بلوچستان نا حالیت آتیان است ہشنگک، جسٹس جمال خان مندوخیل

ژوب، سپریم کورٹ آف پاکستان نا فاضل جج جسٹس جمال خان مندوخیل بلوچستان اٹی امن و ایمنی نا خرابی آ سخت گڑتی نا درشانی ءِ کرسا پارے کہ صوبہ نا ساڑی حالیت آتے خنسا اُست دتر نا خڑینک ہوغک و امن نا پورو بحالی کن کل فریق آک اوار تولسا ایسری اس کشر‘ دا خیال آتا درشانی ءِ او ژوب اٹی بلوچستان بار کونسل نا کنڈآن تروک اسہ شرفدار ءُ مہمانی سے ٹی تران کرسا کرے۔ جسٹس جمال خان مندوخیل پارے کہ صوبہ بلوچستان دا دنگ و خراب حالیت آتسکان امر سرمس‘ دا اسہ بے کچ سجفنگ نا ہیت اسے۔؛ تینا مستین نا ذکر ءِ کرسا او پارے کہ اسہ وخت اس ئس ہراتم او بیدس سیکورٹی گارڈ آن ہر جاگہ غا آسانی اٹ ہناکہ‘ ولے اینوکوئٹہ غا ہننگ آ ہم احتیاط کننگ ناپاننگک۔ فاضل جج پیدوار کرے کہ بلوچستان نا حالیت آتے گچین جوڑ کننگ و امن بیرہ حکومت یا انتظامیہ نا زمواری اف بلکہ ہر شاری نا زمواری ءِ کہ او بے ایمنی نا بنداوی سوب آتیا سجفے۔ او زور شاغا کہ ہراتم صوبہ ٹی امن مس ہموتم واپاری سرجز آک ودرہ و بندغ آک انصاف نا دوئی کننگ کن عدالت آتیٹی بننگ کیرہ۔ اخیر اٹ او سانحہ سول ہسپتال کوئٹہ نا ذکر ءِ کرسا پارے کہ او دا است ہسون کروک سانحہ ءِ مچ آ زند ہچ گہس گیرام کننگ کپک۔