گوادر،مہمان نوازی نا سوب آن سیلانکاری نا بشخ انا بود تخک،ڈائریکٹر ٹورازم بلوچستان

گوادر، ڈائریکٹوریٹ آف ٹورزم، حکومت بلوچستان نا کنڈآن گوادر یوتھ ٹورزم سمٹ 2026ء اڈ تننگا‘ ہراٹی بلوچستان اٹی سیلانکاری نا شون تننگ، ورنا تا لائخی تے مون آاتنگ‘ڈیجیٹل میڈیا نا جوان کاریم اٹ اتنگ و ہندی زرگزران ءِ سوگو کننگ آ زور شاغنگا۔ دود آن ڈائریکٹر ٹورازم بلوچستان گہرام بخشی، دولت خان رجسٹرار یونیورسٹی آف گوادر، نور محسن صدر پریس کلب گوادر و آر سی ڈی سی نا صدر حاجی عبدالغنی نوازش تران کریر، وخت اس کہ پینل ڈسکشن اٹی سیلانکاری، ای کامرس و کاروباری بشخ آتتون تعلقدار چاہندار آک بشخ ہلسا سیلانکاری نا شون تننگ نا گمان‘ مون تروک چیلنج و آخبت نا حکمت عملی آ تینا خیال آتا درشانی ءِ کریر۔ ترانکار آک پاریر کہ گوادر تینا زیبائی کرک‘ یکتا ربیدگ، سمندری میرات، ہندی روایت و مہمان نوازی نا سوب آن سیلانکاری نا بشخ اٹی بے کچ بود تخک۔ گرج دا ہیت انا ءِ کہ دا قدرتی و ربیدگی وسیلہ غاتے گچین وڑ اٹ درستی راستی کرفنگے و ورنا تے سیلانکاری نا شون تننگ کن دوئی وارخواہی تیان پبی فائدہ ہرفنگ نا کنڈآ اتنگے۔ سمٹ نا وخت آ اڈ ہلوک پینل ڈسکشن اٹی مرتسم اقبال ای کامرس ایکسٹینڈڈ و فیکلٹی ممبر شعبہ ای کامرس پی سی ٹی وی آئی جامعہ گوادر، زلیخا طارق ٹورازم اسپیشلسٹ، زہرہ خلیل انٹرپرینیور و عائشہ مراد بخش ٹورازم اسپیشلسٹ بشخ ہلک، وخت اس کہ گراں ناز ہوت پینل ڈسکشن نا مہمانداری و نظامت نا زمواری تے سر تس۔ پینل ڈسکشن اٹی دا ہیت آ ہیت کننگا کہ پوسکنوڑ ڈیجیٹل ٹیکنالوجی، سوشل میڈیا، فوٹوگرافی و ویڈیو مواد نا کمک اٹ گوادر نا کرکی ہند، قدرتی ندارہ، تاریخی میرات و ربیدگی روایت آتے قومی و جہانی کہول آ گچین وڑ اٹ درستی راستی کرفنگ مننگ کیک۔ چاہندار آک دا ہیت آ زور شاغار کہ ورناک ڈیجیٹل پلیٹ فارم و ای کامرس نا کمک اٹ سیلانکاری تون تعلقدار کاروباری سرجز آتے شون تننگ، ہندی گڑاتا شینکاری و سیلانی تے گوادر نا کنڈ آ چکنگ اٹی اہم کڑد ادا کننگ کیرہ۔ شرہ ٹی سیلانکاری نا بشخ ءِ مون تروک چیلنج خاص وڑ اٹ سیکورٹی، سیلانی تا رکھ، بنداوی آسراتی تا فراوانی و سیلانی ہند آتا جوان شین تننگ آ ہم گپ و تران مس۔ شریدار آک دا ہیت انا اہمیت ءِ پیدوار کریر کہ سیلانکاری نا مدامگی شون اکن حکومت، تعلقدار ادارہ، پرائیویٹ بشخ و ہندی برادری ءِ اسیجائی حکمت عملی نا رد اٹ کاریم کروئی تمک۔ ترانکار و پینلسٹس دا ہیت آ زور شاغار کہ سیلانکاری نا بشخ اکن جوان وسیلہ جتا کننگ، گچین رکھی بست وبند ءِ پک کننگ، ورنا تا کسبی ہیلکاری و ہندی کاروباری بندغ آتا است بڈی آن گوادر اٹی سیلانی سرجز آتے ودفنگ مریک۔