اسحاق ڈار نا کماشی ٹی دیوان، خارجہ پالیسی اولیت آتا جاچ ءِ ہلنگا

اسلام آباد، نائب وزیراعظم و وزیر خارجہ اسحاق ڈار نا کماشی ٹی پاکستان نا خارجہ پالیسی نا اولیت آتا جاچ ءِ ہلنگ کن اہم دیوان اڈ ہلک، ہراٹی ملک انا برجا سفارتی رابطہ اہم خارجہ پالیسی نا باندات و علاقائی و جہانی حالیت آتیٹی مروک پیشرفت آ گپ وتران کننگا۔ دیوان نا وخت آ پاکستان نا ہڑتوم آکنڈ انا و کثیرالجہتی سفارتی تعلقداری تے پین سوگو کننگ نا کوشست آتا جاچ ءِ ہلنگا۔ داکان بیدس بروک آ بڑزکو کہولی سفارتی رابطہ و اہم اوڑدہی تا رد اٹ ہم ہیت و گپ مس، وخت اس کہ خارجہ پالیسی نا کیہی باندات آتیا پیشرفت ءِ گچین وڑ اٹ مونی دننگ نا گرج آ زور شاغنگا۔ دا وخت آ اسحاق ڈار پارے کہ قومی فائدہ نا شون و رکھ اکن پدریسہ سفارتی رابطہ غاک بھاز اہم ءُ۔ او تعلقدار افسر آتے پارت کرے کہ سفارتی باندات آ خُڑک رابطہ کاری ءِ برجا تخنگے و اہم اولیت آتا رد اٹ وخت آ پیشرفت و گچین فالو اپ ءِ پک کننگے۔ دیوان اٹی دا ہیت آ چکار کننگا کہ پاکستان نا سفارتی رابطہ غاتے گچین وڑ اٹ مونی دننگے و علاقائی و جہانی کہول آ اہم باندات آتا رد اٹ خارجہ پالیسی اولیت آ پدریسہ کاریم کننگے۔