زرکاری و وتواجہی بحالی آن گیشتر زر جوڑ کننگ نا کنڈآ ہننگ اُن،وزیر خزانہ محمد اورنگزیب

اسلام آباد، بنجائی وزیر خزانہ و بنگکاری سینیٹر محمد اورنگزیب پارینے کہ پاکستان سوگوی اٹ زرکاری و وتواجہی بحالی آن گیشتر زر اس جوڑ کننگ نا کنڈآ ہِننگءِ، مالیاتی و پیشن نا بشخ نا سوگوی، کبینی، وام تابست وبند و جہانی مالیاتی منڈی تسکان دُوارہ رسینگ نا بشخ آتیٹی نمان پیشرفت مسنے، ایس ایم ای، کشت و کشار و ہاؤسنگ نا بشخ آتیٹی مالی وسیلہ غاتسکان رسینگ ءِ ودفنگ انگ ءِ۔ او دا ہیت ءِ لندن اٹ جے پی مورگن نا ایمرجنگ اینڈ فرنٹیئر مارکیٹس وارخواہی کانفرنس نا وخت آ اڈ ہلوک خاص نشست آن تران کرسا کرے، وزیرِ خزانہ پاکستان نا زرگزران ءِ مون تروک پیشن نا زرگزرانی زور، آجو زرگزران نا سوگوی و آخبت نا زرگزرانی حکمت عملی آ سرجمی اٹ گپ وتران کرے۔ و زرگزرانی سوگوی نا دوئی کننگ اٹ پاکستان نا پیشرفت و زرکاری، زر انا جوڑ کننگ، برآمد و پرائیویٹ بشخ انا کماشی ٹی شونداری نا کنڈآ حکومت نا اولیت آتے مون آ تخا۔ کانفرنس اٹ پاکستان نا بابت پنی آ جہانی ادارہ ئی زرکار و بھلامنی مینیجر آتا کنڈآن پبی استخواہی نا درشانی ءِ کننگا۔ جم وڑاٹ 55 جہانی زرکاری فنڈز پاکستانی ڈل اتون چندی ون آن ون اوڑدہی و اسہ پورو زرکار سیشن اسے ٹی بشخ ہلک۔ زرکار آتا پبی استخواہی نا رداٹ کل اوڑدہی تے اسہ دے اٹی اڈ تننگا، ہرافتے ٹی پاکستان نا آخبت نا زرگزرانی کسر، زرکاری نا وارخواہی و برجازرگزرانی بدلی نا مدامگی مننگ نابابت باندات آ سرجمی اٹ گپ وتران کننگا۔ جے پی مورگن پاکستان نا چیف ایگزیکٹو آفیسر و کنٹری ہیڈ امین خواجہ ہم اوڑدہی تا وخت آ ساڑی ئسر۔ وزیر خزانہ حکومت نا زرگزرانی کسر ءِ پیدوارکرسا شش اہم اولیت آتے مون آتخا ہرافتے ٹی زرگزرانی سوگوی ءِ مدامگی جوڑ کننگ و مالیاتی و پیشن نا زرگزرانی زور ءِ سگنگ نا لائخی ءِ سوگو کننگ، سوگوی آن پیداواری لائخی، زرکاری و برآمد آ تیا تالان مدامگی و زموارانہ شونداری نا کنڈآ پیش رفت، پنجرہ ئی اصلاحات آتا ردوریسہ ءِ برجاتخنگ، کمک آن واپار و زرکاری نا کنڈآ گدریفنگ، الس و راج انا چندی تپہ غاتے کن مالی وسیلہ غاتیا رسینگ اٹ ودفنگ، و ڈیجیٹلائزیشن، بلاک چین و ویب 3.0 تون اوار پوسکن آ زرگزران کن پاکستان ءِ گچین وڑاٹ تیار کننگ اوار ءِ۔