نوشکے نا الس نا بنداوی ویل آتا ایسری کن گام گیج کننگک،ڈپٹی کمشنر جار اللہ کاکڑ

نوشکے، ڈپٹی کمشنر نوشکے جار اللہ کاکڑ نا کماشی ٹی ضلعی انتظامیہ نا کنڈ آن السی ویل آتیان معلومداری و ایسری کن غاو دیوان اڈ تننگا۔ ہراٹی اے ڈی سی محسن لاشاری، ایس پی نوشکے سلیم شاہوانی، اسسٹنٹ کمشنر نعیم قاسم شاہوانی، ایکسین واپڈا قاضی نوید احمد تون اوار جتا جتا سرکاری محکمہ غاتا افسر، ایف سی نوشکے نا کمامدار، سیاسی و راجی و جتا جتا تپہ غاتیان تعلقدار بندغ آک، ٹرانسپورٹر، پوریاگر و کونسلر آک بشخ ہلکر۔ غاو دیوان نا وخت آ شاریک نوشکے ٹی برجا لاک ڈاؤن، فورس آتا کنڈ آن چندی اہم انگا شاہراہ تے بند کننگ و کوئٹہ نوشکے قومی شاہراہ ءِ کیہی ہند آتیا کچہ انگا کسر تیٹی بدل کننگ آ گڑتی نا درشانی ءِ کریر۔ بشخ ہلوک آک پاریر کہ کسر تا بند مننگ و ہن وبر اٹی اڑاند آتا سوب آن الس نا ہڑدے ئی زند بھاز زہمی مننگ اٹی ءِ‘ وخت اس کہ ہلہلہ ئی حالیت آتیٹی ناجوڑ آتے ہسپتال آ سر کننگ و طالب علم آتے تعلیمی ادارہ غاتسکان رسینگ اٹی ہم خواری مون تروئی تمنگ اٹی ءِ‘ شاریک قومی شاہراہ نا کیہی ہند آتیا کچہ انگا کسر تا حالیت نا نشاندہی ءِ کرسا پاریر کہ بھلا و چنکا گاڈی تے ہڑدے خواری و نسخان مون تروئی تمک، اوفک تعلقدار کمامدار آتیان شاہراہ و ہن وبر نا کسر تے الس کن آسان و رکھوک جوڑ کننگ نا خواست کریر، غاو دیوان اٹی نوشکے ٹی تدوک آ اِرا تُو آن گیس پلانٹ نا کمک اٹ گیس انا فراوانی معطل مننگ نا باندات اہم سرحال ئس، شاریک گیس انا بندی آ سخت گڑتی درشان کرسا پاریر کہ گیس الس نا بنداوی گرج ءِ و دانا ہچ ءُ بدل گیگ اس اف۔ بشخ ہلوک آک خواست کریر کہ ضلعی انتظامیہ تعلقدار محکمہ نا بڑزکو کمامدار آتتون نوشتئی وڑ اٹ حوال کرسا نوشکے ٹی گیس انا فراوانی ءِ دمدستی وڑ اٹ بحال کرفنگ کن گام گیج کیے، دا وخت آ گیس انا سپلائی نا معطل مننگ آن پد ہم صارف آتیا بل راہی کننگ آ ہم گڑتی نا درشانی کننگا، امن و ایمنی نا حالیت آ ہم غاو دیوان اٹی شرہ مس‘ شاریک دُزی، داڑیلی و ایلو ڈوہ تا واقعہ تیا گڑتی نا درشانی ءِ کرسا پولیس گشت اٹی ودکی، بے امنی نا زموار آتا دزگیری و شاری تیان پلنگوک یا دُزی مروک گڑاتے دوئی کننگ نا خواست کریر، داکان بیدس جتا جتا کلی تیٹی کنوئی آ دیر انا تنکی‘ بجلی نا لوڈ شیڈنگ، جانجوڑی نا آسراتی و ایلو اجتماعی ویل آتا نشاندہی کننگا، وخت اس کہ منہ شاری جندی وڑ انا ویل آتے ہم ضلعی انتظامیہ نا مون آ تخار، غاو دیوان آن تران کرسا ڈپٹی کمشنر نوشکے جار اللہ کاکڑ پارے کہ غاو دیوان نا اڈ تننگ نا مسخت سرکاری محکمہ غاتے الس نا مون آ پرسجوئی کننگ تون اوار شاری تے مون تروک بنداوی ویل آتیان دراست معلومداری دوئی کننگ و اوفتا ایسری کن گام گیج کننگ ءِ‘ او پارے کہ صوبائی حکومت نا پارت آ ضلعی انتظامیہ السی ویل آتا ایسری کن وس انا کچ آ گام گیج کیک، ایس پی نوشکے سلیم شاہوانی پارے کہ اسٹریٹ کرائم نا مون ءِ توننگ کن نوشکے پولیس گام گیج کننگ اٹی ءِ۔