الس ءِ آب اٹنگا طبی آسراتی تا فراوانی اولیت آتیٹی اوار ءِ، ڈپٹی کمشنر کوئٹہ

کوئٹہ، ڈپٹی کمشنر کوئٹہ مہراللہ بادینی اسسٹنٹ کمشنر سٹی کوئٹہ امیر حمزہ اتون اوار شہید بے نظیر ہسپتال کوئٹہ نا دورہ ءِ کرے، ہراڑے او ہسپتال نا جتاجتا بشخ، طبی آسراتی و انتظامی باندات آتا جم جاچ ءِ ہلک۔ دا وخت آ میڈیکل سپرنٹنڈنٹ (ایم ایس) ڈاکٹر شہزاد واحد ڈپٹی کمشنر ءِ ہسپتال نا ویل، گرج، او پی ڈی، ایمرجنسی سروسز، ڈاکٹر و ایلو کارندہ غاتا حاضری تون اوار ایل ایم او تون تعلقدار باندات آتیا جم بریفنگ تس۔ ڈپٹی کمشنر کوئٹہ ہسپتال نا جتا وارڈ، یونٹ و او پی ڈی تادورہ ءِ کرے و ہراڑے ساڑی ڈاکٹرو طبی کارندہ غاتتون اوڑدہی کرسا ناجوڑ آتے فراوان کروک طبی آسراتی تا بابت معلومداری دوئی کرے۔ او ناجوڑ و اوفتا تینائی تتون ہم ہیت وگپ کرے و درمان نا آسراتی، مون تروک مشکل و غاو تا بابت سوج کرے‘ دورہ نا وخت آ ڈپٹی کمشنر ویکسینیشن یونٹ نا ہم دورہ ءِ کرے و ہراڑے فراوان کروک آسراتی تا جاچ ءِ ہلک۔ ڈپٹی کمشنر کوئٹہ مہراللہ بادینی ہسپتال اٹی طبی آسراتی تا گچینی‘ ناجوڑ آتے وخت آ درمان نا فراوانی و السی ویل آتا ایسری نا اہمیت آ زور شاغا۔ او ہسپتال انتظامیہ ءِ پارت کرے کہ ناجوڑ آتے گچین طبی آسراتی تا فراوانی، کارندہ غاتا حاضری و ہسپتال نا انتظامی باندات آتے گچین جوڑ کننگ کن گام گیج کننگے۔ او پیدوار کرے کہ الس ءِ آب اٹو طبی آسراتی تا فراوانی ضلعی انتظامیہ نا اولیت آتیٹی اوار ءِ و دا رد اٹ ہسپتال آتا کارکڑد و السی غاو تا جاچ ہلنگ برجا سلک۔