بلوچستان پولیس و نادرا نا نیام اٹ بائیومیٹرک سروسز نا بابت معاہدہ

کوئٹہ، بلوچستان پولیس و نیشنل ڈیٹا بیس اینڈ رجسٹریشن اتھارٹی (نادرا) نا نیام اٹ پوسکنوڑ ڈیجیٹل شناختی و بائیو میٹرک سروسز نا دوئی کننگ و ادارہ ئی کمکاری ءِ پین سوگو جوڑ کننگ کن اہم معاہدہ غا باقاعدہ دستخط کننگا۔ دا معاہدہ جمعہ نا دے سنٹرل پولیس آفس کوئٹہ ٹی مس‘ دا وخت آ آئی جی پولیس بلوچستان محمد طاہر، ڈی جی نادرا سہیل جہانگیر، ایڈیشنل آئی جی آپریشنز شہزاد اکبر، ایڈیشنل آئی جی ایڈمن جاوید مہر، ڈی آئی جی ہیڈ کوارٹرز و اسپیشل برانچ طاہر علاؤالدین، ڈی آئی جی ٹیلی وزیر خان ناصر و ایلو افسرآک ہم ساڑی ئسر۔ دا معاہدہ نا رد اٹ نادرا بلوچستان پولیس ءِ پوسکنوڑ ملٹی بائیو میٹرک ویری فکیشن سسٹم (MBVS)، نادرا فارنزک ایکوزیشن ایپلیکیشن (NFAA) و پاک آئی ڈی انٹرپرائز یوزر (PakID Enterprise User) نا آسراتی تے فراوان کیک‘ پولیس و نادرا نا نیام اٹ معاہدہ نا رد اٹ پولیس خدمت مرکز (PKM) نا ڈیجیٹل پلیٹ فارم آ پاک آئی ڈی موبائل ایپلیکیشن نا کمک اٹ شاری تا بائیو میٹرک پک‘ شناختی کارڈ و ڈیجیٹل شناختی دستاویز آتا جاست پاست و مجاز پولیس کارندہ غاتیکن پوسکنوڑ شناختی پک کروک آسراتیک دوئی مریرہ‘ دا گام آن شناختی پک کننگ نا عمل ءِ پین بھرمی‘ سَند و پوسکنوڑ ٹیکنالوجی تون ہم گرنچ کننگ اٹی کمک رسینگک‘ وخت اس کہ الس ءِ فراوان کروک پولیس خذمت آتا آب اٹ ہم گچینی بریک‘ وخت اس کہ نادرا فارنزک ایکوزیشن ایپلیکیشن (NFAA) نا کمک اٹ فنگر پرنٹ و چہرہ نا درستی راستی آ تالان پوسکنوڑ فارنزک میچنگ نا آسراتی ہم فراوان کننگک ہرانا نتیجہ غاک اسہ رکھوک رابطہ نظام نا کمک اٹ سنٹرل پولیس آفس کوئٹہ ٹی جوڑ مخصوص پورٹل آ ساڑی مریرہ‘ دا آسراتی ڈوہ تا جاست پاست، شکبر بندغ آتا درستی راستی و کانود نافذ کروک ادارہ غاتا کاریمی واکداری ٹی ودکی کن اہم کڑد ادا کیک۔ معاہدہ ٹی شاری تا کواائف تا رکھ، رازداری و مجاز کاریم اٹ اتنگ ءِ پک کننگ کن تعلقدار سیکورٹی ضابطہ غاتا پابندی ہم اوار ءِ۔ دا اسٹریٹجک شریداری بلوچستان اٹی ڈیجیٹل پولیسنگ نا شون تننگ‘ پوسکنوڑ ٹیکنالوجی نا بھرمی کاریم اٹ اتنگ و ادارہ ئی کاریمی واکداری کچ اٹ ودکی نا کنڈ آ اسہ اہم ءُ پیشرفت اسے۔ بلوچستان پولیس و نادرا نا نیام اٹ دا کمکاری صوبہ ٹی رکھوک، بھرمی‘ شفاف و الس دوست پولیسنگ جوڑ کننگ کن اسہ سوگو ءُ بنداو اس فراوان کیک۔