چنا و نیاڑی تے بریبر و آب اٹنگا غذا نا فراوانی اولیت آتیٹی اوار ءِ،ڈاکٹر ربابہ خان بلیدی

کوئٹہ، سلاہکار محکمہ زالکار شونداری ڈاکٹر ربابہ خان بلیدی (ستارہ امتیاز) پارینے کہ کنشت نا رکھ، غذائیت آن شُپ کنشت اسکان ہر شاری نا رسینگ گیگ و غذائی کاختی نا چٹفنگ اسہ دراخ جوڑ ءُ راج اسے نا بنداو مریک۔ ڈاکٹر ربابہ خان بلیدی پارے کہ نیاڑی و چناتے بریبر و آب اٹو کنشت نا فراوانی حکومت نا اولیتی بنداو آتیٹی اوار ءِ۔ سلاہکار زالکار شونداری پارے کہ غذائی رکھ بیرہ کنشت نا دوئی مننگ نا پن اف بلکہ ہر بندغ نا نا رکھوک، آب اٹ و و غذائیت آن شُپ کنشت اسکان رسینگ گیگ ءِ پک کننگ ہم المی ءِ۔ نیاڑی تا جانجوڑی و غذائیت ءِ گچین کننگ بروک آ چین تا دراخ جوڑ ردوم کن المی ءِ۔ سلاہکار زالکار شونداری پارے کہ لمہ و چنا نا جوان غذائیت اسہ دراخ جوڑ و توانا راج اسے نا ٹہیفنگ اٹی بنداوی کڑد ادا کیک۔ نیاڑی تیٹی غذائیت تون تعلقدار سُج پام تالان کننگ و اوفتے جانجوڑ کنشت نا گچین کننگ نا لائخ جوڑ کننگ وخت انا اہم ءُ گرج اسے۔ بلوچستان اٹی غذائی کاختی نا چٹفنگ کن حکومتی ادارہ، سول سوسائٹی و تعلقدار شریداری آتے اسیجائی کوشست کروئی تمک۔ جہانی یومِ کنشت 2026ء نا سرحال ”اینو پوسکنوڑی، پگہ غذائیت“ پوسکنوڑ موثر و مدامگی غذائی و کشاری نظام نا اہمیت ءِ پیدوار کیک۔ سلاہکار زالکار شونداری پارے کہ موسمیاتی بدلی، دیر انا کاختی و غذائی بے رکھی کون آ چیلنج آتتون مون تننگ کن مدامگی کشاری وڑ و ڈول آتے شون تننگ المی ءِ۔ کنشت نا زیان ءِ توننگ و دوئی وسیلہ غاتے جوان وڑ اٹ کاریم اٹ اتنگ ننا کل انا اسیجائی زمواری ءِ۔ غذائی رکھ انا شون تننگ کن نیاڑی تے آگاہی، آسراتی و وسیلہ غاتسکان گچین رسینگ گیگ فراوان کننگ المی ءِ۔ چناتا جسمانی و ذہنی ردوم کن بریبر کنشت نا فراوانی و غذائی کاختی نا وخت آ توننگ المی ءِ۔ ازگار و مالی واکدار بندغ آک تینا ایب کیب اٹی ساڑی ضرورت مند خاہوت آتا کنشت نا خیال ءِ تخر و بین نا چٹفنگ اٹی تینا کڑد ءِ ادا کیر۔ ڈاکٹر ربابہ خان بلیدی خواست کرے کہ نن ہندن ءُ راج اسے نا ٹہیفنگ کن سنبیرنگوک اُن ہراڑے نیاڑی، چنا و ہر ضرورت مند بندغ ءِ جوان و غذائیت آن شُپ کنشت دوئی برے۔