کیچ اٹی برجا کل شونداری ڈٹ آتے پک کروک وخت آ پورو کننگے،میر ظہور احمد بلیدی

تربت، صوبائی وزیر ڈٹ بندی و شونداری میر ظہور احمد بلیدی تون ڈپٹی کمشنر کیچ یاسر اقبال دشتی تینا دفتر اٹی اوڑدہی کرے، ہراٹی ضلع کیچ انا جم شونداری باندات و السی آسودہی تون تعلقدار ڈٹ آتیا جم گپ وتران کننگا۔ اوڑدہی نا وخت آ ضلع ٹی برجا شونداری اسکیم، پوسکن آ ڈٹ و جتا بشخ آتیٹی مروک پیشرفت نا جاچ ءِ ہلنگا۔ دا وخت آ شونداری ڈٹ آتا وخت آ پوروی و اوفتیا عملدرآمد تون تعلقدار باندات ہم آ شرہ مس۔ ڈپٹی کمشنر کیچ یاسر اقبال دشتی صوبائی وزیر ءِ ضلع ٹی برجا شونداری ڈٹ آتا بابت جم بریفنگ تس و کیہی اسکیم آتیا مروک پیشرفت، مون تروک ویل آتیا و اوفتا ایسری کن کروک گام گیج آتیان آگاہ کرے۔ داوخت آ صوبائی وزیر میر ظہور احمد بلیدی پارت کرسا پارے کہ ضلع کیچ اٹی برجا کل شونداری ڈٹ آتے پک کروک وخت اٹ پورو کننگ کن گچین گام گیج کننگے۔ او ڈٹ آتا آب‘ شفافیت و تفوئی کاریم تا چاروکی آ خصوصی چکار کننگ نا گرج آ زور شاغا تاکہ الس ءِ شونداری ڈٹ آتا بھرم آک وخت آ دوئی مریر۔ ڈپٹی کمشنر کیچ یاسر اقبال دشتی صوبائی وزیر ءِ باور کرفے کہ ضلع ٹی برجا کل شونداری ڈٹ آتا گچین چاروکی کننگ انگ ءِ و اوفتا وخت آ پوروی تون اوار آب و شفافیت ءِ پک کننگ کن کل دوئی وسیلہ غاتے کاریم اٹ اتنگ انگ ءِ‘ او پارے کہ شونداری ڈٹ آتیا عملدرآمد اٹی ہچ وڑ انا ڈیوالئی یا بے پرواہی سگنگ مفک۔