اپوزیشن اہم انگا پارلیمانی کمیٹی تیٹی بشخ ہلسا پارلیمنٹ ءِ سوگو کے،بلاول بھٹو زرداری

اسلام آباد، چیئرمین پاکستان پیپلز پارٹی بلاول بھٹو زرداری پارلیمان ءِ فعال کننگ کن حکومت و اپوزیشن ہڑتوم آتیا تینا زمواری آتے پورو کننگ آ زور شاغسا پارینے کہ اگہ پارلیمان واکدار ءِ تو نن کل واکدار اُن، حکومت ءِ تینا زمواری تے پورو کروئی تمک وخت اس کہ اپوزیشن ءِ ہم تینا آئینی و پارلیمانی کڑد ءِ ادا کروئی تمک۔ او اپوزیشن آن خواست کرے کہ او اہم پارلیمانی کمیٹی تیٹی بشخ ہلنگ نا بناءِ کے و کم آن کم گچین کاری جوانی اتنگ نا کمیٹی کن تینا باسک آتا پن تے پنندار کرسا جمع کرفے۔ قومی اسمبلی ٹی تینا خیال آتا درشانی ءِ کرسا بلاول بھٹو زرداری پارے کہ تران تے ٹی بیرہ بیان بازی و اسہ ایلو آ دوبہ خلنگ انگ ءِ۔ ہرافک خوارہ کہ پارلیمان غیر فعال مرے، اوفتا مسخت پورو مسنے و دا مسخت نا پوروی ٹی اونا ہم کڑد ءِ۔ اپوزیشن کمیٹی تیٹی تولپرسا پارلیمان نا کڑد ءِ نزور کرینے۔ بلاول بھٹو زرداری اپوزیشن لیڈر ءِ پارے کہ اگہ او خوارہ کہ پارلیمان فعال مرے تو بانی پی ٹی آئی نا کنڈآن اوفتے ہرا واک دوئی ءِ، اودے کاریم اٹ اتیر و اہم انگا کمیٹی تیٹی تولر۔ او پارے کہ اپوزیشن نا نمائندہ غاک کمیٹی تیٹی مفسہ تو دا کمیٹی تا انت فائدہ مریک؟ او گچین کاری اصلاحات کمیٹی نا رد اٹ پارے کہ کم آن کم دا کمیٹی کن تینا باسک آتا پن تے ترسا جمع کرفر۔ او خواست کرے کہ وزیر خزانہ، وزیر خارجہ، وزیر دفاع و وزیر داخلہ ایوان اٹی برسا بریفنگ ایتر و پار کہ ملک ءِ ہرا گڑتیک مون تروک ءُ و دہشت گردی تون تعلقدار ویل آک انت ءُ۔ او اپوزیشن آن خواست کرے کہ او تینا دوئی پارلیمانی واک ءِ کاریم اٹ اتیر‘ پی ٹی آئی نا قومی اسمبلی نا باسک علی محمد خان بلاول بھٹو زرداری نا موقف تون امنا کرسا پارے کہ او جوان ہیت کرینے۔ پارلیمنٹ ہمو فورم ءِ ہراڑے حکومت آن پرسجو مریک، ہندا سوب آن پارلیمان ءِ سوگو کننگ المی ءِ۔