نیم جان مننگ انسان نا لائخی و عزت نفس اٹ کمتی نا سوب گوندنگ مفک،وزیر اعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ انسانیت نا خذمت اصل خذمت ءِ، ضرورت مند و سختی ٹی پلویڑ مروک شاری اسے نا مون آ بشخندہ اتنگ کن کن کل آن بھلا است جمی نا سوب ءِ۔ ریاست نا زمواری ءِ کہ او تینا شاری تے مشکل آتیٹی تنیا الیپ و اوفتے شرف اٹ زند گدریفنگ نا وارخواہی فراوان کے۔ دا خیال آتا درشانی ءِ او خن تیان نیم جان کوئٹہ نا شاری محمد زاہد تون اوڑدہی نا وخت آ کرے‘ وزیراعلیٰ محمد زاہد نا مالی کمک ءِ کرے و اونا خن تا درمان و بینائی نا بحالی کن پورو کمکاری نا باور کرفے، وخت اس کہ اونا غریب و بے روزگار سنگت جان محمد ءِ شرفمند روزگار نا فراوانی کن رکشہ اس ہم ٹیکی ٹی تس۔ وزیراعلیٰ میر سرفراز بگٹی پارے کہ محمد زاہد نا خن تا درمان کن وس انا کچ آ آسراتی فراوان کننگک و اگہ اونا درمان لندن، امریکہ، دبئی یا دنیا نا ہرا ملک اٹی مننگ کرے تو حکومت دا رد اٹ پورو کمک کیک‘ او پارے کہ حقدار شاری ءِ تنیا الیپرہ، نیم جانی انسان نا لائخی و عزت نفس اٹی کمتی نا سوب گوندنگ مفک، دن انگا بندغ آتے باوقار زند و وتواجہ روزگار نا وارخواہی فراوان کننگ ننا زمواری ءِ۔ وزیراعلیٰ پارے کہ ننا کوشست ءِ کہ بلوچستان نا اسہ حقدار شاری اس درمان، روزگار و بنداوی آسراتی تیاں محروم مف۔ انسانیت نا خذمت ننا نصب العین ءِ و الس نا مشکل آتا ایسری حکومت نا زمواری ءِ۔ دا وخت آ محمد زاہد وزیراعلیٰ میر سرفراز بگٹی نا منت ءِ ہرفسا پارے کہ وزیراعلیٰ الس نا ڈکھ و دڑد ءِ پہہ مروک و سخت وخت اٹی اوفتتون کمک کروک متحرک ءُ وزیراعلیٰ اسے۔ او پارے کہ وزیراعلیٰ داکان مست ہم اونا درمان کن 10 لکھ روپئی نا مالی کمک فراوان کریسس و روزگار نا دوئی کننگ اٹ کمک کریسس۔ محمد زاہد نا رِد اٹ وزیراعلیٰ میر سرفراز بگٹی مدام اونا مشکل آتے پہہ مسنے و اودے ہچ گہس خورک پدی راہی کتنے۔ محمد زاہد و اونا سنگت جان محمد مالی کمک، درمان کن پورو کمکاری و روزگار کن رکشہ فراوان کننگ آ وزیراعلیٰ بلوچستان نا منت ءِ ہرفسا اوڑکن نیک استخواہی تا درشانی ءِ کریر۔