پاکستان اٹ اولیکو وار کلر گریڈنگ نا پوسکن وڑ ہیلکاری فراوان کننگک،عطاء اللہ تارڑ

اسلام آباد، بنجائی وزیر حوالکاری و شینکاری عطاء اللہ تارڑ پی ٹی وی اکیڈمی ءِ پوسکن آ خواست آتتون ہم گرنچ ہیلکاری جاگہ اس جوڑ کننگ و ورنا تے فلم، راگ و ڈیجیٹل مواد نا جوڑ کننگ اٹ کسبی ہیلکاری تننگ کن جوان ءُ حکمت عملی اس تینائی کننگ نا پارت کرسا پارینے کہ پاکستان اٹ اولیکو وار کلر گریڈنگ نا پوسکن ہیلکاری فراوان کننگک، ہراڑان فلم انڈسٹری و پرائیویٹ بشخ ہم فائدہ ہرفنگ کیرہ، پی ٹی وی اکیڈمی ءِ پوسکن آ خواست آتا رداٹ اسہ گچین و مالی وڑاٹ مدامگی ہیلکاری ادارہ اس جوڑ کننگک۔ دا خیال آتا درشانی ءِ او پی ٹی وی اکیڈمی نا بحالی کن بڑزکو کہول انا دیوان نا کماشی ءِ کرسا کرے۔ بنجائی سیکرٹری حوالکاری اشفاق احمد خلیل تون اوار وزارت حوالکاری نا سینئر کمامدارآک ہم دیوان اٹی ساڑی ئسر۔ دیوان اٹی پی ٹی وی راگ اینڈ فلم اکیڈمی نا بحالی، پی ٹی وی ہوم نا ری ویمپنگ کن ہیلکاری پروگرام، پوسکن تکنیکی آسراتی و عملی ہیلکاری آ تالان چندی ماڈل آتا جاچ ءِ ہلنگا۔ دیوان اٹی پرائیویٹ بشخ انا شریداری اٹ پی ٹی وی راگ اینڈ فلم اکیڈمی کن چندی ہیلکاری ماڈل پیش کننگا ہرافتا مسخت ورنا تے عملی ہیلکاری تننگ تون اوار اوار پی ٹی وی کن کٹیانا پوسکن ءُ وڑ ودی کننگ ءِ۔ دیوان اٹی اکیڈمی کن پوسکن کلاس روم و اسٹوڈیو لیب جوڑ کننگ، طالب علم آتے کن ورک اسٹیشن آتا تنصیب، تکنیکی کارندہ و ٹرینرز آتا تعیناتی و نصاب نا جوڑ کننگ نا بابت باندات آتا ہم جاچ ءِ ہلنگا۔ دیوان اٹ ہیت کرسا بنجائی وزیر حوالکاری پارے کہ پی ٹی وی راگ اینڈ فلم اکیڈمی نا بحالی و پی ٹی وی ہوم نا ری ویمپنگ حکومت نا میڈیا و تخلیقی صنعت آتا مونی دننگ نا ارادگی انا بشخ ءِ۔ او پارے کہ پاکستان اٹ اولیکو وار کلر گریڈنگ نا پوسکن ہیلکاری تننگ نا پروگرام نابناءِ کننگ انگ ءِ۔ داکان مست دا بشخ اٹی ہیلکاری و پوسکن آسراتی تا دوئی کننگ کن پیشن نا ملک آتیا ہنوئی تماکہ۔ او پارے کہ کلر گریڈنگ نا آسراتی پاکستان اٹ دوئی مننگ آن فلم انڈسٹری و پرائیویٹ بشخ ءِ پوسکن تکنیکی ہیلکاری و آسراتی دُوبریک وخت اس کہ ہندی کہول آ فلم جوڑ کننگ نا آب ءِ گچین کننگ اٹ ہم کمک رسینگک۔ عطاء اللہ تارڑ پارے کہ پرائیویٹ بشخ انا شریداری اٹ آن شفاف و عملی پائلٹ پراجیکٹ نابناءِ کننگک تانکہ ہیلکاری پروگرام تے صنعت نا گرج آتتون ہم گرنچ کننگ مرے۔ او پارے کہ پی ٹی وی اکیڈمی ءِ پوسکن آخواست آتا رداٹ فعال و گچین ہیلکاری ادارہ جوڑ کننگ کن کل المی گام گیج آتے کننگک۔ او پارے کہ ورنا تے فلم، راگ، ایڈیٹنگ، کلر گریڈنگ و ڈیجیٹل مواد آتا جوڑ کننگ اٹ عملی ہیلکاری تننگ ننا اولیت آتیٹی اوار ءِ۔ اکیڈمی ٹی پوسکن ایڈیٹنگ سوٹس، اسٹوڈیو لیب و تکنیکی ازباب آتا کمک اٹ طالب علم آتے کسبی چاگڑداٹی ہیلکاری فراوان کننگک۔ او پارے کہ ہیلکاری پروگرام تیٹی تھیوری تون اوار عملی کاریم، پراجیکٹ جوڑ کننگ و پورٹ فولیو نا جوڑ کننگ آہم خاص چکار کننگک۔ او پارے کہ پی ٹی وی نیوز، پی ٹی وی ہوم و پاکستان ٹیلی ویژن کن ورنا تا تخلیقی پراجیکٹ آتا است بڈی ءِ کننگک، دا گام گیج آتیان پاکستان نا فلم و راگ انڈسٹری ءِ پوسکن تکنیکی ہیلکاری‘ ہنرمند ہیومن ریسورس و ہندی آسراتی تا فراوانی ٹی کمک رسینگک۔ بنجائی وزیرپارے کہ پی ٹی وی اکیڈمی ءِ اسہ گچین ہیلکاری جاگہ اس جوڑ کننگ تون مالی وڑاٹ مدامگی ادارہ اس جوڑ کننگ کن ہم گام گیج کننگک۔