وطن نا رکھ اکن ندر مروک آ ننا بہادر گلزادہ غاک مچ آ قوم انا ہیرو ک ءُ،وزیراعظم /صدر مملکت

اسلام آباد، وزیراعظم محمد شہباز شریف خیبر پختونخوا ٹی ہنگو و قطبی وزیرستان نا ضلع غاتیٹی ہندوستان نا مخ تف فتنۃ الخوارج نا برخلاف سرسہب کارروائی تیٹی 10 خوارج ءِ خلنگ آ سیکورٹی فورس آتے خراج تحسین پیش کرینے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم فتنۃ الخوارج نا دہشت گرد آتابرخلاف بہادری اٹ جنگ کرسا شہید مروک 6 ورنا ءِ خراجِ عقیدت پیش کرسا شہید آتا پدخاہوت آتتون ہمدردی و ہڑزخواہی نا درشانی ءِ کرے۔ وزیرِاعظم پارے کہ وطن عزیز نا دفاع، امن و سلامتی کن تینا جان تے ندر کروک آ ننا بہادر گلزادہ غاک مچ آ قوم انا ہیروک ءُ۔ شہید آتا عظیم قربانی قوم اکن کسر نا ڈیواءُ و اوفتا خون زیان مفک۔ او پارے کہ “عزم استحکام” نا رداٹ دہشت گردی نا پورو چٹفنگ کن سیکورٹی فورس و کانود نافذ کروک ادارہ غاتا کارروائی پورو واک اٹ برجاسلک۔ داکان بیدس صدرِ مملکت آصف علی زرداری خیبر پختونخوا ٹی بھارتی کاٹم خواجہی ٹی کاریم کروک فتنہ الخوارج نا برخلاف سرسہب کارروائی تیا سیکورٹی فورس آتے خراجِ تحسین پیش کرسا سیکورٹی فورس آتا بہادری و کسبی لائخی تا ستاءِ کرے۔ جمعہ نادے آ ایوان نا پریس ونگ آن جاری بیان نا رداٹ صدر مملکت دہشت گرد آتا برخلاف کارروائی نا وخت آ شہید مروک آ بہادر ورنا تے خراجِ عقیدت پیش کرینے۔ او پارے کہ شہید آتا عظیم قربانی قوم انا ارادگی و حوصلہ ءِ پین سوگو کیک، پاکستان نا بہادر گلزادہ غاک وطن نا دفاع و امن کن تینا جان تے ندر کننگ ءُ، دہشت گردی نا برخلاف جنگ اٹ سیکورٹی فورس آتا قربانیک گیرام مفسہ۔ صدرِ مملکت شہید ورنا تا پدخاہوت آتتون ہمدردی و ہڑزخواہی نا درشانی ءِ کرینے و شہید آتا درجہ غاتا بڑزی و پدخاہوت آتے کن صبرِجمیل نا دعا کرینے۔