بھارتی وزیر دفاع نا خارتس بیان مسترد، ہر جارحیت نا پبی ورندی تننگک،دفتر خارجہ پاکستان

اسلام آباد، پاکستان بھارتی وزیر دفاع نا خارتس بیان ءِ ترندی اٹ مسترد کرسا پارے کہ تینا علاقائی وتواجہی و سالمیت نا دفاع کن پورو وڑ اٹ سنبرینگوک اُن۔ سعودی ڈغار آ حوثی ملیشیا نا جلہو آک مذمت نا قابل ءُ، سعودی عرب نا وتواجہی و سلامتی نا پورو مخ تفی ءِ کینہ‘ شاری و بنداوی پنجر ءِ شست کروک جلہو آک ڈیہہ انا امن و سوگوی کن گڑتی اسے ءُ۔ پاکستان مکہ معاہدہ نا رد اٹ تینا زمواری تے پورو کیک۔ ترجمان دفتر خارجہ سجاد حیدر خان ہفتہ وار بریفنگ نا وخت آ پارے کہ پاکستان سعودی عرب و ترکیہ تون مکہ معاہدہ نا بابت پورو وڑ اٹ آن بورڈ ءِ۔ ولے معاہدہ نا رد اٹ ہر وڑ انا گمانی عسکری ورندی یا کارروائی نا باندات تعلقدار سیکورٹی ادارہ غاتا واکداری دنگ اٹ بریک۔ ترجمان پارے کہ آر فور ملک آتا گروپ ہم سعودی ایئرپورٹ آ جلہو آتا مذمت ءِ کرینے۔ ترجمان بھارتی وزیر دفاع نا خارتس بیان ءِ ترندی اٹ مسترد کرسا پارے کہ پاکستان تینا علاقائی وتواجہی و سالمیت نا دفاع کن پورو وڑ اٹ سنبرینگوک ءِ۔ پاکستان مستین بھارتی عسکری خارتس رویہ غاتا جوان ورندی تسنے و ہر وڑ انا جارحیت آ پبی ورندی تننگک۔ او پارے کہ بھارت مقبوضہ جموں و کشمیر اٹی انسانی حق آتا خلاف ورزی تے بند کے۔ کشمیری الس ءِ جمعہ نا نماز خواننگ آن توننگ نا واقعہ غاتیاک ہم گڑتی نا سوب ءُ‘ ترجمان پارے کہ وزیراعظم شہباز شریف ہم بھارتی گام گیج و انسانی حق آتا خلاف ورزی تا برخلاف توار چست کرینے۔ سجاد حیدر خان پیدوار کرے کہ 5 اگست آ مقبوضہ کشمیر نا خصوصی حیثیت ءِ چٹفنگ نا بھارتی گام گیج آک کانود آن چَپ ءُ۔ مقبوضہ کشمیر نا آخبت نا فیصلہ اقوام متحدہ نا تعلقدار قرارداد و کشمیری الس نا اومیت تا رِد اٹ بایدے مرے۔ ترجمان دفتر خارجہ پارے کہ پاکستان ءِ دہشت گردی نا بھلا چیلنج مون تروک ءِ‘ بلوچستان و خیبرپختونخوا ٹی مروک دہشت گرد کارروائی تا بابت اوغانستان نا ڈغار نا کاریم اٹ اتنگ آ ننا گڑتیک اریر۔ پاکستان خواہک کہ اوغان ڈغار پاکستان نا برخلاف کاریم اٹ اتنگپ، ولے اوغانستان دا بابت خواست آتیا باوری کرفنگ کن تیار اف۔