پاکستان تینا ساڑی یورو بانڈ وام تا ٹوکنائزیشن نا جاچ ءِ ہلنگ ءِ،سینیٹر محمد اورنگزیب

اسلام آباد، بنجائی وزیر خزانہ و بنگکاری سینیٹر محمد اورنگزیب پارینے کہ پاکستان تینا ساڑی یورو بانڈ وام تا ٹوکنائزیشن نا جاچ ءِ ہلنگ ءِ و دا رد اٹ سلاہ ومشورہ برجا ءِ، برجامالی سال زرراہی تس 44 ارب ڈالر آن گدرینگ انگ نا اومیت ءِ، بینک آتے تینا سائبر سیکورٹی نظام ءِ گچین کننگ و اسٹیٹ بینک اتون اواری اٹ مون آ برسا خطرہ غاتتون مون تننگ کن گام گیج کروئی مریک۔ اوداہیت ءِ دوشنبے نادے آ پاکستان بینکس ایسوسی ایشن نا کنڈآن ”ڈیجیٹل میرات آتیا گپ وتران و آخبت نا بینکاری“نا سرحال آ اڈ ہلوک دودآن ورچوئل تران کرسا کرے۔ وزیر خزانہ پارے کہ پاکستان ءِ ہندن ءُ مالیاتی پوسکنوڑی نا گرج ءِ ہرا کاروبار کننگ نا خڑچ ءِ کم کننگ و زیات آن زیات مخلوق ءِ باضابطہ زرگزران نا بشخ جوڑ کننگ اٹ کمک ایتے، ڈیجیٹل میرات آتے ہم مالیاتی نظام اٹ تینا فائدہ ءِ حقی زرگزرانی بھرم تا کمک اٹ پک کروئی مریک۔ او پارے کہ روشن ڈیجیٹل اکاؤنٹ و زرراہی تس نا بشخ ٹوکنائزیشن نا اہم گمانی کاریم اٹ اتنگ آتیٹی اوار ءِ، برجامالی سال نا اولیکو سہ ماہی حساب وکتاب است بڈی ناسوب ءِ اومیت ءِ کہ مالی سال انا اخیر آ زرراہی تس نا جم کچ 44 ارب ڈالر آن ودنگ کیک۔ وزیر خزانہ پارے کہ پاکستان داوخت آ زرگزرانی سوگوی آن مدامگی شونداری نا کنڈ آ ہِننگ ءِ ہراڑکن مالیاتی نظم و ضبط ءِ برجا تخنگ، برآمد آتے ودفنگ و پرائیویٹ زرکاری ءِ مونی دننگ نا گرج ءِ، مالیاتی نظام ءِ زیات آن زیات مخلوق اسکان رسینگ تننگ و کاروباری ادارہ غاتے گچین خذمت فراوان کننگ اٹ ڈیجیٹل پوسکنوڑ اہم کڑداس کننگ کیک۔ او پارے کہ جے پی مورگن ادارہ ئی صارف آتے کن بلاک چین نیٹ ورک آتیازر آتا گدریفنگ اٹ ڈپازٹ ٹوکن آتے کاریم اٹ اتنگ ءِ وخت اس کہ جہانی تصفیہ جات بی آئی ایس نا ڈٹ پراجیکٹ آگورا ہم ٹوکنائزڈ کمرشل بینک ڈپازٹ و بنجائی بینک انا کوڑی تاکمک اٹ سیم آن ایپار زرتس تے گچین کننگ نا گمان آتا جاچ ءِ ہلنگ ءِ۔