خوانوک و لائخ آ ورناک پاکستان نا روشنا آخبت نا ٹہیفوک آک ءُ،ڈپٹی چیئرمین سینٹ

اسلام آباد، ڈپٹی چیئرمین سینٹ سیدال خان ناصر پارینے کہ تعلیم قوم اسے ناشونداری، شونہالی و زرگزرانی سوگوی نا بنداوی ضمانت ءِ، وخت اس کہ ورناچین نا لائخی تے مثبت کنڈآ درسا اوفتے علم وکسب نا وارخواہی فراوان کننگ وخت انا اہم گرج ءِ۔ خوانوک و لائخ آ ورناک پاکستان نا روشنا آخبت و قومی شونداری نا حقی جوڑ کروک آک ءُ۔ داخیال آتا درشانی ءِ او الحمد اسلامک یونیورسٹی نا اولیکو ڈگری رباب تبسم ءِ تننگ نا وخت آکرے۔ اودا اہم تعلیمی سرسہبی آ اودے مبارکبادی تس و اونا روشنا آخبت کن نیک است خواہی نا درشانی ءِ کرے۔ داوخت آ ڈپٹی چیئرمین سینٹ الحمد اسلامک یونیورسٹی نا صدر پروفیسر ڈاکٹرشکیل روشن، انتظامیہ، استاد و کل کارندہ غاتے ادارہ نا تعلیمی سفر اٹی اہم مزل آ سر مننگ آ مبارکبادی پیش کرے۔ اوپارے کہ ملک اٹی آب اٹ تعلیم نا مونی دننگ کن الحمد اسلامک یونیورسٹی نا کوشست آک ستاکڑزرہ۔ تعلیمی ادارہ غاک نئے بیرہ پوسکن آ چین ءِ علم وشعور آن شپ کیرہ بلکن اوفتے آخبت نا چیلنج آتتون مون تننگ و قومی شونداری ٹی گچین کڑد ادا کننگ نا لائخ ہم جوڑ کیک۔ ڈپٹی چیئرمین سینٹ پارے کہ پاکستان نا ورناچین ٹیلنٹ، لائخی و تخلیقی لائخی تیان شُپ ءِ۔ گرج داہیت اناءِ کہ دالائخی تے کاریم ا ٹ اتنگ کن ورناتے آب اٹ تعلیم، پوسکن علم و عملی ہیلکاری نا زیات آن زیات وارخواہی فراوان کننگے، تانکہ او قومی و جہانی کہول آ تینالائخی تے منفنگ کیر و ملک و قوم انا نہادی میرات جوڑ مریر۔ اوپارے کہ ساڑی حکومت تعلیم نا مونی دننگ، تعلیمی نظام اٹی گچینی و خواندگی نا کچ اٹی ودکی کن اصلاحات و گام گیج آتیا چکار کننگ ءِ۔