وزیر اعظم شہباز شریف نا پارت،گچین کاری اصلاحات آ حکومت نا اپوزیشن تون مذاکرات نا فیصلہ

اسلام آباد، حکومت بروک آ گچین کاری تے شفاف جوڑ کننگ و گچین کاری اصلاحات نا عمل ءِ مونی دننگ کن اپوزیشن تون مذاکرات بنا کننگ نا فیصلہ کرینے۔ حوالی نا رد اٹ وزیراعظم شہباز شریف گچین کاری اصلاحات نا باندات آ اپوزیشن ءِ سلاہ اٹ ہلنگ و امنائی ودی کننگ کن اودے پارلیمانی کمیٹی ٹی اوار کننگ نا پارت کرینے۔ حوالی نا رد اٹ وزیراعظم گچین کاری اصلاحات آ اپوزیشن تون مذاکرات کن امنا ءِ، وخت اس کہ حکومت دا عمل ءِ تین پہ تینی سلابت نا کمک اٹ مونی دننگ خواہک تاکہ بروک آ گچین کاری تا اڈ تننگ و گچین کاری نظام اٹی گچینی نا رد اٹ اسیجائی لائحہ عمل اس تیار کننگ مرے۔ دا مسخت کن 20 باسکی پارلیمانی کمیٹی گچین کاری اصلاحات اٹی اپوزیشن نا پنچ باسک ءِ اوار کننگ نا سلاہ غا پیشرفت کننگ انگ ءِ۔ وزیراعظم پارت کرینے کہ کمیٹی ٹی اپوزیشن نا نمائندگی ءِ پک کننگ کن اوڑان باسک آتا پن تے خواہفنگے۔ حوالی نارد اٹ اسپیکر قومی اسمبلی اپوزیشن ءِ پارلیمانی کمیٹی ٹی اوار مننگ ناسلہ خلنگ کن چٹھی نوشتہ کیک۔ چٹھی نا کمک اٹ اپوزیشن آن کمیٹی ٹی اوار کروک پنچ باسک آتا پن تے بٹنگ انگک۔ تاکہ گچین کاری جوانی اتنگ نا عمل اٹی اپوزیشن نا بشخ ہلنگ ءِ پک کننگ مرے۔ حکومتی کوشست آتا مسخت گچین کاری جوانی اتنگ نا باندات آ سیاسی جماعت آتا نیام اٹی سلابت نا عمل ءِ مونی دننگ و گمانی اختلاف آتے مذاکرات نا کمک اٹ ایسر کننگ کن امنائی ودی کننگ ءِ۔ حوالی نا رد اٹ حکومت خواہک کہ بروک آ گچین کاری تے شفاف جوڑ کننگ کن گچین کاری نظام اٹی گچینی نا گام گیج آتیٹی اپوزیشن ہم تینا کڑد ءِ ادا کے۔ ولے اپوزیشن نا کنڈ آن دا سلہ غا ردِعمل و مذاکراتی عمل اٹی بشخ ہلنگ تون تعلقدار پک موقف مون آبروک معلومداری ٹی اوار اف۔