قومی سوگوی تے سیاسی اختلاف آتیا اولیت تننگ نا گرج ءِ، احسن اقبال

اسلام آباد، بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ پاکستان نا مدامگی زرگزرانی شونداری، زرکاری نا مونی دننگ و جہانی زرگزران اٹی گچین ہند اس دوئی کننگ کن سیاسی سوگوی و پالیسی تا ریسہ بنداوی اہمیت تخک، ساڑی علاقائی و جہانی حالیت آتیٹی پاکستان ہر وڑ انا نزوری ءِ سگنگ کپک۔ ٹی وی چینل ءِ انٹرویو ٹی بنجائی وزیر پارے کہ سیاسی اختلاف جمہوری نظام نا بشخ ءِ ولے اوفتا آئینی درشانی و جمہوری دنگ اٹ مرسا کننگے۔ قومی سوگوی و ملکی فائدہ غاتے سیاسی اختلاف آتیا اولیت تننگ وخت انا اہم گرج ءِ۔ اوملک اٹی سیاسی سوگوی کن بروک آ دہ سال اکن سیاسی میثاق نا سلاہ ترسا پارے کہ کل سیاسی واکدارآک داہیت آامنا کیر کہ او دھرنا و لانگ مارچ آن پاناد کیرہ و ملک اٹی شونداری و زرگزرانی سرجز آتا مونی دننگ کن گچین چاگڑد ءِ برجا تخنگک۔ پروفیسر احسن اقبال پارے کہ زرکارآک ہمو ملک آتا پلو ءِ ہلیرہ ہراڑے امن و ایمنی نا حالیت آک گچین، سیاسی سوگوی برجا و آخبت نا زرگزرانی پالیسی تا ریسہ ساڑی مرے۔ زرکاری نا فیصلہ غاتیٹی پالیسی تا ریسہ و کاروباری چاگڑد آ پت اہم کڑد ادا کیک اوپارے کہ پاکستان ءِ زرکاری کن است چکوک مزل اس جوڑ کننگ و زرگزرانی شونداری نا ترندی ءِ برجا تخنگ کن ہندن ءُ چاگڑد اس ودی کروئی مریک ہراڑان ہندی و جہانی زرکارآتا پت سوگومرے و ملک شونداری نا مریس مدی ہدف آتے دوئی کننگ کے۔