مکہ اسیجائی دفاعی معاہدہ اسلامی دنیا کن مثبت ءُ کلہو اسے،ترک صدر رجب طیب اردوان

انقرہ، ترک صدر رجب طیب اردوان پارینے کہ مکہ اسیجائی دفاعی معاہدہ اسلامی دنیا کن کلہو اسے، دا نا مثبت پیش رفت ہم مون آ بریک۔ ترک وزیرِ خارجہ حاقان فیدان پارینے کہ خلیجی ڈیہہ اٹی جلہو آک بایدے دمدستی وڑ اٹ بند مریر۔ ترک صدر رجب طیب اردوان تدوک آدے ترکیہ نا صوبہ سامسن اٹی ورنا تیکن اڈ ہلوک خصوصی پروگرام آن تران کرسا مکہ معاہدہ نا بابت مثبت پیشرفت آن معلومدار کرے۔ رجب طیب اردوان پارے کہ سعودی عرب، پاکستان و ترکیہ اواری اٹ گام اس ہرفینو، مثبت پیشرفت مننگ اٹی ءِ و نن داٹی سرسہب مرینہ۔ ترک صدر پارے کہ آبنائے ہرمز اٹی ہرا گڑا مننگ اٹی ءِ نن اودے خوڑتی اٹ ہننگ اٹی اُن، بیرہ ہرمز آخا بلکہ خلیج نا کیہی بشخ آتیٹی سنجیدہ وڑ انا گڑتیک اریر۔ او پارے کہ ترکیہ اسلامی دنیا ءِ مون تروک ویل آتا مون ءِ توننگ کن کمک کننگ خواہک و دا مسخت کن ڈیہہ اٹی تینا کوشست آتے برجا تخنہ تاکہ دا چیلنج آتا زوت آن زوت مون ءِ توننگ مرے۔ ترک صدر ودی پارے کہ دا باندات ءِ چنک تکنگ کپنہ۔ ایلو کنڈ آ ترک وزیرِ خارجہ حاقان فیدان پارینے کہ جلہو آک جنگ انا چٹفنگ نا کوشست آتے نسخان رسیفنگ اٹی ءُ، ترکیہ ہمسائے ملک ایران نا سوگوی ءِ ہم اہمیت ایتک۔ ترک وزیرِ خارجہ پارے کہ آبنائے ہرمز آن آجو ہن وبر پک کننگے، جنگ آن مست انا حالیت بحال کننگے۔ حاقان فیدان نا رِد اٹ ترکیہ کل فریق آتتون حوالی ءِ و ویل انا ایسری کن کوشست برجا ءِ۔