برآمدآتیٹی ودکی کن صنعت آتیٹی جوڑمروک مصنوعات آتا جہانی منڈی تسکان رسینگ اہم ءِ،وزیراعظم محمد شہباز شریف

اسلام آباد، وزیراعظم محمد شہباز شریف پاکستانی برآمدآتا مونی دننگ، مصنوعات آتا جہانی منڈی تسکان رسینگ اٹی ودکی و چنکا و نیامی درجہ نا کاروبار تون اوار ہندی صنعت آتے برآمدی آب اتون ہم گرنچ کننگ کن ٹریڈ ڈویلپمنٹ اتھارٹی آف پاکستان (ٹی ڈی اے) ءِ پوسکن آ وڑتیا کننگ نا منظوری ءِ ترساپارت کرینے کہ شفاف وڑاٹ میرٹ آ گچین ہیلکار ہیومن ریسورس ءِ ٹی ڈی اے پی نا بشخ جوڑ کننگے۔ وزیراعظم آفس نا میڈیا ونگ آن جاری پریس ریلیز نا رداٹ دافیصلہ وزیراعظم نا کماشی ٹی اسلام آباد اٹی اڈ ہلوک بڑزکو کہولی دیوان اڈہلک مس۔ دیوان آن تران کرسا وزیراعظم پارے کہ برآمد آتیٹی ودکی کن صنعت آتیٹی تیارکروک گڑاتا جہانی منڈی تسکان رسینگ بھاز اہمیت تخک، پوسکن آ وڑتتون گنڈنگ ٹی ڈی اے پی اونا کسر ءِ آوار کیک، کشاری گڑاتا برآمد نا مچ آ ایکو سسٹم مچ آ ویلیو چین اس جوڑ کننگک۔ وزیراعظم پارت کرے کہ شفاف وڑاٹ میرٹ آ گچین ہیلکار ہیومن ریسورس ءِ ٹی ڈی اے پی نا بشخ جوڑ کننگے۔ اوپارے کہ اصلاحات ہموتم مننگ کیک ہراتم ادارہ غاتیٹی شونداری نا ہدف آتا دوئی کننگ و کارکڑد تون گنڈنگے۔ وزیراعظم پارے کہ ادارہ نا کارکڑد و مالیاتی آڈٹ کن گچین پنی آ پرائیویٹ آڈٹ فرم انا خذمت دوئی کننگے۔ پاکستان نا برآمدی کچ و گیشتر و اونا جغرافیائی سیم ودنگ بھاز جوان ءِ۔ برآمد آتیٹی ودکی کن صنعت و چنکا و نیامی درجہ نا کاروبار ءِ آسراتی فراوان کننگ اُن تانکہ داخاصیت آتیان فائدہ دوئی کننگ مرے۔ دیوان ءِ ٹریڈ ڈویلپمنٹ اتھارٹی آف پاکستان (ٹی ڈی اے پی) نا ساڑی کارکڑد و ادارہ ئی پنجر نا بابت حوال تننگا۔ حوال اٹی ٹی ڈی اے پی نا ساڑی نظام اٹی چیلنج آتا بارواٹی معلومدارکننگا۔ جہانی کہول آ گچین ٹریڈ پروموشن آرگنائزیشن آتا تقابلی جاچ اٹی پیدوار کننگاکہ پوسکن آ ادارہ غاک ہندی منڈی تا شونداری و جہانی منڈی تسکان رسینگ، برآمد کروک آتا کچ اٹی ودکی و برآمد آتا مونی دننگ کن گچین خذمت فراوان کیرہ۔ حوال اٹی ٹی ڈی اے پی ءِ پوسکن آ خواست آتتون ہم گرنچ جہانی آب انا واپاری مونی دننگ نا ادارہ ٹی بدل کننگ کن اصلاحات ہم پیش کننگا۔ دافتے ٹی ادارہ نا دنگ ءِ ہشت بنداوی افعال اسکان کچ اٹ کننگ، بورڈ وانتظامی پنجر نا پوسکن تنظیم، علاقائی نیٹ ورک ءِ گچین کننگ، ڈیجیٹل پلیٹ فارم و اے آئی نا کاریم اٹ اتنگ، وخت اس کہ کارکڑد ءِ ہُننگ کن قابل پیمائش ٹک و آجوتھرڈ پارٹی جاچ انا نظام درستی راستی کرفنگ اوار ءِ۔ سلاہ ئی اصلاحات آ عملدرآمد کن منظوری، ڈیزین، نفاذ و آجوجاچ آ تالان 12 تُو انا ریسہ وار ڈٹ ہم پیش کننگا۔ وزیراعظم اصلاحات ءِ بروک آ سال اٹی پورو کرسا اطلاق ءِ پک کننگ نا پارت کرے۔ دیوان اٹی بنجائی وزیر رانا تنویر حسین، جام کمال خان، احدخان چیمہ، محمد اورنگزیب، عطاء اللہ تارڑ، شزہ فاطمہ خواجہ، ڈاکٹر مصدق ملک، سلاہکار وزیراعظم ہارون اختر، وزیر مملکت بلال اظہرکیانی و تعلقدار بڑزکو کمامدارآک بشخ ہلکر۔