المی آ گڑاتا کوڑی کننگ نا برخلاف سخت کارروائی کننگک، نائب وزیر اعظم

اسلام آباد، نائب وزیراعظم و وزیر خارجہ سینیٹر محمد اسحاق ڈار پارینے کہ المی آ گڑاتا کوڑی کننگ، تینا خود آن کاختی ودی کننگ و زیات نہاد ہلوک آتا برخلاف سخت کارروائی کننگک۔ جمعہ نادے وزارت خارجہ غان جاری بیان نا رداٹ نائب وزیر اعظم و وزیر خارجہ سینیٹر محمد اسحاق ڈار نا کماشی ٹی المی کنوئی آ گڑاتا کوڑی و نہاد آتا جاچ ءِ ہلنگ کن کابینہ کمیٹی نا دیوان اس اڈہلک‘ دیوان اٹ بنجائی وزیر قومی غذائی رکھ و پٹ وپول، بنجائی وزیر موسمیاتی بدلی، وزیراعظم نا خصوصی کمکار طارق باجوہ، سیکرٹری واپار و تعلقدار بنجائی و صوبائی وزارت و محکمہ غاتا سینئر نمائندہ غاک بشخ ہلکر۔ کمیٹی المی آ گڑاتا کوڑی کننگ نا حالیت، فراوانی نا بست وبند و نہاد آتا جاچ ءِ ہلک۔ نائب وزیراعظم و وزیرخارجہ ءِ معلومدار کننگا کہ ملکی گرج آتے پورو کننگ کن کنوئی آگڑاتا بھلو کوڑی اس ساڑی ءِ، کاختی نا ہچ ءُ گڑتی اس اف و نہادآک سوگو مننگ ءُ۔ نائب وزیراعظم و وزیر خارجہ وزیراعظم نا پارت آتا رداٹ ملکی صارف آتے آسانی فراوان کننگ کن تعلقدار کمامدارآتے سپلائی چین و المی آ گڑاتا نہاد آتا پدریسہ چاروکی ءِ کننگ نا پارت کرے۔ او پارے کہ المی آگڑاتا کوڑی کننگ، تینا خود آن کاختی ودی کننگ و زیات نہاد ہلوک آتا برخلاف سخت کارروائی کننگک۔