وزیر داخلہ تون لبنانی ہم منصب نا اوڑدہی،پاکستان و لبنان نا سیکورٹی تون اوار چندی بشخ آتیٹی کمکاری ءِ ودفنگ آ امنا

اسلام آباد، بنجائی وزیرداخلہ محسن نقوی تون لبنان نا وزیر داخلہ احمد الحجار اوڑدہی کرے، ہراٹی ہڑتوم آ کنڈآتا سیکورٹی کمکاری، دہشت گردی تور و تین پہ تینی تعلقداری تا سوگو ی آ گپ وتران مس۔ لبنانی وزیر داخلہ نا وزارتِ داخلہ غا بننگ آ محسن نقوی اودے جم وجوش اٹ بخیر کرے۔ اوکان پد ہڑتوم آ وزیر تا نیامٹ اول ون آن ون و ولدا ڈل آتا کہول آ مذاکرات مس۔ مذاکرات اٹی دہشت گردی، منشیات نا اسمگلنگ، کانود آن چَپ امیگریشن، منی لانڈرنگ و سائبر کرائمز نا مون ءِ توننگ کن تین پہ تینی شریداری ءِ ودفنگ آ امنا مس۔ ہڑتوم آ ملک آک دہشت گرد و ڈرگ مافیا نا مون ءِ توننگ کن انٹیلی جنس شیئرنگ ءِ سوگو کننگ نا عزم انا درشانی ءِ کریر، وخت اس کہ پولیس اکیڈمی و ٹریننگ پروگرام آتے کن تین پہ تینی کمک، علاقائی حالیت و ڈیہہ اٹی مدامگی امن کن پاکستان نا کوشست آتیا ہم گپ وتران مس۔ فریق آک ہڑتوم آ وزارت آتا نیام اٹ تین پہ تینی کمک نا مونی دننگ کن زوت اسہ مفاہمتی یادداشت اسے آدستخط کننگ و ہڑتوم آ کنڈآتا کمکاری ءِ ودفنگ کن باقاعدہ فوکل پرسن گچین کننگ نا فیصلہ کریر۔ داکان بیدس منشیات تور نا بشخ اٹی ساڑی مفاہمتی یادداشت آ پورو عملدرآمد نا باوری کرفنگا، وخت اس کہ ہڑتوم آ ملک آتا نیام اٹ سفارتی و سرکاری پاسپورٹ آ تیا ویزا فری انٹری نا آسراتی تننگ نا سلاہ غا ہم سجفنگا۔ بنجائی وزیر داخلہ محسن نقوی لبنانی ہم منصب نا دورہ ءِ ستاکڑزوک گوندسا اومیت درشان کرے کہ دا پیش رفت ہڑتوم آ ایلم ملک آتا نیام اٹ کمکاری نا پوسکن ءُ درگہ اس ملک۔ ایلوکنڈ آ لبنان نا وزیر داخلہ احمد الحجار پاکستان اٹی مہمان نوازی آ منت واری ءِ ہرفسا پارے کہ لبنان پاکستان ءِ اسہ ایلم ملک اس تکک و تین پہ تینی فائدہ‘ خاص وڑ اٹ تہہ انا سیکورٹی بشخ اٹی اسہ ایلو نا آزموندہ غاتیان پبی فائدہ ہرفنگ نا خواہندار ءِ۔ مذاکرات اٹی وزیر مملکت طلال چوہدری، بنجائی سیکرٹری داخلہ، چیئرمین نادرا، ڈی جی ایف آئی اے، ڈی جی اے این ایف، آئی جی فیڈرل کانسٹیبلری، نیشنل کوآرڈینیٹر نیکٹا، ڈی جی پاسپورٹس اینڈ امیگریشن، چیف کمشنر اسلام آباد، آئی جی اسلام آباد پولیس، ڈی جی نیشنل فرانزک ایجنسی، اسپیشل سیکرٹری و ایڈیشنل سیکرٹری داخلہ تون اوار بڑزکو کمامدارآک بشخ ہلکر۔