخواہی ودی کننگ نا پبی واکداری تخرہ۔ او پارے کہ کشت وکشار نا بشخ ملکی زرگزران نا تمبہ نا حیثیت تخک، کشاری جنس آتا ویلیو ایڈیشن آن برآمد اٹی ودکی کن کوشست کننگ اٹی اُن، تینا اُرا اسکیم آن ہاؤسنگ و تعمیرات نا بشخ اتون گنڈوک کیہی صنعت آتے شون رسینگک‘ وزیراعظم وزیرِ خزانہ ءِ ایس ایم ای سیکٹر، کشت وکشار و ہاؤسنگ نا بشخ انا اسٹیک ہولڈر فنانسنگ تون تعلقدار ویل آتے ایسر کننگ و جم حکمت عملی جوڑ کننگ نا پارت کرے۔ او اسٹیٹ بینک و ایف بی آر ءِ اوار مرسا چنکا و نیامی کہول انا کاروبار و برآمد کروک آتا خراج نا ویل آتے ایسر کننگ و چنکا و نیامی کہول انا کاروبار تے وام تا آسان فراوانی کن رسک کوریج نا ہم جم حکمت عملی جوڑ کننگ نا پارت کرے۔ دیوان ءِ بریفنگ اٹی پاننگا کہ اولیتی بشخ آتے وام تا فراوانی ءِ ودفنگ کن اسٹیٹ بینک مسہ بنداوی تمبہ غاتیا کاریم کننگ اٹی ءِ‘ ہرافتے ٹی ضابطہ غاتیٹی گچینی‘ حکومت و بینک آتا نیام اٹی رسک و خڑچ آتیٹی شریداری و ڈیجیٹل آسراتی تا شون تننگ اوار ءُ۔ دا رد اٹ داسہ انا ایس ایم ایز کن ایس ایم ای کنیکٹ ڈیجیٹل پورٹل (smeconnect.sbp.org.pk) نا بنا کننگانے، ہرانا کمک اٹ کاروباری بندغ آک وام دوئی کننگ کن درخواست تننگ کیرہ و تینا درخواست آتا پیشرفت ءِ ہم خننگ کیرہ۔ دیوان ءِ بریفنگ اٹی پاننگا کہ اسٹیٹ بینک آف پاکستان نا کنڈ آن ہاؤسنگ، کشت وکشار‘ و چنکا و نیامی کہول انا کاروباری ادارہ غاتے اولیتی بنداو تیا وام تا فراوانی کن نمان پیشرفت مسنے۔ 23 اکتوبر 2026ء اسکان وزیراعظم تینا اُرا پروگرام نا رد اٹ 511 ارب روپئی نا وام تا منظوری تننگانے، وخت اس کہ 86 ہزار 899 وام تا منظوری تننگانے، وخت اس کہ 15 ہزار 584 درخواست تروک آتے 91 ارب روپئی نا وام جاری کننگانے۔