تعلیم آ زرکاری راج انا شونداری و ڈیہہ انا شونہالی نا کسر ءِ آوار کیک، جعفرخان مندوخیل

کوئٹہ، گورنر بلوچستان جعفرخان مندوخیل پارینے کہ الحمدللہ! اینو نن کن اِرا بھلا مستائی تا سوب آن خوشی و گمر نا ہیت اسے۔ اولیکو مستائی دا کہ مچ آ پاکستان اٹی سخت مقابلہ غان پد بیوٹمز یونیورسٹی ژوب کیمپس نا اِرا طالب علم ثناء اللہ و محمد اخلاص کمپیوٹر سائنس اینڈ ٹیکنالوجی کن آٹانومس ریجن فل فنڈڈ اسکالرشپ دوئی کرینو۔ ہڑتوم آ طالب علم آک آرٹیفیشل انٹیلی جنس و سائبر سیکورٹی نا بشخ آتیٹی بڑزکو تعلیم دوئی کننگ کن چین آ کارہ‘ ارٹمیکو بھلا مستائی دا کہ بیوٹمز ژوب کیمپس نا 14 طالب علم پبلک سروس کمیشن نا مقابلہ نا امتحان اٹی نمان نمبر آتتون سرسہبی دوئی کرینو۔ دا بھرم آک دا راستی نا درشانی ءِ کیرہ کہ اگہ ورناتے آب اٹو تعلیم، گچین وارخواہی و جوان چاگڑد فراوان کننگے تو او تینا لائخی تے منفنگ کیرہ۔ دا کیمپس نا سرسہبی تا پوسکن آ ریکارڈ و لائخ آ طالب علم آتا لائخی نا امنائی ءِ‘ او پروفیسر ڈاکٹر عبدالسلام لودھی و اونا مچ آ ٹیم ءِ خراجِ تحسین نا حقدار گوندا‘ دا خیال آتا درشانی ءِ او گورنر ہاؤس کوئٹہ ٹی بیوٹمز یونیورسٹی ژوب کیمپس نا فیکلٹی باسک و طالب علم آتتون انٹرایکشن نا وخت آ گپ و تران کرسا کرے۔ دا وخت آ مارومسڑ طالب علم آتا کنڈآن سوج کننگا ہرافتے اسٹ اسٹ آ گورنر بلوچستان تفصیلی ورندی تس۔ گورنر بلوچستان جعفرخان مندوخیل ہیت و گپ کرسا پارے کہ نن ژوب کیمپس اٹی داخلہ فیس اٹی کمتی نا ہرا فیصلہ ءِ کرین، اونا مثبت بھرم ہم مون آ بننگ اٹی ءِ‘ تدوک آ سال انا مون اٹ مارومسڑ طالب علم آتا کچ دوکچ مننگ دا ہیت انا شاہدی ءِ کہ تعلیم اسکان رسینگ گیگ ءِ آسان کننگ آن ورنا تیکن شونداری نا پوسکن آ درگہ غاک ملنگرہ۔ دا سرسہبی تا ننا دا ارادگی و پت ءِ پین سوگو کرینے کہ ژوب ڈویژن ءِ مچ آ ڈیہہ اکن “ہب آف ماڈرن ایجوکیشن” جوڑ کننگ نا خنوک آتغ داسہ راستی نا دروشم تینائی کننگ اٹی ءِ۔ ننا مسخت بیرہ بیوٹمز یونیورسٹی کیمپس اس چلیفنگ آخا بلکہ ہندن ءُ تعلیمی چاگڑد اس ٹہیفنگ ءِ ہراڑے پوسکنوڑ علم، سائنٹفک ریسرچ، ڈیجیٹل ٹیکنالوجی و تخلیقی لائخی تے شون رسینگ کے و ننا ورناک قومی و جہانی کہول آ تینا درستی راستی کرفنگ کیر۔ گورنر مندوخیل دا پت انا درشانی ءِ کرے کہ ہمو دے خڑک ءِ ہراتم ژوب شار اٹی اسہ پوسکن ءُ پوسکنوڑ فل فلیجڈ یونیورسٹی جوڑ کننگک‘ دا یونیورسٹی نئے بیرہ ژوب ڈویژن بلکہ مچ آ ڈیہہ انا ورنا تیکن کوالٹی ایجوکیشن، پوسکنوڑ ریسرچ و روشنا آخبت نا پوسکن آ گمان تے ودی کیک‘ نن دا عزم نا دوارگی ءِ ہم کینہ کہ بیوٹمز ژوب کیمپس نا زالبول اسٹاف و مسڑ طالب علم آتیکن اِرا کوسٹر، چین انا ودیک اسکالرشپ و اسپورٹس نا پوسکنوڑ آسراتی تا فراوانی کن عملی گام گیج کننگک تاکہ خاص وڑ اٹ ننا زالبول آتے رکھوک، گچین و آب اٹو تعلیمی چاگڑد دوئی مننگ کے۔ گورنر مندوخیل پارے کہ کنا یقین ءِ کہ تعلیم آ زرکاری اصل اٹ ورناتا آخبت، راج انا شونداری و مچ آ ڈیہہ انا شونہالی آ زرکاری ءِ۔