پاکستان، سعودی عرب نا وتواجہی، سلامتی و علاقائی سلامتی نا رکھ اکن اوڑتون ہم کوپہ سلوک ءِ،وزیراعظم محمد شہبازشریف

اسلام آباد، وزیراعظم محمد شہباز شریف پارینے کہ پاکستان، مملکت سعودی عرب نا وتواجہی، سلامتی و علاقائی سالمیت نا رکھ کن اوفتتون ہم کوپہ سلوک ءِ، داسہ نا سال تیٹی پاکستان و سعودی عرب نا تعلقداری تیٹی نمان پیشرفت مسنے۔ وزیراعظم محمد شہباز شریف تون مملکت سعودی عرب نا پوسکن تعینات مروک آ سفیر ڈاکٹر راجح تامی البقمی جمعہ نا دے اوڑدہی کرے۔ وزیراعظم پاکستان بننگ آ سفیر ءِ بخیر کرے، اودے پوسکن آ زمواری تا سنبھالنگ آ مبارکبادی تس و اونا سفارتی زمواری تیٹی سرسہبی کن نیک انگا استخواہی تا درشانی ءِ کرے۔ وزیراعظم پارے کہ دا منہ سال اٹ پاکستان و سعودی عرب نا تعلقداری تیٹی نمان پیش رفت مسنے۔ او جتا جتا بشخ آتیٹی تین پہ تینی کمکاری ءِ پین کڑمب و ودفنگ کن ساڑی ادارہ ئی فریم ورک ءِ پین سوگو کننگ نا پاکستان نا ارادگی نا دوارگی ءِ کرے۔ وزیراعظم مملکت سعودی عرب نا برخلاف حوثی جلہو آتیٹی داسہ نا ودکی نا سخت انگا لوز آتے ٹی مذمت ءِ کرے، ہرانا سوب آن ٹی نہادی جانک زیان مسر و پاکستانی شاری تتون اوار کیہی بے گناہ بندغ آک ٹھپی مسر۔ او دا ہیت آ زور شاغا کہ پاکستان و سعودی عرب مدام اسہ ایلو نا ہم کوپہ سلوک ءُ۔ او پارے کہ اسٹریٹجک تین پہ تینی دفاعی معاہدہ و مکہ اسیجائی دفاعی سیوت ہڑتوم آ ملک آتا متکن آ ایلمی تعلقداری تیٹی تاریخی ءُ مزل نا نشان اسے نا حیثیت تخک و دا علاقائی امن و سلامتی کن اوفتا اسیجائی ارادگی نا ڈیک ءِ۔ وزیراعظم دا ارادگی نا دوارگی ءِ کرے کہ پاکستان، مملکت سعودی عرب نا وتواجہی، سلامتی و علاقائی سالمیت نا رکھ اکن اوفتتون ہم کوپہ سلوک ءِ۔ وزیراعظم پاکستان ءِ فراوان کروک بھلا وخت انا زرگزرانی و مالی کمک آ سعودی سرکڑدہ تا منتواری ءِ ہرفے۔ او سفیر کن اونا زمواری تیٹی سرسہبی نا دعا کرے و ہڑتوم آ ملک آتا نیام اٹی متکن آ ایلمی تعلقداری تے پین سوگو کننگ کن پاکستان نا کنڈ آن پورو مخ تفی و کمکاری نا باوری کرفے۔