کھد انا کانود آن چَپ دننگ اتنگ نا زموار آتا برخلاف سخت کارروائی کننگک،ڈپٹی کمشنرجعفرآباد

جعفرآباد، ڈپٹی کمشنر جعفرآباد خالد خان نا کماشی ٹی کھد انا شفاف رسینگ و چاروکی نا نظام آ عملدرآمد نا رد اٹ ضلعی کہولی کمیٹی نا دیوان اڈ ہلک، ہراٹی کھد انا راہی تس‘ کوڑی کننگ نا توننگ و کشارگر آتے پک کروک نہاد آتیا کھد انا فراوانی ءِ پک کننگ تون تعلقدار باندات آتا جاچ ءِ ہلنگا۔ دیوان اٹی تعلقدار محکمہ غاتا افسرآک بشخ ہلکر و کھد انا بشخ و پانٹ و رائی تس نا نظام ءِ شفاف جوڑ کننگ کن جتا گام گیج آتیا سجفنگا۔ دیوان اٹی دا ہیت آ زور شاغنگا کہ کھد انا ہن و بر ءِ ڈسٹری بیوٹر و ہول سیلرآتیان ہلسا مجاز ڈیلر اسکان گچین وڑ اٹ مانیٹر کننگے و راہی تس تون تعلقدار دستاویز، انوائسز، ڈیلیوری چالان، سیکورٹی کوڈ، کیو آر کوڈ و سیریل نمبر آتے باقاعدہ پک کننگے۔ داکان بیدس کھد انا ڈیلر و سب ڈیلر آتا اسٹاک نا پورو ریکارڈ جوڑ کننگ، کھد انا بننگ و بہا مننگ و ایلو سلوک کوڑی نا جم آتے رکھوک تخنگ تون اوار مست آنبار و اناگت فزیکل انسپکشن کننگ آ زور شاغنگا۔ دیوان اٹی پیدوار کننگا کہ کھد بیرہ حکومت نا پک کروک نہاد آتیا بہا کننگے و کشارگر تسکان اونا انصاف اٹ بشخ و پانٹ ءِ پک کننگے۔ کوڑی کننگ‘ ناروا کٹیا کاری، بلیک مارکیٹنگ، ہیبدار یا جعلی کھد انا بہا کننگ و کھد انا کانود آن چَپ ہن و بر اٹی زموار آتا برخلاف کانود نا رِد اٹ کارروائی کننگے‘ دا رد اٹ پولیس، اسپیشل برانچ، کاؤنٹر ٹیررازم ڈیپارٹمنٹ و اسیجائی چیک پوسٹ آتتون گنڈوک رابطہ کاری نا اہمیت آ ہم زور شاغنگا تاکہ کھد انا کانود آن چَپ راہی تس و اسمگلنگ نا توننگ ءِ پک کننگ مرے۔ دیوان اٹی تعلقدار کمامدار آتے پارت کننگا کہ کھد انا راہی تس و بشخ و پانٹ نا بنجائی ضلعی ریکارڈ ترتیب ترسا ہر پانزدہ دے آن پد محکمہ داخلہ و قبائلی باندات بلوچستان و ڈائریکٹوریٹ جنرل زراعت توسیع آ رپورٹ راہی کننگے تاکہ نظام اٹی شفافیت ءِ برجا تخسا کشارگر آتا فائدہ غاتا رکھ پک کننگ مرے۔