زمواری تیٹی ڈیوالئی کروک آتا برخلاف بے فرق کارروائی کننگک،علی رضا مگسی

نصیرآباد، صوبائی محتسب اعلیٰ بلوچستان سعادت اللہ خان بازئی نا پرمان نارد اٹ ریجنل ڈائریکٹر محتسب نصیرآباد ڈویژن علی رضا مگسی نا کماشی ٹی ڈسٹرکٹ کونسل ہال ڈیرہ مراد جمالی اٹی غاو دیوان اڈ ہلک، ہراٹی ایڈیشنل ڈپٹی کمشنر نصیرآباد عبدالجلیل سرپرہ، اسسٹنٹ کمشنر بشیر احمد، ڈسٹرکٹ ہیلتھ آفیسر ڈاکٹر ایاز جمالی، چیف آفیسر میونسپل کمیٹی سلیم خان ڈومکی، ڈپٹی کنزرویٹر فارسٹ فرید احمد رند تون اوار جتا جتا سرکاری محکمہ غاتا افسر و نمائندہ غاک بشخ ہلکر۔ غاو دیوان اٹی شاریک تعلیم، لوکل گورنمنٹ و یونیورسٹی نا ملازم آتا تنخواہ تا تفننگ‘ لال شاہ قبرستان نا ڈغار آ پاننگوک کوزہ‘ اسلامی ریلیف نا کنڈ آن نوکاپ نا زہمی تا اُرا تا جوڑ کپننگ‘ جمعہ خان میموریل ہسپتال نا فعال مفننگ‘ پوریاگر آتے مون تروک ویل، پوسکن آ بس اڈہ غا گدریفنگ نابابت گڑتی و گیس پائپ لائن نا نیمہ غا سلوک ڈٹ آتتون اوار جتا السی ویل آتتون تعلقدار نوشتئی و زبانی وڑ اٹ غاو تے پیش کریر و تعلقدار محکمہ غاتا چکار ءِ دا ویل آتا ایسری نا کنڈ آ کرفیر۔ دا وخت آ ریجنل ڈائریکٹر محتسب نصیرآباد ڈویژن علی رضا مگسی تران کرسا پارے کہ غاو دیوان اڈ تننگ نا بنداوی مسخت الس ءِ اوفتا درگہ غا انصاف نا فراوانی، سرکاری محکمہ غاتا کارکڑد اٹی گچینی و شاری تے مون تروک ویل آتا وخت آ ایسری ءِ پک کننگ ءِ۔ او پارے کہ الس نا کنڈ آن پیش کروک غاو و ویل آتا ایسری کن کوشست کننگک و تعلقدار محکمہ غاتا کمامدار آتے السی غاو تا ایسری کن دمدستی گام گیج کروئی تمک۔ او افسر آتیا زور شاغا کہ او تینا دفتر آتیٹی حاضری ءِ پک کیر، الس کن ساڑی مریر و شاری تا غاو تے سنجیدگی اٹ ہلسا اوفتا ایسری کن عملی گام گیج کیر۔ او مستی پارے کہ غیر فعال محکمہ و زمواری تیٹی ڈیوالئی نشان تروک افسر آتا برخلاف بے فرق کارروائی کننگک تاکہ سرکاری باندات آتے ٹی گچینی‘ شفافیت و السی پت ءِ شون تننگ مرے۔