کوہاٹ پولیس لائنز مسیت آ دہشت گرد جلہو،21 بندغ شہید

کوہاٹ، خیبر پختونخوا نا شار کوہاٹ اٹی اولڈ پولیس لائنز نا خڑک آ جمعہ نا نماز نا وخت آ مروک دہشت گرد جلہو اٹی 21 بندغ شہید وخت اس کہ 57 آن زیات ٹھپی مسر۔ سیکورٹی فورس و پولیس نا ورندی کارروائی ٹی 7 دہشت گرد کننگار۔ شہید آتیٹی 6 پولیس کارندہ و 15 لس شاری اوار ءُ۔ پولیس نا رِد اٹ جلہو نا وخت آ جم وڑ اٹ 7 دہشت گرد پولیس لائنز اٹی پترینگ نا کوشست کریر۔ اسہ خودکش جلہو گیر اس بارود آن پر گاڈی ءِ پولیس لائنز نا گیٹ اٹ خلک۔ ہرانا سوب آن بھلو دھماکہ اس مس۔ وخت اس کہ ایلو جلہو گیر آک کمپلیکس اٹی پترینگ نا کوشست کریر۔ آئی جی خیبر پختونخوا ذوالفقار حمید نا رِد اٹ منہ جلہو گیر دہشت گردی تورمحکمہ نا ماڑی نا کنڈ آ ہننگ نا کوشست کریر ولے پولیس نا وخت آ کارروائی نا سوب آن اوفتے خلنگا۔ ایلو جلہو گیر آک اسپیشل برانچ نا ماڑی نا کنڈ آ ہنار، اوڑے ہم سیکورٹی فورس آک کارروائی کریر۔ خیبر پختونخوا نا بنجائی پولیس دفتر نا رِد اٹ بم دھماکہ غان پد علاقہ ٹی سلہہ بند جلہو گیر و سیکورٹی کارندہ تا نیام اٹی سم کاری ہم مس۔ پولیس علاقہ ءِ گھیڑ کرسا کلیئرنس آپریشن نا بناءِ کرے، وخت اس کہ حوال آتا رد اٹ کارروائی گڈیکو ریسہ غا سر مس۔ بم دھماکہ غان پد کوہاٹ نا ڈسٹرکٹ ہیڈکوارٹر ہسپتال اٹی ہلہلہ ئی حالیت نافذ کننگا، ہراڑے ٹھپی تے طبی کمک فراوان کننگ انگ ءِ۔ کمامدار آتا رِد اٹ ٹھپی تیٹی منٹ نا حالیت خراب ءِ‘ آئی جی خیبر پختونخوا ذوالفقار حمید واقعہ نا دمدستی نوٹس ہلسا ریجنل پولیس آفیسر کوہاٹ آن رپورٹ خواہسنے‘ او پارے کہ خیبر پختونخوا پولیس دہشت گردی نا برخلاف تینا کارروائی تے برجا تخک و شہید آتا قربانیک زیان مفسہ۔ وزیراعلیٰ خیبر پختونخوا سہیل آفریدی جلہو نا سخت انگا لوز آتے ٹی مذمت ءِ کرسا پولیس آن رپورٹ خواہسنے و ٹھپی تے دمدستی طبی کمک فراوان کننگ نا پارت کرے، یات سلے کہ کوہاٹ پولیس لائنز نا خڑک آ مستین ہم دہشت گردی نا بھلو واقعہ اس پیش بسوسس، ستمبر 2010ء اٹی پولیس کالونی ٹی مروک بم دھماکہ ٹی 20 بندغ زوال و 90 آن زیات ٹھپی مسوسسر، ہراٹی زوال مروک آتیان گیشتری پولیس کارندہ تا خاہوت آتا بندغ آک ئسر۔