تعلیم صوبہ نا شونداری و ورنا چین انا روشنا آخبت نا بنداو ءِ،شکیل قادرخان

کوئٹہ، چیف سیکرٹری بلوچستان شکیل قادر خان نا کماشی ٹیصوبہ ٹی دانش اسکول جوڑ کننگ نارد اٹ اہم دیوان اڈ ہلک۔ دیوان اٹی تعلقدار ضلع غاتیٹی اسکول تا تفنگ اٹی مروک آ پیشرفت نا جم جاچ ءِ ہلنگا دیوان آن تران کرسا چیف سیکرٹری پارے کہ تعلیم صوبہ نا شونداری و ورنا چین انا روشنا آخبت نا بنداو ءِ او تعلقدار کمامدار آتے پارت کرے کہ اسکول تا تفنگ نا کاریم اٹی ترندی اتنگے و کل ڈٹ آتے پک کروک وخت و آب انا رِد اٹ پورو کننگے او زور شاغا کہ اسکول جوڑ کننگ تون اوار استاد و ایلو کارندہ غاتا تعیناتی کن اشتہار جاری کننگے تاکہ تفوئی کاریم پورو مننگ تون چناتے تعلیمی آسراتی فراوان کننگ مرے و وخت زیان مف۔ دیوان ءِ پاننگا کہ ژوب، قلعہ سیف اللہ، راڑہ شم، صحبت پور، خضدار، بیکڑ و سیوی ٹی دانش اسکول جوڑ کننگ انگ ءِ‘ چیف سیکرٹری تعلقدار ڈپٹی کمشنرز و محکمہ تعلیم نا کمامدار آتے پارت کرے کہ تفوئی کاریم نا چاروکی ءِ کیر و اڑاند آتے دمدستی وڑ اٹ مر کیر او پارے کہ صوبائی حکومت مر انگا و پدتموک علاقہ غاتیٹی آب اٹنگاتعلیم اسکان چناتا رسینگ گیگ ءِ پک کننگ کن عملی گام گیج کننگ اٹی ءِ۔ چیف سیکرٹری پارے کہ ہر چناءِ رکھوک، باوقار پوسکنوڑ تعلیمی چاگڑد فراوان کننگ حکومت نا اولیکو زمواری ءِ۔ دیوان اٹی ایڈیشنل چیف سیکرٹری شونداری زاہد سلیم، سیکرٹری اسکولز لعل جان جعفر و تعلقدار سینئر افسرآک بشخ ہلکر۔