بلوچستان بورڈ آف انویسٹمنٹ اینڈ ٹریڈ ،ڈام اٹ بلوچستان نا اولیکو واپاری جھینگا فارمنگ ڈٹ انا ٹہیفنگ کن معاہدہ غا دستخط

کوئٹہ، حکومت بلوچستان و ہاؤس آف کاسب کنسورشیم نا نیام اٹی ڈام اٹی بلوچستان نا اولیکو واپاری جھینگا فارمنگ ڈٹ انا جوڑ کننگ کن معاہدہ غا دستخط مسنے۔ بلوچستان بورڈ آف انویسٹمنٹ اینڈ ٹریڈ نا کوشست آتیان پک مروک دا معاہدہ ءِ صوبہ ٹی پرائیویٹ زرکاری، کرکی زرگزران نا شون تننگ و ہندی آبادی کن روزگار نا پوسکن آ وارخواہی تا ودی کننگ نا کنڈ آ اہم ءُ پیشرفت اس گوندنگ انگ ءِ۔ وزیراعلیٰ بلوچستان میر سرفراز بگٹی نا ساڑی گری ٹی ہاؤس آف کاسب کنسورشیم نا چیف ایگزیکٹو سعد زاہد و سیکرٹری محکمہ ماہی گیری طارق قمر معاہدہ غا دستخط کریر۔ دود اٹی چیف سیکرٹری بلوچستان شکیل قادر خان و بلوچستان بورڈ آف انویسٹمنٹ اینڈ ٹریڈ نا وائس چیئرمین بلاول خان کاکڑ ہم ساڑی ئس۔ وزیراعلیٰ بلوچستان میر سرفراز بگٹی دا وخت آ تینا خیال آتا درشانی ءِ کرسا پارے کہ بلوچستان اٹی زرکاری نا شون تننگ، قدرتی وسیلہ غاتا جوان کاریم اٹ اتنگ و زرگزرانی سرجز آتیٹی ودکی کن حکومت پبلک پرائیویٹ پارٹنرشپ نا رد اٹ ڈٹ آتے مونی دننگ اٹی ءِ۔ ڈام اٹی صوبہ نا اولیکو واپاری جھینگا فارمنگ ڈٹ جوڑ کننگ ہندا ریسہ نا اسہ اہم ءُ لڑی اسے، ہراڑان کرکی وسیلہ غاتے کاریم اٹ اتنگ و ہندی زرگزران ءِ سوگو کننگ نا پوسکن آ وارخواہیک ودی مریرہ۔ وزیراعلیٰ پارے کہ بلوچستان نا بھلا کرکی پٹی زرگزرانی شونداری، آبی کشت وکشار و برآمد آتا شون تننگ کن نمان گمان تخک۔ گرج دا ہیت اناءِ کہ دا وسیلہ غاتے پوسکنوڑ وڑ و ڈول‘ پرائیویٹ زرکاری و گچین حکمت عملی نا کمک اٹ پیداواری سرجز آتیٹی بدل کننگے۔ جھینگا فارمنگ نا ڈٹ دا بابت اہمیت تخک کہ داڑان نئے بیرہ اسہ پوسکن ءُ واپاری سرجز اس درستی راستی مریک بلکہ آخبت اٹی دا بشخ ءِ ودفنگ نا گمانک ہم ودی مریرہ۔ میر سرفراز بگٹی پارے کہ صوبہ نا زرگزرانی شونداری نا عمل ہمو وخت آ بھرمی مننگ کیک ہراتم اونا بھرم ہندی آبادی اسکان سر مرے۔ ڈام انا ڈٹ اٹی 100 درسد ملازمت آک ہندی بندغ آتے فراوان کننگ نا ارادگی دا بابت بھازاہم ءِ۔ داڑان کرکی علاقہ نا الس ءِ روزگار نا وارخواہی دوئی مریک و ہندی آبادی نا زرگزرانی سرجز آتیٹی اواری پین ودک‘ او پارے کہ حکومت بلوچستان ہمو گام گیج آتا است بڈی ءِ کیک ہرافک ہندی وسیلہ غاتے کاریم اٹ اتسا روزگار، زرکاری و پیداواری لائخی تے ٹی ودکی کیر۔ کمامدار آتا رِد اٹ ڈٹ انا رد اٹ پرائیویٹ بشخ اسہ ارب 11 کروڑ روپئی نا زرکاری کیک‘ بنائی ریسہ ٹی 50 ایکڑ ڈغار آ واپاری جھینگا فارم جوڑ کننگک۔ وخت اس کہ آخبت اٹی اودے 100 ایکڑ یا اوڑان زیات رقبہ اسکان تالان کننگ نا گنجائشت ہم ساڑی ءِ۔ ڈٹ انا کمک اٹ برآمدی آب انا جھینگا تا پیداوار ءِ شون تننگ و بلوچستان اٹی آبی کشت وکشار نا بشخ ءِ شون تننگ نا ہدف تخنگانے۔ حکومت بلوچستان ڈٹ اکن 7 کروڑ 50 لکھ روپئی مالیت نا ڈغار و 40 کروڑ روپئی مالیت نا بجلی نا آسراتی فراوان کیک‘ہرانا رد اٹ حکومتی کمک نا جم کچ 47 کروڑ 50 لکھ روپئی جوڑ مریرہ۔