ایران نا شڑت آتا پوروی اسکان ہچ ءُ مذاکرات اس مفک، سیکرٹری ایرانی قومی سلامتی کونسل

تہران، ایرانی قومی سلامتی کونسل نا سیکرٹری محسن رضائی پارینے کہ امریکی صدر وخت اس پاہک کہ ہچ ءُ مذاکرات اس مفک، وخت اس پاہک کہ مذاکرات کن سنبرینگوک ان، ٹرمپ نا جتا جتا بیان تیا کس خف توپ۔ محسن رضائی پارے کہ تیل و آبنائے ہرمز نا باندات نا حالیت داسہ بدل مسنے، نسخان تے پورو کننگ کن کروک کوشست آک بروک آ حالیت آتے توننگ کپسہ۔ ایران نا شڑت آتا پورو مننگ اسکان ہچ ءُ مذاکرات اس مفک۔ دا بابت ایرانی صدر مسعود پزشکیان پارے کہ امریکیک اسہ دہشت گرد انتظامیہ اس جوڑ کرینو۔ ایرانی صدر مسعود پزشکیان پارے کہ امریکی انتظامیہ مچ آ دنیا ٹی ہرادے خواہے کسفک، انسانی حق آتا دعویٰ کروک آک اگہ مخلص ءُ تو چناتے و ہسپتال آتے انتئے شست کیرہ؟ مسعود پزشکیان پارے کہ اگہ اوفتے ٹی جنگ انا پڑ آ مونی بننگ نا ہمت ارے تو مون آ برسا ببو جنگ کبو‘ ٹیکنالوجی ءِ کاریم اٹ اتسا بے گناہ بندغ آتے محروم و بے اُرا کپبو۔ ایرانی صدر پارے کہ امریکہ کسر تے تورک و رکھ خلیک‘ دا بیدادی رکھ آتا باریم ءِ بیرہ غریب الس ہرفک۔ مسعود پزشکیان مستی پارے کہ تینے وطن دوست پاروک آک ایلوفتے خراب گام گیج آتیا وگیفرہ۔ داکان بیدس اسپیکر ایرانی پارلیمنٹ باقر قالیباف پارینے کہ تیل انا نہاد آتے داسہ کس اس کنٹرول کننگ کپک۔ اسپیکر ایرانی پارلیمنٹ باقر قالیباف پارے کہ امریکہ تیل انا نہاد آتے کم کننگ کن کیہی کسر تے تینائی کرے ولے اوفتا ہچ فائدہ متو۔ امریکہ تیل انا منڈی ٹی نیام تما‘ دروغ نا حوال آتے تالان کرے۔ باقر قالیباف پارینے کہ امریکہ نہاد آتے کم کننگ کن ملکی کوڑی تیان ہم تیل جاری کرے، امریکی گام گیج آتیان پد ہم تیل انا نہاد آتیٹی ودکی برجاءِ۔ ایرانی پارلیمنٹ نا اسپیکر مستی پارے کہ جہانی تیل منڈی پوسکن ءُ ریسہ اسے ٹی پترینگانے۔ ایلو کنڈ آ آبنائے ہرمز اٹی آئل ٹینکر بارودی سرنگ آتیٹی لگسا بھس مس وخت اس کہ سینٹ کام ایل گایا ٹینکر نا بارودی سرنگ تون ڈوک لگنگ نا ایرانی دعویٰ ءِ مسترد کرے۔ پاسدارانِ انقلاب پارینے کہ واقعہ آبنائے ہرمز نا سویلی دیکی ٹی پیش بس، ڈوک لگنگ آن پد ٹینکر اٹی خاخر لگا، ٹینکر رکھ کروک علاقہ غان گدرینگ نا کوشست کریکہ‘ کانود آن چَپ کسر نا گڑتی تیان داکان مست ہم خبردار کننگاسس۔ یات سلے کہ امریکہ ٹینکر نا بارودی سرنگ تون ڈوک لگنگ نا ایرانی دعویٰ ءِ مسترد کرینے، سینٹ کام پارینے کہ ایران ٹینکر ایل گایا ءِ اول اٹ میزائل اٹ شست کرے، ایرانی جلہو آن پد ایل گایا جہاز بیکار مس۔ داکان بیدس امریکی سینٹ کام پارینے کہ ایل گایا ٹینکر نا بارودی سرنگ تون ڈوک لگنگ نا ایرانی دعویٰ دروغ اسےِ۔ سینٹ کام پارینے کہ پاناما نا بیرک والا ایل گایا ءِ تدوک آ تو اٹی ایرانی میزائل اٹ شست کننگاسس، عمان نا کرّک انا خڑک آ ایل گایا غا اِرا وار ایرانی ڈرون جلہو کننگا۔ امریکی سینٹ کام مستی پارے کہ ایرانی جلہو آن پد ایل گایا جہاز بیکار مس، ایل گایا ءِ علاقائی شریدار ناکمک اٹ اتنگ انگ ءِ۔