سائبر جلہو و جعلی خبر تتون مون تننگ کن بھرمی پالیسی و ڈیجیٹل تعلیم المی ءِ، عطاء تارڑ

اسلام آباد، بنجائی وزیر حوالکاری وشینکاری عطاء اللہ تارڑ پارینے کہ ترندی اٹ بدل مروک آ ٹیکنالوجی و سوشل میڈیا نا ودوک آ کاریم اٹ اتنگ نا رد اٹ پاکستان اٹی گچین ریگولیٹری فریم ورک، جامع پالیسی و ڈیجیٹل تعلیم ءِ شون تننگ وخت انا اہم ءُ گرج اسے۔ جعلی خبر و سائبر جلہو تتون مون تننگ کن اسکول، کالج و یونیورسٹی تیٹی ڈیجیٹل آگاہی ءِ نصاب نا بشخ جوڑ کننگے و چناتے سائبرگڑتی تیان رکھوک سلنگ نا ہیلکاری تننگے۔ سائبر سیکورٹی آگاہی ویک سیمینار نا گڈیکو دود آن تران کرسا بنجائی وزیر حوالکاری پارے کہ ٹیکنالوجی ترندی اٹ بدل مننگ اٹی ءِ، دا سوب آن سائبر سیکورٹی و سوشل میڈیا تون تعلقدار آگاہی کن پدریسہ گام گیج کروئی تمک۔ او پارے کہ دا مسخت کن کل تعلقدار اسٹیک ہولڈر آتتون سلابت، ہیلکاری پروگرام تا بست و بند و سائبر جلہو تیان بچفنگ نا معلومداری ہر شاری اسکان رسیفنگ المی ءِ۔ عطاء اللہ تارڑ پارے کہ ورنا چین، خاص وڑ اٹ جنریشن زی ءِ ہم دا قومی کوشست نا بشخ جوڑ کروئی تمک تاکہ آخبت نا ٹہیفوک آتے ڈیجیٹل دنیا ٹی مون تروک گڑتی تیان رکھوک جوڑ کننگ مرے۔ او دا ارادگی نا درشانی ءِ کرے کہ اسیجائی کوشست آتا کمک اٹ پاکستان نا آخبت ءِ پین رکھوک جوڑ کننگ مریک۔ چیئرمین پاکستان ٹیلی کمیونیکیشن اتھارٹی (پی ٹی اے) میجر جنرل (ر) حفیظ الرحمان تینا تران اٹی پارے کہ پاکستان ءِ سائبر سیکورٹی نا رد اٹ پدریسہ گڑتی مونی کروئی تمنگ اٹی ءِ و ملک اٹی ہزار آتا کچ اٹ جعلی ویڈیو پیری کیرہ، وخت اس کہ سائبر جلہو آتا گڑتی 24 گھنٹہ ساڑی مریک‘ او پارے کہ پاکستان اٹی شاری تے جعلی فون کال و ون ٹائم پاسورڈ (او ٹی پی) تون تعلقدار شکبر کلہوک بریرہ‘ ہرافتیا باور کرفسا اوفتتون دُرو کننگ نا کوشست کننگک۔ شاریک بایدے دن انگا کلہو تے پک کننگ آن بیدس اوفتے مونی تالان کپس، انتئے کہ رد معلومداری تا تالانی پین ویل ودی کننگ کیک۔ چیئرمین پی ٹی اے پارے کہ سائبر سیکورٹی نا گڑتی تتون مون تننگ کن السی آگاہی تون اوار گچین پالیسی سازی ہم المی ءِ‘ او پارے کہ ٹیلی کام بشخ ہم سائبر گڑتی تیان رکھوک اف، ہندا سوب آن تعلقدار ادارہ غاک تینا نظام ءِ رکھوک جوڑ کننگ کن گام گیج کننگ اٹی ءُ۔ او معلومدار کرے کہ نادرا، پیمرا، پی ٹی اے و تعلقدار کمپنیک سائبر جلہو تیان بچنگ کن تینا سسٹم تا رکھ آ چکار کرینو۔ او دا ارادگی نا درشانی ءِ کرے کہ پاکستان نا آخبت ءِ رکھوک جوڑ کننگ کن سائبر سیکورٹی نا گام گیج و السی آگاہی نا ریسہ برجا سلک۔