امن، رواداری و قومی یکجہتی نا کلہو ءِ تالان کننگ وخت انا گرج ءِ، عطاء اللہ تارڑ

اکوڑہ خٹک (نوشہرہ)، بنجائی وزیر حوالکاری و شینکاری عطاء اللہ تارڑ وزیراعظم نا پارت آ دارالعلوم حقانیہ اکوڑہ خٹک نا دورہ ءِ کرے۔ وزیراعظم نا کوآرڈینیٹر حوالکاری و خیبر پختونخوا باندات اختیار ولی خان و صوبائی اسمبلی نا باسک جلال خان اسک ہم بنجائی وزیر تون اوار ئسر۔ دارالعلوم حقانیہ اکوڑہ خٹک آ سرمننگ آقومی پیغام امن کمیٹی نا باسک آک، دارالعلوم حقانیہ نا نائب مہتمم مولانا راشدالحق حقانی، جمعیت علماء اسلام (س) نا امیر مولانا عبدالحق ثانی، مولانا سید محمد یوسف شاہ و ایلو بڑزکو سرکڑدہ غاک بنجائی وزیر حوالکاری ءِ بخیر کریر۔ دا وخت آ قومی پیغام امن کمیٹی نا کوآرڈینیٹر مولانا طاہر محمود اشرفی، باسک سینیٹر حافظ عبدالکریم، مفتی عبدالرحیم، علامہ عارف حسین واحدی، پیر نقیب الرحمان، علامہ محمد حسین اکبر، ڈاکٹر محمد راغب حسین نعیمی، مولانا طیب پنج پیر، علامہ ضیاء اللہ شاہ بخاری، بشپ آزاد مارشل، راجیش کمار ہرداسانی، سردار رمیش سنگھ اروڑا اسک ہم ساڑی ئسر۔ قومی پیغام امن کمیٹی نا باسک و عالم دین تتون اوڑدہی ٹی امن و مذہبی ہم گرنچی نا بابت باندات آ گپ وتران مس۔ اوڑدہی ٹی ملک اٹ امن و سوگوی نا تالان کننگ و دہشت گردی نا برخلاف قومی یکجہتی نا بابت ہم گپ وتران مس۔ بنجائی وزیر حوالکاری پارے کہ امن، رواداری و قومی یکجہتی نا کلہو ءِ تالان کننگ وخت انا گرج ءِ۔ او پارے کہ قومی پیغام امن کمیٹی امن، مذہبی ہم گرنچی و دہشت گردی نا برخلاف قومی بیانیہ ءِ سوگو کننگ اٹ تینا کڑد ءِ ادا کننگ ءِ۔ عطاء اللہ تارڑ پارے کہ وزارت حوالکاری و شینکاری قومی پیغام امن کمیٹی نا کمک اٹ امن و سوگوی نا کلہو ءِ الس اسکان سر کننگ ءِ۔ دا وخت آ بنجائی وزیر حوالکاری عطاء اللہ تارڑ و قومی پیغام امن کمیٹی نا باسک آک دارالعلوم حقانیہ نا جتا جتا بشخ آتا دورہ ءِ کریر ہراڑے اوفتے دارالعلوم نا مہتمم نا کنڈ آن تعلیمی و دینی خذمت آتا بابت معلومداری تننگا۔ بنجائی وزیر دارالعلوم نا تہہ ٹی تاریخی جامع مسجد عبدالحق نا ہم دورہ ءِ کرے۔ قومی پیغام امن کمیٹی نا پلیٹ فارم آن عالم دینک امن و قومی یکجہتی نا عزم انا درشانی ءِ کرسا امن نا تالان کننگ و دہشت گردی نا چٹفنگ کن اسیجائی کوشست آتیازور شاغار۔ بنجائی وزیر حوالکاری عطاء اللہ تارڑ و قومی پیغام امن کمیٹی نا باسک آک شیخ الحدیث مولانا محمد ادریس ترنگزئی، مولانا حامد الحق حقانی و مولانا سمیع الحق شہید نا درجہ غاتا بڑزی کن دعا کریر۔