اسلام آباد ہائیکورٹ نا فیصلہ ناخلاف ورزی و کسر تے بند کننگ ءِ اسُل سگپنہ،بنجائی وزیرداخلہ محسن نقوی

اسلام آباد، بنجائی وزیر داخلہ محسن نقوی پارینے کہ اسلام آباد ہائیکورٹ نا سرجم فیصلہ بسنے، داسہ بنجائی دارالحکومت آ جلہو کننگ مفک‘ اگہ کس اس دن کرے تو توہینِ عدالت نا کارروائی کننگک‘ کس اس دا پاپ کہ اسہ کنڈ آن سم اس چلینگا و ایلو کنڈ آن چپی مروءِ‘ دن اسُل مفک۔ وزیر مملکت داخلہ طلال چوہدری تون اوار پریس کانفرنس آن تران کرسا او پارے کہ اسلام آباد ہائیکورٹ نا فیصلہ نا خلاف ورزی ہچ وڑ اٹ سگنگ مفک۔ او پڑو کرے کہ عدالت ناپرمان آ پورو عملدرآمد ءِ پک کننگک و دا رد اٹ مچ آ سیکورٹی و تعلقدار ادارہ غاتے سخت وپیدوار پارت کننگانے۔ او سخت موقف تینائی کرسا پارے کہ برانز کننگ ہر سیاسی جماعت و شاری نا آئینی حق ءِ، ولے دا حق انا پن آ لس شاری تا کسر تے بند کننگ یا اوفتے خواری ٹی شاغنگ اسُل امنا کننگ مفک۔ او پارے کہ دارالحکومت اٹی اسہ جاگہ اسے آ ہم ٹریفک بند کروک یا مخلوق ءِ توروک آتا برخلاف دمدستی و سخت کانودی کارروائی کننگک۔ وزیر داخلہ خبردار کرے کہ کانود آن چَپ کاریم کروک و عدالتی پرمان نا خلاف ورزی کروک آتتون سختی اٹ مون تننگک۔ انتظامیہ دارالحکومت اٹی امن و ایمنی نا بحالی و شاری تا بے اڑاند ہن وبر ءِ پک کننگ کن پورو وڑ اٹ سنبرینگوک ءِ۔ او پارے کہ برانز کننگ کل انا حق ءِ ولے دن ہچ مننگ کپک کہ دارالحکومت یا پین صوبہ اسے آ جلہو کننگے۔ او پارے کہ نن سیکورٹی ادارہ غاتے پیدوار پارت کرینن کہ ہر کس عدالت ناپرمان نا خلاف ورزی کرسا پیش تمنگ نا کوشست کرے اودے ہر وڑ اٹ توننگے۔ برانز و دھرنا تیان نن مستین ہم بھاز نسخان ہرفینن۔ او پیدوار کرے کہ دا وڑا نا ہچ ءُ حالیت اس داسہ سگنگ مفک کہ نم سم کاری کبو وایلو کنڈآن چُپی مرے۔ او پارے کہ اگہ کس ءِ برانز کروئی ءِ تو تینا علاقہ و شار اٹی کیر، دارالحکومت یا صوبہ غا جلہو کننگ نا موکل تننگ کپنہ۔ او پارے کہ اینو کوہاٹ اٹی دہشت گردی نا بھاز است ہسون واقعہ اس پیش بس، نن دہشت گردی نا برخلاف جنگ اٹی ہڑدے جنازہ ہرفنگ اُن و دافک برانز نا سجفنگ اٹی ءُ، اوفتا 90 درسَد چکار بندغ مچ کننگ یا چندہ مچ کننگ آ مریک۔ اوفتیکن جوان اف کہ اسہ کنڈ آن جنازہ ہرفنگ انگ ءِ و دافک ایلو کنڈ آ دھرنا تے ٹی اختہ ءُ۔ او پارے کہ خیبر پختونخوا نا وزیراعلیٰ و اونا کابینہ بایدے دہشت گردی نا چٹفنگ کن کاریم کیر۔ او پارے کہ بھاز پیدوار لوز آتے ٹی کل ہیت آتے کننگانے‘ داسہ کس ہچ پاپ و نئے اوکان گڈ غاو کے۔ الس نا جان و مال انا رکھ کننگ ننا زمواری ءِ۔ سیاسی ٹولی و جلوس آتیٹی فرق مریک، سیاسی ٹولیک اگہ سلہہ بند مریرہ تو او سیاسی سلپسہ۔ او پارے کہ اگہ اسہ بندغ اسے نا ہم جان ہنا تو دانا کل زمواری ہمو ٹولی نا مچ کروک آتیا مریک۔ اپوزیشن اٹی مُر ہُروک ءُ بندغ بھاز ءِ۔ خواست دادے کہ چک وتاڑ و پرغ و بٹ آن ہچ ءُ فائدہ اس رسینپک۔ اومیت کینہ کہ او کورٹ انا فیصلہ ءِ خوڑتی اٹ خوانرہ و داڑان چَپ گام ہرفپسہ۔ او پارے کہ ویل آک مذاکرات اٹ ایسر مریرہ، ولے اگہ کس اس تکک کہ سلہہ بند ٹولیک دا کاریم ءِ کیرہ تو او شوق اٹ بریر نن ہم پورو وڑ اٹ تیار تولوک اُن۔